3, ఫిబ్రవరి 2019, ఆదివారం

కలానికి గాయమైంది...!!

ఏ కలానికి గాయమైందో
నెత్తురోడుతున్న క్షణాలన్నీ
గేయాలుగా మారుతూ
రుథిరాక్షరాలై వెల్లువెత్తుతున్నాయి

గాలి వాటుకి చెల్లాచెదురై
బంధాలు రెపరెపలాడుతూ
అడపాదడపా తాకే ఆప్యాయపు చినుకుల్లో
తడిసి మురిసి పోతున్నాయి

అరకొరగా మిగిలిన రక్తసంబంధాలు
ఆదరణ కోసం అర్రులు చాస్తూ
అరచేయి అడ్డు పెట్టిన దీపాల్లా
మిణుకు మిణుకుమంటున్నాయి

దాహార్తి తీరని ధనదాహంలో మునిగి
కాలపు వలకు చిక్కుతూ
అహపు తెరలను చుట్టుకుని
పేగుబంధాలను పేలవం చేస్తున్నాయి

ముడిపడలేమంటూ ముగిసిపోతున్న బుుణానుబంధాలను
అక్షరాలు అటుఇటు మార్చినా
అందంగా ఇమడలేమంటూ
భావాలు రొద పెడుతున్నాయందుకే...!!

0 మీరేమనుకుంటున్నారో.....చెప్పేయండి:

Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner