31, అక్టోబర్ 2018, బుధవారం

ఏక్ తారలు...!!

1.   మనసును చదవడం నేర్చుకున్నా_భాషలకతీతంగా ఉండాలని...!!

2.  మదిని తాకిన భావనలే_అక్షరాలకు చేరికవుతూ....!!

3.  పరిపూర్ణం పరిహాసమాడుతోంది_అల్ప సంతోషాలనందిస్తున్న విధిని చూస్తూ...!!

4.    కాలం రాల్చిన కలలు_జ్ఞాపకాల క్రీనీడలుగా...!!

5.   పొరపాటేమి లేదు_గ్రహపాటంతే ఈ జీవితం...!!

6.  ఎన్ని యుగాల నిరీక్షణకైనా సిద్దమే_క్షణాల నీ సమక్షం కొరకు...!!

7.   అక్షరాయుధం చాలు_గెలుపు సోపానమధిరోహించడానికి...!!

8.  ఓ క్షణం చాలదూ_యుగాల కాల నిరీక్షణకు తెర దించడానికి....!!

9.  మనసైన మమకారమది_గుప్పెడు గుండెెలో పదిలపర్చుకున్నానందుకే...!!

10.  పగటిదెంత దొడ్డ మనసో_రాతిరికి సగభాగమీయడానికి...!!

11.    భ్రమ కాదు వాస్తవమే_అద్దం చూపింది నీలోని నన్నే..!!

12.   భావాలను మౌనం ఆవహించింది_మనసాక్షరాలపై కినుక వహించి...!!

13.   ఓటమి విజయమిది_నీ గెలుపులో నన్ను  చూసుకుంటూ...!!

14.   నెమలీక నెయ్యం నాకు వద్దు_చేయందించే చెలిమి చాలు...!!

15.   మౌనం మాటాడుతునే ఉంది_మనసు తెలుపుతూ...!!

16.  ఛీత్కారాలకు తావెక్కడ_చెలిమి చేరువయ్యాక...!!

17.   అక్షరాలకూ అతిశయమే_భావాలను అందంగా అల్లుకుంటున్నందుకు...!!

18.   ఆద్యమైనది అంకురమే_తెర మరుగున ఉన్నా ఉనికి పరిచితమే...!!

19.  హాలాహలమూ అమృతమే_మధనాలన్నీ మధురాలై చేరితే...!!

20.   శాశ్వత ముద్రలే కొన్ని_సైకత రేణువులైనా చెదరక...!!

21.  ఆత్మీయతల నెలవే ఆ చెలిమిది_చిరాకు పరాకులకు చోటులేదక్కడ...!!

22.  ప్రతి కవితా పదాల సంపదే_కతల వెతల సమాహారమై అలరిస్తూ...!!

23.  వెతలకు వెలితినిచ్చింది_ఆత్మీయమైన అక్షరాల చెలిమి...!!

24.  కంటికెగసిన మింటిధార_మనసు మర్మమును దాయనేర్చునా...!!

25.   దాగని కన్నీళ్ళే ఇవి_మనసును చలువ పందిళ్లుగా మార్చుతూ....!!

26.   చేవ్రాలు చెరగకుంది_గతజన్మ బంధాన్ని తలపిస్తూ....!!

27.   నవ్వులన్నీ నువ్వున్న క్షణాలవే_అది గతమైనా వాస్తవమైనా....!!

28.   మనదైనదే జీవితం_ మనసు నవ్వులన్నీ జీవాన్ని నింపుకున్న క్షణాల్లో....!!

29.  చెదిరిపోని అనుబంధమిది_అపురూపమైన జ్ఞాపకంగా పదిలమై...!!

30.   మాసిపోదు జ్ఞాపకమెప్పుడూ_
గతమైనా వాస్తవమై వెన్నాడుతునే.... !!

0 మీరేమనుకుంటున్నారో.....చెప్పేయండి:

కామెంట్‌ను పోస్ట్ చేయండి

తెలుగులో రాయడానికి www.lekhini.org కి వెళ్ళండి

Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner