3, అక్టోబర్ 2021, ఆదివారం

రెక్కలు

 1.   మాటలు

మనసు నుండి వెలువడాలి

చేతలు

హృదయం నుండి రావాలి


అరువు నగలు

బరువుచేటు..!!


2.   మనోసంద్రంలో

సుడిగుండాలు

నీటి మీద రాతలుగా

కారాదు


అక్షర ప్రవాహం

అనంతమైనది..!!


3.   అసహనం 

ఇంటిపేరు

చేతగానితనాన్ని

కప్పెట్టుకోవడాన్కి


అబద్ధపు బతుకులు

నిజాయితీ విలువెరగవు...!! 


4.   రాత

మారదు

గీత

చెరగదు


విధాత

గొప్ప రచయిత...!!


5.   చమత్కారం

చురుక్కుమంటుంది

ఛీత్కారం గురించి 

చెప్పేదేముంది


ఏ కారమయినా

మమకారం ముందు దిగదుడుపే...!!


6.   అక్షరాలకు

తెలియని విద్యలేమున్నాయి

మనిషికి

అంతుబట్టని మాయలే అన్నీ


ప్రకృతి 

ఎరుగని వింతలేమున్నాయని..?


7.   ఆధిపత్యం 

అనాది నుండి ఉన్నదే

అమ్మదనం

అంగడి సరుకుగా మారడమిప్పుడే


కాలాతీతమైపోయాయి

అనుబంధాలు..!!


8.  వెలుగు రెక్కలు

అందుకోవాలి

చీకటి చుక్కల

కలల ప్రయాణంలో


అనంతాన్ని ఆకళింపు చేసుకోవాలి

గమ్యాన్ని చేరడానికి..!!.   


9.  పయనం

అనివార్యం

ఆటంకాలెన్ని

ఎదురైనా


విజ్ఞుని లక్షణం

గమ్యం చేరుకోవడం..!! 


10.    కొరత పడేసింది

కదిలిపోతున్న కాలం

వలస పోతున్న

క్షణాలను వడిసి పట్టలేక


కోత పడింది గుండెకు

కన్నీటి రూపంలో..!!


11.   కాంతిపుంజం నుండి

వెలుతురు మదిలోనికి

అక్షరంతో ఆకర్షింపబడి

సాంత్వన ఇస్తోంది


ఎన్నో ప్రశ్నలకు

సమాధానాలు ఇక్కడే..!!


12.   కష్టానికి

మాట సాయం దూరం

తినడానికి

ఏ మొహమాటం లేదు


పై పై ప్రేమలు

నీటి మీది రాతలే మరి..!!


13.  తరంగ రూపం

ఎక్కడైనా ఒకటే

స్వగతంలో

మిగిలేది గతమే


నిరంతర అంతర్మథనానికి

నాంది అక్షరం..!!


14.  పోయేవన్నీ

పై పై ప్రాణాలే

స్వాగతించేది

స్వ’గతాన్నే


రాసిగా పోసేది

అక్షరాలనే..!!


15.   ఆశలుండక తప్పని

జీవితం

అవసానదశ

అనివార్యం


రెప్ప చాటు 

కలల కుటీరం..!!


16.    పేదరికం

పరిధి కాదు

ధన అహం

గొప్పదని చెప్పలేదెక్కడా


వ్యక్తిత్వం

విలువైన జాతివజ్రం..!!


17.  విరుపు

తెలిస్తే చాలదు

వడుపు

తెలియాలి


బంధానికి

ప్రాణాధారం నమ్మకమే..!!


18.   విరవడమే కాదు

అతుకేయడమూ తెలియాలి

వస్తువుకి మనిషికి

తేడా ఉంటుంది


అతకని బతుకులు

మనవని అనుకోలేమెందుకో..!!


19.   ఎగసిపడే అలలన్నీ

తీరం చేరలేవు

గాయాల్లేని 

గతమూ ఉండదు


కాలాన్ని దాచేది

అక్షర భోషాణమే..!!


20.   చంచలమైన

మనసు

అదుపులేని

మాట


సంస్కారం 

తెలియని జన్మలు…!!


21.   కలలన్నీ

కనుల చాటున

గురుతులన్నీ

గుండె లోతుల్లో


తరచి చూస్తే

తడిమే జ్ఞాపకాలే అన్నీ..!! 


22.  దిగులు దుప్పటి

మనసుకు

వెలుగు రెక్కలు

కలలకు


గుండె ఖాళీలు

పూరించేది అక్షరం..!!


23.   కన్నీరు 

తెలియని కన్నూ లేదు

నీరింకిన

సంద్రమూ లేదు


కాలానికి 

తెలిసిన కబుర్లే అన్నీ…!!


24.   సంకల్పం

ఒకటే

సమస్యలు

ఎన్నైనా


తాను బతుకుతూ

నలుగురిని బతికించడం..!!


25.  దాచలేని

మనోగతం

దాగలేని

అవగతం


తేటతెల్లం

మనసు పుస్తకం..!!


26.   గాయం 

గుర్తెరిగి మసలుకోమంది

బాధ్యత

బంధాన్ని పదిలపర్చుకోమంది


కాయం

కష్టసుఖాలను పంచుకోమంది..!!


27.   రాత ఏదైనా 

వాసి ముఖ్యం

మనిషి ఎవరైనా

మనసు అవసరం


అక్షరాలుగా మారేవి

సాక్ష్యాలుగా మిగిలేవి జీవితపు అనుభవాలే..!!


28.   సాన్నిహిత్యం

పరిమితం

సహవాసం

అవసరార్థం


తీరేదైనా మారనిదే

వ్యక్తిత్వం..!!


29.   విరామమెరుగని 

జీవితాలు కొన్ని

విలాసాల్లో

మునిగి తేలే వారు మరికొందరు


రేపుమాపంటూ

కాలానికి వదిలేయడమే..!!


30.   కొందరి మనసులంతే

అల్ప సంతోషాలతో తృప్తి పడతాయి

కొందరు మనుషులంతే

మాటల తూటాలతో బాధిస్తారు


ఏదేమైనా బంధం నిలబడేది

మాటా మనసుని బట్టే..!!













0 మీరేమనుకుంటున్నారో.....చెప్పేయండి:

కామెంట్‌ను పోస్ట్ చేయండి

తెలుగులో రాయడానికి www.lekhini.org కి వెళ్ళండి

Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner