ద్విపదలు..!!

1.  కొన్ని సత్యాలింతే

అబద్ధాలను ఏమార్చలేక...!!

2.  మనసు సున్నితమని అక్షరానికి ఎరుకే

అందుకే అనంతాన్ని తనలో ఇముడ్చుకుంటుందిలా...!!

3.   బలహీనత బంధానిది

నిజం నిలకడైనదైనా...!!

4.  నిజానికి ఓరిమెక్కువ

అబద్ధానికి ఆయుస్సు తక్కువేనని తెలిసి...!!

5.  అనుబంధపు ముడులంతే

విడివడటాన్ని సహించలేవు...!!

6.  కలలా మిగిలి కన్నీరై జారిపోవాలనుకోలేదు

భవితకు చిరునవ్వుతో స్వాగతం చెప్పాలనుకుంటూ...!!

7.   పట్టుకుంది వదలడానికి కాదు నేస్తం

మరణంలో సైతం తోడుంటానని చెప్పడానికి...!!

8.   ఏనాటి బంధమెా ఇది

మరణించిన మనసును పునర్జీవింపజేస్తూ...!!

9.   జీవమెప్పుడూ జ్ఞాపకాలదే

మరణానికి సవాలంటూ...!!

10.  చరిత్రలో చీకటి కోణాలెన్నో

ధరిత్రి మరువని నిత్యసత్యాలుగా...!!

11.  పతనమై పోతున్నాయి ప్రామాణికాలన్నీ

బాసలు బంధాలను పట్టివుంచలేనప్పుడు..!!

12.  మార్పు సహజమే

మారని గతాన్ని వెంటేసుకున్న కాలానికి..!!

13.  మనసుని మాటాడిస్తున్నా

జ్ఞాపకాల గుభాళింపులతో కన్నీటిని దాయాలనుకుంటూ...!!

14.   మౌనాన్ని వింటూనే ఉన్నా

మనసు చెప్పలేని మాటల్ని...!!

15.  నిందను తిప్పికొట్టే నేర్పు అవసరమే

ఈ అ(న)వసరార్థపు బంధాలకు జవాబివ్వడానికి..!!

16.   కథానాయికకు చెప్పేదేముంది?

కథనాన్ని అనువుగా మార్చుకోవడమెలాగో తనకు తెలిసిన విద్యేగా...!!

17.   గతాన్ని వదల్లేదంటే

మరిపించే వాస్తవం మన వెన్నంటి లేదనే కదా..!!

18.  మనసు విరిచేయడం సుళువే

అతుకులు దాయడమే కష్టం...!!

19.   మనసుల కుటిలత్వం బయల్బడుతోంది

బంధాలు కుతంత్రాల నిలయమైనప్పుడు..!!

20.   ప్రేమంటూ పరమపద సోపానమెక్కించావు

పైకెక్కే నిచ్చెనల పక్కనే పాములుంటాయని మరిచేటట్లు చేసి...!!

21.  అప్పగింతల అంపకాలు తెమలడంలేదు ఎంతకీ

అక్షరాలకందని కన్నీటి వెతల పంపకాల్లో...!!

22.  అక్షరాన్ని పరిచయం చేసింది అమ్మేగా

అందుకేనేమెా ఆ మనసే అక్షరానిదీనూ.. !!

23.  అవ్యక్తమే తను

అనుభవంతో రంగరించి రాద్దామనుకున్న ప్రతిసారీ...!!

24.  మనిషే కానరావడం లేదిప్పుడు 

ఇంకెక్కడి మనసు గోల..!!

25.   బతుకు పోరాటమిది

అలిసిపోని ఆశల వలయాల మధ్యన..!!

26.   నా అక్షరాలూ ఇంతే

మనసు తడినో మమతల ఒడినో గుర్తు చేసేస్తుంటాయలా...!!

27.   మాటలెప్పుడూ ఉన్నాయి

మన(సు) కథలన్నింటా...!!

28.   సంశయం తీరిందిప్పుడు

ఏ బంధమెలా అల్లుకుందో తెలిసాక...!!

29.  (అ)క్షరమై ఆవహిస్తున్నా

అనంతమై మిగిలిపోవాలని..!!

30.  ఉపమానమెప్పుడూ ఉదహరించడానికే

సూక్తిసుధలు వల్లించే నైజం నాదైనప్పుడు..!!