30, డిసెంబర్ 2013, సోమవారం

నా మేనకోడలికి.....!!


పబ్బులు పార్టీలు అంటూ ఆముల్యమైన సమయాన్ని వృధా చేసుకుంటున్న ఎందరో యువతలో భాగం కాకుండా తమలోని సృజనాత్మకతను మెరుగు పరచుకుంటూ... మొదటి ప్రయత్నంలోనే విజయ కేతనాన్ని ఎగురవేసిన బృందం...ప్రతిభకు ఎల్లలు లేవని చాటుతున్న ఈనాటి యువతరంగాలు... వారిలో నా మేనకోడలు ప్రవల్లి ఒకటై నందుకు సంతోషంతో...  మును  ముందు మరిన్ని మహోన్నత శిఖరాలు అందుకోవాలని... మనస్పూర్తిగా ఆకాంక్షిస్తూ.... నా మేనకోడలికి ప్రేమతో అభినందనలు ...
మంజు అత్త
 ( అన్నట్టు చెప్పడం మర్చిపోయాను ఆ కబుర్లు ఈ కబుర్లు అంటూ తీపి చేదు రుచుల నా కబుర్లు కాకరకాయలు అన్ని టపాలు కలిపి దీనితో ఆరు వందల టపాలు.... నా ఆరు వందల టపా నా ఒక్కగానొక్క మేనకోడలికి అభినందనల టపా కావడం యాదృచ్చికమే అయినా ఆ సంతోషంతో పాటు ఈ ఆనందము పంచుకోవడం భలే బావుంది నాకయితే....!! )

29, డిసెంబర్ 2013, ఆదివారం

అర్ధం లేని బంధాన్ని...!!

గతమంతా రాశులు రాశులుగా పోసి ఉంది
ఆ గుట్టలలో బోలెడు జ్ఞాపకాల గురుతులు
ఎన్నని వెదికేది ఎక్కడని చూసేది
రోజుల తరబడి పేరుకున్న నిధిలో
నీ సన్నిధికి చోటెక్కడ ఉందో...!!
వెదికిన రోజులు మరుగున పడలేదు
చూడని క్షణాలు దాయనూ లేదు
జరిగిన కాలం మరపుకు చేరువ కాలేదు
వాస్తవానికి దగ్గరగానూ రావడం లేదు
గతించిన గతంలో సజీవ చిత్రం నీ రూపు
చితికిన ముక్కల్లో నన్ను చూసి నవ్వుతోంది
పట్టుకోలేవంటూ పారిపోతోంది ఎక్కడికో...!!
మనసు మాటను చెప్పని మౌన వీచికను
మనో విహంగాన్ని ఆపలేని మరీచికను
రాగాల తోటలో విహరించే రంగుల రాగమాలికను
అనుబంధాలకు అర్ధాన్ని వెదికే అర్ధం లేని బంధాన్ని...!!

మన ఖర్మకి మనమే భాద్యులము...!!

ఏ కన్నతల్లి పిల్లలని చెడ్డవారుగా కావాలని పెంచదు....మనం ఇష్టపడి బంధాన్ని పెంచుకుని కష్టం వచ్చిందని ఆ బిడ్డను కన్నతల్లిని నిందించడం ఎంత వరకు సబబు చెప్పండి..!! మన అవసరానికి అత్తను మామను వాడుకుని మనకంటూ ఓ గొప్ప పట్టా వచ్చాక మన ఉన్నతి కోసం మన పిల్లల ఆలనా పాలనా చూసిన వారిని మర్చిపోవడం...!! మన ఇంటి విషయంలో వారిని నిందించడం...!! పెంచిన పిల్లలని చూడకూడదని ఆంక్షలు పెట్టడం..!! తాతల ఆస్థి మనవలకు చెందాలి కాని కంటితో చూసుకునే భాగ్యం మాత్రం లేదు..పెంచిన ప్రేమను చంపుకోమనడం...ఆ ముసలి ప్రాణాలు ఎంత క్షోభను అనుభవిస్తాయో.... కాపురాలు కూలిపోయిన బాధ ఓ పక్కా... కనీసం మనవలను చూసుకోలేని దౌర్భాగ్యం... వీటికి తోడూ ఈ శూలాల లాంటి మాటలు....తట్టుకోగలవా....ఆ ప్రాణాలు...!!
మీరు ఇష్ట పడినప్పుడు అంతా మంచిగానే కనిపించింది ఇద్దరిలో ఇద్దరికీ... ఉన్నప్పుడు బయటి ప్రపంచంతో పని ఉండదు అనుకుంటా...ఒక్కసారిగా భాద్యతలు బంధాలు వచ్చేసరికి డబ్బులు ముఖ్యం అయ్యి ఎదుటి వారిలో లోపాలు చూడటం మొదలు అవుతుంది...చిన్నవే భూతద్దంలో పెద్దవిగా చేసుకుని ఏ ఒక్కరు సరిపెట్టుకోలేక తమకున్న అహాన్ని వదులుకోలేక ఎంతగానో ఇష్ట పడిన బంధాన్ని తెంచుకుని పిల్లలని బలి పశువులను చేస్తూ తమతో ముడివేసుకున్న అనుబంధాలను వదిలించుకుంటూ... తమ దారిన తాము పోతూ కన్నవాళ్ళను పెంపకం గురించి ప్రశ్నిస్తారు...!! ప్రేమించినప్పుడు గుర్తుకు రాని పెంపకం విడిపోయినప్పుడు గుర్తుకు వస్తుంది మరి...అదేంటో...!!
నేను పొరపాటుగా ఈ మధ్యనే ఒక మాట అనేసాను..  అది అనుకోకుండా వచ్చేసింది...ఈ లోకంలో లేని ఆ తల్లిని అనడం నా తప్పే....ఆవిడని అనాలని ఎప్పుడు లేదు కాని కోపంలో పొరపాటుగా  అలా వచ్చేసింది...ఈ లోకంలో లేని ఆ తల్లికి ఇలా నా క్షమాపణలు చెప్పుకుంటున్నాను...నా తప్పుని మన్నించమని మనస్పూర్తిగా అడుగుతున్నా...!! అందుకే పెద్దలు చెప్పిన మాటలు గుర్తు ఉంచుకోవాలి మనం " కాలు జారితే తీసుకోగలం కాని మాట జారితే వెనక్కు తీసుకోలేము" అని ... తల్లి మనసు ఎప్పుడు ఏ తల్లిదయినా ఒకేలా ఉంటుంది...మన తప్పులకు కన్నతల్లులను నిందించకూడదు.....!! మన ఖర్మకి మనమే భాద్యులము...!! జారిపోతున్న జీవితపు విలువలు అన్ని డబ్బుతో ముడి పడి పోతూ ఆధునికత ముసుగులో కొట్టుకు పోతున్నాయి....రాను రాను రోజులు ఎలా ఉంటాయో...కనీసం అమ్మా నాన్న బంధాలు కూడా పుస్తకాల్లోనో లేదా నీతులు చెప్పే నీతి  చంద్రికలలోనో పరిమితం అయిపోతాయేమో...!!

హృదయపూర్వక అభినందనలు.....!!





 మీ అందరి అభినందనల ఆశీస్సులు కూడా నా మేనకోడలికి అందించండి.... ఎంత కష్టపడుతుందో చూడండి ...-.:)
హృదయపూర్వక అభినందనలు ప్రవల్లి ...      
మరెన్నో అలవి కాని వింతలు సాధిస్తూ
ఉన్నత శిఖరాలను అందుకోవాలని
మనసారా కోరుకుంటూ .....
ప్రేమతో
మంజు అత్త                    

ప్రయాణమా... పైకి పోవడమా....!!

ప్రయాణంలో పదనిసలు అని ఒకప్పటి మాట...మరి ఇప్పుడో మనకి తెలియకుండా చనిపోవడానికి చక్కని ప్రయాణ ప్రమోద మార్గం...!! ప్రయాణమా... పైకి పోవడమా....!! అనిపిస్తోంది...ప్రతి రోజు జరుగుతున్న ఈ ఘోరాలు చూస్తుంటే...ఇంట్లో ఉన్నా ఎప్పుడు ఏ దారిలో వస్తుందో తెలియని వింతలా మృత్యువు తలుపు తట్టకుండా వచ్చేస్తోంది....ప్రశాంతంగా నిద్ర పోయే సమయంలో ఇంట్లోకి లారీల భూతాలు...చల్లగా ఉంటుంది కదా అని శీతల వాహనాల్లో ఖరీదైన ప్రయాణాలు కాస్త జాగ్రత్తగా ఉంటాయని మనం అనుకుంటుంటే అవే మన ప్రాణాలను ఖరీదుకు అమ్మేస్తున్నాయి.... రూపంలో సహాయ నిధుల కింద...!! లోపం ఎక్కడ ఉందో తెలుసుకునే ప్రయత్నం మాత్రం ఎక్కడ వేసిన గొంగలి అక్కడే ఉన్నట్టుగా ఎన్ని బస్సు , రైలు ప్రమాదాలు జరిగినా ప్రభుత్వాలు అన్ని నిమ్మకు నీరెత్తినట్టుగా మా పరిధి కాదు అని కేంద్రం, మాకు సంబంధం లేదు అని రాష్ట్రాలు తప్పించుకుంటున్నాయి...ప్రభుత్వ,  ప్రైవేటు సంస్థలు కాస్తయినా వాళ్ళ వాళ్ళ లాభాల గురించి ఆలోచించడం మానేసి ప్రయాణికుల క్షేమాన్ని కాంక్షిస్తే ఈ ఘోరాలు కాస్తయినా తగ్గుతాయి...అన్ని లంచాలతో కలుషితం అయిపోయి డబ్బులకు అమ్ముడు పోయి జనాల ప్రాణాలతో మాడుతున్నాయి... ఓ రకంగా ఇందుకు మనము భాద్యులమే అనిపిస్తుంది...మన పని తొందరగా అవడం కోసమో... మరొకందు కోసమో డబ్బిచ్చి మనమే అలవాటు చేస్తున్నామేమో...!! అంతా సరిగా ఉందొ లేదో అని సరి చూడాల్సిన అధికారులు నామ మాత్రంగా చేసి కనీసం తాము తీసుకునే జీతానికి కూడా ఆ కాస్త పని చేయకుండా ఇలా జనం ప్రాణాలతో ఆడుకుంటున్నారు....!! మీ మీ అవసరాల కోసం అమాయక ప్రాణాలను బలిగొనవద్దని వేడుకుంటున్నాము...!!

27, డిసెంబర్ 2013, శుక్రవారం

నీ చెంతకు చేరగా...!!

కనుల ఎదుట నీవుంటే కవితల్ల నా తరమా
మనసు నిండ నీవుంటే మరపు నా వశమా

మౌనంగా నీవుంటే మౌన కావ్యాలు నా కవనాలా
చెంతనున్న నీ తలపే విడలేని బంధమాయనా

మాటలన్ని నీవైతే అక్షరాలు నాకందేనా
ఊహలన్ని నీవైతే ఊసులన్ని నావేనుగా

మువ్వల సవ్వడి నాదైతే ముగ్ధత్వం నీదేనుగా
సరాగాలు నీవైతే కోయిల రాగాలు నావేనుగా

గోధూళి సంబరం నాదైతే పండు వెన్నెల నీదేనుగా
జ్ఞాపకాలు చెంతనుంటే గతమంతా నీవేనుగా

వెదుకులాటల వెతలలో అలసిన ఆనందం నీ చెంతకు చేరగా...!!

26, డిసెంబర్ 2013, గురువారం

రజతోత్సవం జరుగుతున్న రోజు....!!

సరిగ్గా ఈ రోజుకి అంటే డిసెంబరు ఇరవై ఆరుకి రెండు వర్గ పోరాటాల మధ్య సామాన్యులు, అమాయకులు నష్ట
పోయిన జీవితాలకి పాతిక సంవత్సరాలు నిండి రజతోత్సవం జరుగుతున్న రోజు.... బెజవాడ  తో సహా చుట్టుపక్కల జిల్లాలు, కోస్తా లోని చాలా ఊళ్ళు ఇప్పటికి మర్చిపోలేని రాక్షసత్వానికి ప్రతీకగా మిగిలిపోయిన రోజు....రెండు రౌడి వర్గాల మధ్య జరిగిన హత్యా రాజకీయాలు ఎందరికో శోకాన్ని..మరెందరికో జీవితాల్ని లేకుండా చేసినరోజు...!!
రంగా, మురళి ఎవరో కూడా తెలియని ఎందఱో ఈ క్రీడలో బలి అయ్యారు... అలా నష్ట పోయిన ఊళ్ళలో ఒకటి మా ఊరు కూడా.. జరిగి పాతిక ఏళ్ళు అయినా తలచుకుంటే ఇంకా నా కళ్ళ ముందు కనిపిస్తూనే ఉంటుంది ఆ రోజు... అంతకు ముందు రోజే మా అరుగుల మీద కూర్చుని అందరికి పీపుల్ ఎన్ కౌంటర్ పుస్తకంలో ముద్రగడ పద్మనాభం ఇంటర్వూలో  "రంగా కి ఏమైనా జరిగితే ఆంధ్రా లో మూడో ప్రపంచ యుద్ధం వస్తుంది" అని చదివి వినిపిస్తూ ఎవరీ రంగా ఏంటి గొడవ అనుకున్నా...మరుసటి రోజు పొద్దున్నే గోల గోలగా ఉంది అవనిగడ్డలో సూర్యనారాయణ గారి రైస్ మిల్లు తగలబెట్టారు అని కాస్త  వెళ్లి చుస్తే బాగా పొగలు కనిపించాయి...మన ఊఋ కుడా వస్తారంట అందరు జాగ్రత్తగా ఉండండి అని అనుకుంటున్నారు అందరు...మధ్యాన్నం రానే వచ్చింది.. సాయంత్రం నాలుగు ఐంది అనుకుంటా కారం పొట్లాలు ఆడవాళ్ళను  ఊరి మధ్యలో గుడి దగ్గరకు రమ్మని చెప్పారు అందరిని.. తీరా వెళితే ఏముంది అక్కడ చుట్టూ అన్ని తలకాయలే కనిపించాయి నల్లగా కనుచూపు మేరా.... అప్పటికే అందరు పొలాల్లోకి పారిపోయారు... ఇంట్లో అందరమూ అన్ని దారులు అయ్యాము..పొలాల్లో దాక్కున్నాము...నేను మా ఇంటి దగ్గర అక్క వాళ్ళతో వెళ్తూ వాళ్ళ ఇంట్లో నుంచి అక్క వాళ్ళ అమ్మాయి కర్చీఫ్ లు మాతరం తెచ్చింది.. అర్ధరాత్రి వరకు అక్కడే ఉన్నాము... నాకేమో నోరు ఊరుకుని చావదాయే ఏదో ఒకటి ఆ టైములో కూడా జోక్స్ వేస్తూనే ఉన్నా కాస్త భయం పోగొట్టడానికి అన్నట్టుగా....పాపం అందరు టెన్షన్ లో ఉన్నారుగా మమల్ని తిట్టారు...ఈ లోపల మా నాన్న వాళ్ళు వెదుక్కుంటూ వచ్చారు.. వాళ్ళు మన వాళ్ళు ఎవరైనా ఉన్నారా అని పిలుస్తుంటే విళ్ళేమో పలకొద్దంటారు... మొత్తానికి ఊళ్లోకి వెళ్తే ఏముంది అక్కడ చుట్టూ మంటలు, నిప్పులు, పొగలు... ఊరు మొత్తం తగలబెట్టేసారు.... పెంట కుప్పలతో సహా...!! ఇద్దరినీ చంపేశారు.. కొంత మందిని బాగా కొట్టారు...మా ఇంటికి ఏం కాలేదు కాని తా రోజు వేయని భయం తరువాత నెల రోజులు నిద్ర పొతే ఒట్టు... నాలుగైదు రోజులు చీకటి పడితే చాలు ఇంట్లో ఎవరిని ఉండనివ్వలేదు నేను... అంతా చుసానేమో బాగా భయం వేసింది..నాలుగైదు కుటుంబాలు మా ఇంట్లోనే ఉన్నారు..రోజు ఖాళి లేకుండా వచ్చి చూసి పోయేవారికి లెక్కే లేదు... సంక్రాంతికి ముందు కొందరైతే అరిసెలు, ఇంకా ఏవో తెచ్చి పంచి పెట్టారు.. మా ఇల్లు బానే ఉంది మాకు వద్దు అంటే ఇలా ఉంది మీరేం చేసుకుంటారు అని బలవంతంగా ఇచ్చి పోయారు....చాలా అందంగా ఉండే మా ఊరు బూడిద కుప్పలా మారిపోయింది...!! ఎందుకో టి వి చూస్తుంటే నాకు ఆ రోజు జరిగింది గుర్తు వచ్చి ఇలా మీతో పంచుకుంటున్నా....!!

25, డిసెంబర్ 2013, బుధవారం

అభిలాష మహోజ్వలనం గురించి నా మాటలు....!!

తన అక్షర భావాలపై పొగడ్త అయినా విమర్శ అయినా ఏదైనా సరే తను విజయాన్ని అందుకున్నట్టే అని చెప్పిన  అభి మాటల్లోనే అది పోగరో, అహంకారమో, ఆత్మాభిమానమో లేక తను నమ్మిన సత్యానికి తన విజయమో....!!
ఈ మహోజ్వలనంలో పుట్టిన అక్షర శులాలు చాలా మంది గుండెలను గుచ్చుతున్నాయి...గెలిపించే ఆయుధాన్ని అందుకుని మనిషిలోని శత్రువులను, మిత్రులను మనసు విజయానికి అలంకారాలుగా చేసి అమ్మ  అమృతాన్ని చవి చూపించి మాత్రుత్వపు మమకారాన్ని అద్భుత వరంగా ఆవిష్కరించి, తనలోని మనసు మాటలను, భావ జాలాలను, భేషజాలు లేని నిష్కల్మష నిర్మల హృదయాన్ని పరచి, తన భావాల ఆశలతో మనలను మాటలాడించి నేను నాలానే ఇలానే ఉంటాను అంటూ గెలుపు పిలుపు బావుటాను ఎగురవేస్తాను నా మాటలే నా ఆయుధాలు అని చెప్తూ... తెలుగు రాజసాన్ని చక్కని తీయని తేనెల మాటల్లో చెప్పి... నాస్తికత్వంలో ఆస్తికత్వాన్ని చూసే అందమైన వ్యక్తిత్వం ముందు...ప్రేమలోని ఆర్తిని, ఆద్రతను కొత్త కోణంలో చూపి... మనిషి మనసు అశలనువివిధ రంగులలో చెప్పి .. మనసు నాటకాన్ని విశదికరిస్తూ... లోకపు పోక ళ్ళను, దేవుని మాయలను, సమాజపు వింత కట్టుబాట్లను ప్రశ్నిస్తూ... ఆత్మాభిమానాన్ని అమ్ముకోవద్దని తన ఇస్టాన్ని నిక్కచ్చిగా చెప్పిన అభి ధైర్యం అభినందించదగినది...!!
ఆక్రోశంలో రగిలే ఆవేశం పొంగులెత్తి దేవుణ్ణి కూడా ధిక్కరించి మనసు మాయను చూపించి నిజాల నిప్పులతో ఆటలాడి విజయాన్ని చవి చూడమని చెప్తూ...అప్పుడప్పుడు తన లోకంలోకి వెళిపోతూ తన అభిమాన ధనాన్ని చూపిస్తూ మనిషి అర్ధాన్ని మార్చవద్దని అడుగుతూ... ఆడపిల్లను ఆడ పిల్లగా చూడవద్దని వేదనను వెళ్లగక్కుతూ... పెద్దరికాల లోపాలను చూపిస్తూ... నిదురను దూరం చేసి అలుపెరుగని అద్భుతాన్ని అందుకోమంటూ... నిజమైన దేవుని నమ్మిన పనిలో చూడమని చెప్పిన.... ఇలా చెప్పుకుంటూ పొతే ఎన్నో భావాలు కనిపిస్తాయి ప్రతి కవితలోనూ...
ప్రకృతి అందాలను, ప్రేమ పార్శ్వాలను తన మనసుతో చూసి.. తన ముక్కుసూటి  తనాన్ని, ఆత్మాభిమానాన్ని, పొగరుని, వగరుని తలెత్తుకుని గర్వంగా చెప్తూ నేను ఇలానే ఉంటాను అనే అభి నమ్మిన దాన్ని ఎవరేమనుకున్నా నాకేంటి అంటూ నిర్భయంగా తను నమ్మిన నిజాల్ని చెప్పే అభి ముందు ముందు మరిన్ని మహా జ్వాలలు పుస్తకాలుగా ఆవిష్కరించాలని మనస్పూర్తిగా కోరుకుంటూ .....
                                                                                            ప్రేమతో
                                                                                         మంజు అక్క

ఇక అందరు ఆ పనిలో ఉండండి....!!

ఎందుకొచ్చిన బాధలు, ఆవేశాలు, కోపాలు, కష్టాలు, కన్నీళ్ళు... మనకు మనసు ఉంది అనుకుంటేనే కదా ఇవి అన్ని...!! అందుకే ఆ మనసు మనలో లేదని ఓ క్షణం అనుకుని చూస్తే పోలా...!! అసలు చిక్కల్లా మనకు ఈ మనసుతోనే... మనం ఇష్టపడినా... ద్వేషించినా....దేనికయినా దీని మాట వింటేనే అది మనల్ని బానిసలుగా చేసుకుంటూ మనతో ఆడుకుంటోంది...!! అందుకే మనసుని పక్కన పెడితే ఎలా ఉంటుంది...!! ఎలాగు అందరికి ఉండదనుకోండి ఈ మనసు...అది కొందరిదే కానీ అందరిది కాదు...!!
మనసున్న ఆ కొందరు దానితో తంటాలు పడుతూ దాని ఇబ్బంది పెడుతూ వారు ఇబ్బంది పడుతూ ఇష్టం ఉన్నా లేక పోయినా జీవితాన్ని సాగిస్తూ ఉంటున్నారు...అందుకే అ మనసుని మర్చి పొతే ఇక ఏ గోలా ఉండదు...!! మనం సంతోషంగా ఉండాలి అంటే మన మనసుని మర్చి పోవాలి ... ఇక అందరు ఆ పనిలో ఉండండి....-:)...!!

24, డిసెంబర్ 2013, మంగళవారం

మహోన్నత శిఖరం ...!!

అల్లరి పాపాయిలో అమ్మను చూసుకుని
అనుబంధాల ఆత్మీయతా బంధాన్ని
మమకారపు మధుర కావ్యాన్ని
తప్పటడుగుల విన్యాసాన్ని
ముద్దు ముద్దు మాటల మూటలను
మనసుతో అనుభవించి అంతలోనే
రూపాన్ని మార్చుకుని నాన్న ప్రేమతో
వ్యక్తిత్వాన్ని సంతరించుకుని
తన చేతితో మలచిన సజీవ శిల్పాన్ని చూస్తూ 
అనుభవించే ఆనందాన్ని మరో జీవితానికి
వారధిగా కొత్త తరానికి నాందిగా మార్చుకునే
తన రక్త పాశాన్ని విడలేక మనసు తపనను
ఆనంద భాష్పాలుగా చేసుకుని ఆనందించే
ఆ తండ్రి హృదయం మహోన్నత శిఖరం ...!!
అప్పుడే పుట్టిన పాపాయి అమ్మను తలపిస్తుంటే
అమ్మ ప్రేమను చవి చూసిన నాన్న తన పాపలో
అమ్మని చూసుకున్న ఆ అపురూప క్షణం...!!
పాదాలు కందకుండా అరిచేతుల్లో నడిపించిన నాన్న 
అడగకుండానే అన్ని తానైన ఆత్మీయతా బంధం
హద్దులు లేని ప్రేమమూర్తి నాన్నకు అక్షర నీరాజనం..!!

ప్రేమపూర్వక పుట్టినరోజు శుభాకాంక్షలు .... !!





ప్రియమైన భావనకు....
చక్కని పాటలతో అందరిని మురిపించి
పాత పాటల హాయిని అందించే
మధుర భావ రాగాల చిన్నారి కోకిలమ్మ
బోలెడు పాటలు పాడి గాన కోకిలమ్మగా
అందరి మన్ననలు అందుకోవాలని ఆశిస్తూ....
ప్రేమపూర్వక  పుట్టినరోజు శుభాకాంక్షలు ....
                               ప్రేమతో.......
                   నిన్ను ఇష్టపడే అందరు 



                                            








23, డిసెంబర్ 2013, సోమవారం

నువ్వు నెగ్గిన ఆ క్షణం...!!

జ్ఞాపకంగా దాచేసుకుందామంటే
గతంగానే ఉండి పోతానంటున్నావు...!!
కరిగి పోయిన కాలంలో కలగా
మిగిలి చెప్పని కధగా మారిపోయావు...!!
పలకరింపుల పలవరింత మౌనంగా ఉంటే
దొరికి పోయిన నీ మది దాగిపోయింది సిగ్గుపడుతూ ...!!
నువ్వు నీకు తెలిసిపోయిన ఆ క్షణాలు
నాతో స్నేహం చేసాయి నిన్ను పరిచయం చేస్తూ...!!
వెన్నెలా వేకువలు కలిసినట్లు
శిశిర వసంతాలు చెంతనే చేరినట్లుగా బావుంది కదూ...!!
నాకు తెలియని నా జ్ఞాపకం నీలో ఉండి
ప్రపంచాన్ని జల్లెడ పట్టిన వెదుకులాటలో నువ్వు నెగ్గిన ఆ క్షణం...!!
చేజారిన చెలిమి చెంతకు చేరిన తరుణం
పుడమిని తాకిన తొలకరి చినుకుల సంబరాన్ని గుర్తు చేస్తూ...!!

22, డిసెంబర్ 2013, ఆదివారం

నా అక్షరయానం ఎప్పటికి...!!

నీ నుండి దూరంగా పారిపోయాను అనుకున్నా
దిగంతాల ఆవలకు పోయినా వెన్నంటి వస్తున్నావు....!!
రహదారులన్ని మూసేశాను నువ్వు రాకుండా
అయినా వదలకుండా వెంట పడుతూనే ఉన్నావు...!!
నీకు తెలియకుండా నాతోనే నడుస్తున్నావు
నా అడుగుల ముద్రలలో నీ పాదాల గుర్తులతో...!!
నీ తలపు గుండె గూటిలో కొలువై నాతోనే నిరంతరం
మనసుని మూసే తలుపు లేక తెరిచే ఉంచా నీ కోసం...!!
చేరువుగా లేకున్నా చెంతనే ఉండకున్నా
నాలోని నీతోనే నా అక్షరయానం ఎప్పటికి...!!
నీ ఆనవాలు ఒక్కటి చాలదూ నాలో
నీ జ్ఞాపకాల సాహచర్యంతో జీవితాంతం బతకడానికి...!!

21, డిసెంబర్ 2013, శనివారం

మనకన్నా పెద్ద నియంత....!!

మనకు ఎన్ని ఉన్నా మన దగ్గర లేని దాని గురించే మన ఆలోచనంతా ఉంటుంది... ఎందుకో మరి ఇష్టంగా కూడా అనిపిస్తుంది..అందని ద్రాక్ష పుల్లన కదా...మరెందుకో ఇలా...!! మన దగ్గర ఉన్న విలువైన దాని గురించి పట్టించుకోకుండా ఎడారి ఎండమావుల వెంట పరుగులు తీస్తూ సేదదీర్చే ఒయాసిస్సులని భ్రమ పడుతూ అలసి పోయినా కూడా...ఆయాసపడుతూ వాటి కోసం పరుగులు తీస్తూ ఉంటాము... మన నైజం ఇదేనేమో....!!
ఇంట్లో ఈగల మోత బయట పల్లకీల మోత....మింగ మెతుకు లేదు మీసాలకు సంపెంగ నూనె సామెతలు  గుర్తు వస్తూ నవ్వు వచ్చేస్తుంది ఒక్కోసారి...మనం ఎదుటివారికి చెప్పే నీతులలో కనీసం ఒక్కటి ఆచరించినా మన జీవితం ధన్యమైనట్లే...!! మన ఒక వేలు ఎదుటి వారిని చూపిస్తే మిగతా నాలుగు వేళ్ళు మనని చూపిస్తాయి...కాని మనలోని లోపాన్ని మనకు తెలిసినట్లు ఉండకుండా అంతరాత్మ నోరు నొక్కేసి మనం చెప్పిందే వేదం అంటూ హుంకరిస్తూ మన ప్రతాపాన్ని అందరికి గుర్తు చేస్తూ గొప్పగా భావిస్తాం...ఈ రోజు మన ముందు పొగిడిన వాళ్ళే మనం కనుమరుగు కాగానే మన లోపాలను ఎత్తి చూపుతూ అవహేళన చేస్తారని మనకు తెలుసు.. అయినా అబద్డంలోనే ఆనందం బావుందని అలానే ఉండి పోతాం...నిజాన్ని దగ్గరకు రానీయకుండా...!! అందుకే నిజం అలా మనలోనే అంతర్లీనంగా లోపలే ఉండి పోతోంది...మనం ఎలా ఉంటున్నాము అని ఒక్కసారి నిజాయితీగా ప్రశ్నించుకుంటే...?? ఎప్పుడైనా మనం ఎదుటివారికి ఇచ్చేదే మనకు తిరిగి వస్తుంది...తప్పదు దాన్ని అలానే అందుకోవాలి..మనం ఇచ్చినప్పుడు వాళ్ళు తీసుకుంటున్నారు కదా...!! కాకపొతే అందరు గాంధీలు, మథర్ తెరీసాలు ఉండరు...అందుకే మనం ఇచ్చింది మను గోడకు కొట్టిన బంతిలా తిరిగి వస్తే తీసుకోవాలి తప్పదు మరి..మనం ఇచ్చింది మనకు ఇష్టం లేక పొతే ఎలా...!! ఎంత సేపు ఎదుటి వారిలో లోపాలు వెదక కుండా కాస్త మంచిని చూడగలిగితే మనసుకు జీవితానికి ప్రశాంతత వస్తుంది...మనమే నియంతలం అనుకుంటే మనకన్నా పెద్ద నియంత ఒకడు ఉన్నాడు వాడు మన లెక్కలు వేస్తూనే ఉంటాడు ఎప్పటికప్పుడు...!! అర్ధం ఐంది కదూ ఆ నియంత ఎవరో....!! -:)

ఈ ప్రయాణం....!!

నేల రాలిన జీవితం పక పకా నవ్వుతోంది
మరచిపోయిన గతాన్ని గుర్తు తెచ్చుకుంటూ...!!
వాడిపోయిన వాసంతం ఎదురు చూస్తోంది
కొత్త చివురుల పలకరింపుల తొలకరి కోసం....!!
చెరిగి పోయిన అక్షరం మసకగా మారింది
నే రాసుకున్న నా తలరాతను తలపిస్తూ...!!
కోపాల శాపాలు నా చుట్టూనే తిరుగుతున్నాయి
వరదల వెల్లువగా మారి ఊపిరి అందకుండా...!!
మనసు శకలాల శిధిలాలు అలానే ఉన్నాయి
మోసపోయిన జీవితానికి రాతి కట్టడంలా....!!
కలల గోదారి గంభీరంగా సాగిపోతూనే ఉంది
సుడిగుండాల ఆటుపోట్లు తట్టుకుంటూ...!!
ఒంటరి పయనానికి అలవాటైన ఈ ప్రయాణం
చేరాల్సిన గమ్యం వెదుకు కుంటూ...!!

20, డిసెంబర్ 2013, శుక్రవారం

మరల చూస్తూ...!!

తరలిరాని కాలంతో పరుగు
మరలిరాని మనసు కోసం....!!
దరి చేరని మమతల మాధుర్యంలో 
రాలిపోతున్న రవ్వల చక్రం...!!
గువ్వల గూడు చిన్నబోయిన చోట
మౌనం మాటేసి కాపలా కాస్తోంది...!!
చీకటి పహరాలో వేకువ దారిలో
చెదరిన గవ్వలు చేరువగా వస్తాయని...!!
మాటల ముచ్చట్లు రాసులుగా పోసి
చుక్కల గుట్టలు దోసిలి పట్టి చూస్తూనే ఉంది..!!
వెన్నెల వాకిట్లో తొంగి చూస్తూ జారిపోయి
గుమ్మం చాటుగా దొంగలా గడప దాటింది...!!
ఎదురు చూపుల మదిలో మరో రోజు మొదలై
రేయి తెల్లవారింది...మలి ఝాము కోసం మరల చూస్తూ...!!

19, డిసెంబర్ 2013, గురువారం

మనసు కావ్యం ....!!

చెప్పని కధకు సాక్ష్యం ఎక్కడని వెదకను
మిగిలిపోయిన జ్ఞాపకాల నీడలను అడిగితే...!!

ఎలా చెప్పాలో తెలియక నన్ను చూస్తూ
మాటలు రాక మౌనంగానే ఉంటాయేమో నీలానే...!!

జారిపోతున్న పరదా చాటున ఓ ఛాయ
కనిపించి కనిపించక దాగుడుమూతలాట నాతో నువ్వేనేమో..!!

ఇలా వచ్చి అలా వెళ్ళే ఆ గాలి స్పర్శ
నీ తలపుల బంధనాల చిక్కుల్లో చుట్టినా ఆనందమే నాకు..!!

మనసు పరచి మమత పంచిన బంధం
చేరువ కాలేక దూరం పోలేక నలిగి పోతున్న క్షణాలు మన మధ్య...!!

కన్నీటి కావ్యాన్ని చెరిపేసిన చెలిమి చెప్పకనే
చెంతనే ఉండి చేరువగా చేరితే ఆ సాన్నిహిత్యం అందమైన ప్రేమ కవనమే....!!

16, డిసెంబర్ 2013, సోమవారం

మరుగేలరా......!!

కలల అలల కావ్యమై విరిసి మురిసి
ముగ్ధ మోహనమై మువ్వలా ముడుచుకుని
సడి లేని సవ్వడిలా మదిలో సందడి చేస్తూ
నాలో చేరిన ఈ చైతన్యం ఎక్కడిది...!!

అహాల అడ్డు గోడల నడుమ నలిగి 
మనసుల మమతలు మరుగున పడినా
అంతస్థుల అహంకారాల మధ్య చిక్కుకున్నా
నా అస్థిత్వపు అలంకారం ఇక్కడే ఉంది....!!

ఎదురెదురు దిక్కుల్లా ప్రతి క్షణం చూసుకుంటూ
కలవని నింగినేలా కనికట్టులా కనిపిస్తూ
పరుగులు పెట్టే ఎండమావుల వెర్రి ప్రయాణం
సేద దీర్చే మలయమారుత సమీరాల కోసం....!!

నీకు అక్కర్లేక వదిలేసిన జ్ఞాపకం
మరచిన మరపు వాకిటిలో ఎదురు చూస్తోంది
జార విడిచిన గురుతులను భద్రంగా ఏరుకుంటూ
ఓ జీవిత కాలం పదిలంగా దాచుకుంటూ....!!

14, డిసెంబర్ 2013, శనివారం

మీ దృష్టిలో మనిషి విలువ....!!

ఏటో ఎర్ర బస్సెక్కి ఎలిపొచ్చిసినానని నానంటే అందరికి ఎగతాలై పోనాది...ఏదో మా ఊర్లొ ఉన్న బస్సెక్కిసినాను కాని నాకేటి తెల్దా ఏటి నానెక్కడికెల్లాలో...ఏ  బస్సెక్కాలో..!! ఏడిపించినా... ఎకసెక్కాలాడినా..నానూరికే భయపడిపోయి మా ఊరికి ఎలిపోతానేటి...?? నాకేటి కావాలో అది తీసుకునే పోతాను...భయపడి ఒట్టి సేతుల్తో ఉపేసుకుంటూ తల వొంచేసుకుని ఎలిపోను...ఏటో ఎర్ర బస్సు ఎక్కోచ్చేసినాది ఇదేటి సేత్తదిలే మహా మహా పోటుగాళ్ళే పారిపోనారు ఇదెంత అనుకుంటే అది నా తప్పు కాదు....భాష రాక పోయినా, యాస బాలేక పోయినా, పద్దతి తెలిస్తే సాలదేటి..?? నాను ఇలాగే ఉంటాను... నాలానే ఉంటాను....!!
ఈ మనసు మాటల్లో ఎంత నిజాయితీ ఉంది.. దానిలోనే ఎంత నిక్కచ్చితనము కనపడుతోంది...!! దేనికి భయపడని పోరాట పఠిమ తను అనుకున్నది సాధించడానికి...!! ఓ మారుమూల పల్లె మనసు అందరు గుర్తించే విధంగా ఎదగడానికి ఈ ఆవేశం చాలదూ..!!
ఈ పద్దతి, కల్మషంలేని మాటలతోనే అందరి మనసులు గెలుచుకోవచ్చని మనలో ఎంత మందికి తెలుసు...!! పల్లెటూరి వాళ్ళు మట్టి ముద్దలు, పట్టణపు పాలరాతి శిల్పాలతో పోటి పడలేరు అనుకుంటే అది మన పొరపాటే అవుతుంది...నాగరికతకు సరైన అర్ధం తెలుసుకుంటే మనం ఎక్కడ ఉన్నామో..ఎలా బతుకుతున్నామో తెలుసుకోగలం...!! ఇంగ్లీష్ వచ్చిన వాళ్ళందరూ మేధావులు కాదు...రాని వాళ్ళందరూ చవటలు కాదు...భాష రావడం అవసరమే కాని అది ఎదుటి వారిని కించపరచడానికి కాదు...మన సంబంధ భాంధవ్యాలను పెంచుకోవడానికి...బాగా గొప్ప గొప్ప చదువులు చదువుకున్న విజ్ఞులు ఎందరో తమ చదువుని, తమ హోదాని కూడా మరిచి పోయి తమ కింది ఉద్యోగులను, తోటి వారిని చాలా హేళనగా మాట్లాడటం ఎంత అవమానకరం..!! డబ్బు, హోదా, పరపతి ఒకదానితో ఒకటి పోటి పడుతూ ఉంటాయి...వాటితో పాటు తమ హోదాను నిలుపుకోవాలన్న కాంక్ష కూడా అంతే బలంగా పోటి పడుతూ...ఎక్కడ తన  లోపాలు ఇతరులకు తెలిసి పోతాయో అని భయంతో ఎదుటి వారిని తక్కువచేసి మాట్లాడటం, నలుగురిలో కించపరచడం.. ఇలాంటివి చేస్తూ మనని మనమే బయట పెట్టేసుకుంటాం...!! ఒక మనిషికి ఆ మనిషిలోని విజ్ఞతకు, వ్యక్తిత్వానికి,మంచి మనసుకు విలువ ఇవ్వండి...డబ్బుకు, హోదాకు,భాషకు కాదు....!!

13, డిసెంబర్ 2013, శుక్రవారం

మనని మనం తెలుసుకునే ప్రయత్నం చేస్తే...!!

ఏంటో....ఈ ప్రపంచంలో మనం ఒక్కరమే బాగా ఖాళి లేకుండా ఉన్నాము మిగిలిన అందరు పని పాటు లేకుండా ఊరికినే ఉంటున్నారు అనేసుకుంటూ ఉంటాము...మన గురించి మనకంత గొప్ప నమ్మకం కాబోలు మరి...!! మనకి ఎప్పుడో ఒకసారి ఎవరొ ఒకరు గుర్తు వచ్చి మన పలకరింపే ఆ గుర్తు వచ్చిన వారి జన్మ ధన్యం అనుకుంటూ మనకి వెంటనే సమాధానం చెప్పేయాలనుకోవడం...!! సమాధానాలు కాసేపు ఆలస్యం అయితే పదే పదే విసిగించడం..!! మనకు పనులు ఉన్నట్టే ఎదుటి వారికి కూడా ఉంటాయి అని ఆలోచించలేము ఎందుకో మరి...!!
ఒకప్పుడు కలం స్నేహం అంటే ఓ చక్కని అనుభూతి ఉండేది దానిలో... భావాలను పంచుకుంటూ...ఇప్పటి ముఖ పుస్తక స్నేహాలు, పోకళ్ళు ( అన్యధా భావించకండి అందరు కాదండి కొందరు మాత్రమే) చూస్తుంటే ఏం చెప్పాలో కూడా తెలియని పరిస్థితి...!! మన ఇంట్లో అన్ని ఉన్నా మళ్ళి దేనికోసమో పాకులాటలు...వెధవ నటనలు, జాలి మాటలు, పొగడ్తలు...ఇలా వీటిలో దేనికో ఒకదానికి మోసపోయి వాళ్ళ ఉచ్చులో పడక పోతారా అని ఎదురు చూస్తూ ఉంటారు...వ్యక్తిత్వం అనేది అందరికి ఉంటుంది...అది మన ఒక్కరి సొత్తేం కాదు...!! మన కున్న అనాగరికమైన ఆలోచనలు ఎదుటి వారికి ఉంటాయనుకోవడం మన భ్రమ..!! ఇష్టాలు, అభిప్రాయాలు, మనస్తత్వాలు...ఇలా కొన్ని కొందరిలో నచ్చుతాయి...కొన్ని నచ్చవు..ఇది ప్రతి ఒక్కరిలో ఉంటుంది....మనకు నచ్చని వారందరూ చెడ్డవారు కాదు.. అలా అని మనకు నచ్చిన వారందరూ మంచివారు అని చెప్పలేము...కొందరు మన దగ్గర మంచి వారిగా నటించవచ్చు...మన వేమన గారు ఎప్పుడోనే చెప్పినట్టు మేడి పండు చూడ మేలిమై ఉండు...పొట్ట విప్పి చూడ పురుగులుండు....ఎంత నిజం ఇది...!! మనిషిని చూడగలం కాని లోపలి మనసుని చూడలేము కదా....!! చూసే సరికే చాలా  జరగాల్సిన నష్టం జరిగి పోతుంది...అందుకే నొప్పింపక తానొవ్వక అన్నట్టు ఉంటూ మన పని మనం చేసుకుంటూ పోతుంటే సరి.... భావాలను పంచుకోండి...బందాలను పెంచుకోండి... భాద్యతలను మరువకండి...వయసును దానికి ఉన్న విజ్ఞాతా విలువలను అవహేళన కాకుండా చూడండి....మన కోసం మరొకటి జీవితాన్ని, ఆలోచనలను నాశనం చేయాలన్న ఆలోచనలను వదిలేస్తూ....ఎవరి కోసమో కాకుండా మన కోసం మనకంటూ కాస్త సమయాన్ని పంచుకుంటూ...మనని మనం తెలుసుకునే ప్రయత్నం చేస్తే...!!

12, డిసెంబర్ 2013, గురువారం

ఏ తావుల సేరిందో..!!

సెలఏటి పాట వినిపించినాది
నెలవంక నీడ అగుపించినాది
మాటేసిన మబ్బులు దాచేసినాయి
సీకట్ల పరదాలు చుట్టేసినాయి
రాదారులన్ని బోసి పోయినాయి
సిరునవ్వుల ఎలుగులేక చింత పడే మనసుతో
గుండె గూడు గుబులై చిన్న బోయినాది
సుక్కల సీరల్లో దాగినాదేమో
మబ్బుల పానుపుల్లో పరున్నదేమో
కలై తోడుగా కడవరకు నడిచింది
మాటగా మదిలో సడి లేకుండా దాగుంది
గురుతులిడిసి పోనాది గుప్పిలి నిండుగా
తెరచిన సేతుల్లో జ్ఞాపకమై మిగిలింది
ఎటెల్లిపోనాదో ఏ తావుల సేరిందో..!!
యాడని ఎతికేది...ఎతికి ఎతికి ఏసారిన ఈ తనువు...!!

11, డిసెంబర్ 2013, బుధవారం

సేద దీరినవెందుకో...!!

మనసు మౌన కావ్యమైన తరుణాన
చెప్పలేని బతుకు అర్ధాలు మూగబోతే
పలుకలేని భావాలను తెలుపలేక
చిన్న బోయిన మోము...చాటున దాగుంది...!!

కలలకర్ధం కంటికి తెలిసినా తెలుపలేని భాష
కన్నీటికి దొరికినా ఆ భావనల ఒరవడిని
తట్టుకునే తనువు తనదైనా తనది కాని
మదిని సముదాయించలేని వృధా ప్రయత్నం ఇది ...!!

పొదరింటి పయనం పొడ గిట్టని ప్రయాణమై
మాటల శరాలు శతఘ్నులై పహారా కాస్తుంటే
జ్వాలలై ఎగసి పడుతున్న అంతరాగ్ని కాల్చేస్తోంది
తనువును సమిధలు లేకుండానే...!!

అందుకోలేని అగ్ని పుష్పమై అలరాలినా
అందని అంబరమై ఆశలు రేపెట్టినా
అలరులు కురిసిన ఆనందానికి ఆలవాలమైనా
అశ్రు ధారలు ఆ నయన తారకల చెంతన సేద దీరినవెందుకో...!!

10, డిసెంబర్ 2013, మంగళవారం

ఎదురు చూపులే చివరికి....!!

మాయని మమతల మాటున దాగిన
మౌన హృదయం గాయపడి బేలగా
రోదిస్తోంది  నీ నిర్లక్ష్యానికి చిరునామాగా...!!

పొంగిన ప్రేమ వెల్లువలో మునిగిన మనసు
ఊపిరందక ఉక్కిరి బిక్కిరై కొట్టుకుపోతూ
నీ ఆసరా కోసం ఆశగా చూస్తూనే ఉంది....!!

కాలాలు గడచినా యుగాలు మారినా
మారని తన తలరాతను నిందించుకుంటూ
రాని నీ కోసం ఎదురు చూస్తూనే ఉంది....!!

నీ సహవాసాన్ని గుర్తు చేసుకుంటూ
నీ జ్ఞాపకాల సాహచర్యంలో బతికేస్తూ
నీ గురుతులతో స్నేహం చేస్తూనే ఉంది అనుక్షణం...!!

ఓ జీవిత కాలాన్ని వెచ్చించి
మరో కొత్త జీవితానికి నాందిగా
నీతో పయనమైతే మధ్యలోనే విసిరి వేసిన ఈ బంధానికి...
ఎదురు చూపుల నిరాశలే చివరికి....!!

9, డిసెంబర్ 2013, సోమవారం

ఆత్మీయతకు మారు పేరుగా...!!

ఏ పరిచయం ఎటు పోతుందో....!!
ఏ  స్నేహం ఏ దారంట వెళుతుందో...!!
తెలియని మలుపుల సుడిలో కొట్టుకు పోతాయో...!!
ఎవరి జీవితాన్ని చిన్నాభిన్నం చేస్తాయో తెలియక....ఎందుకొచ్చిన మనకు తెలియని పరిచయాలు పెంచుకోవడం...!! ఎవరి మనసులో ఏముందో ఆ పరమాత్ముడి కెరుక...మర్యాద మన్నన అనేవి ఇచ్చి పుచ్చుకునే ఆభరణాలు ఏ సంస్కృతిలోనైనా...!! మనసులో తప్పుడు ఆలోచనలు మనిషిని కలుషితం చేస్తాయి...మనకు ఉన్న ఆలోచనలే ఎదుటి వారికి ఉంటాయనుకోవడం చాలా తప్పు..ఎదుటి వారిని బట్టి మన మాటలు చేతలు ఉండాలి  కాని మనకు నచ్చినట్టు మాట్లాడేసి హమ్మయ్య మన పని అయిపొయింది అనుకోకూడదు...మనని మనం మోసం చేసుకున్నా క్షమించవచ్చు కాని...ఎదుటి వారిని మోసం చేయడం చాలా తప్పు...మీరు అనవచ్చు మోసపోతేనే కదా మోసం చేయగలిగేది అని.. మనం చేసేది మోసం కాదు వారిలోని నమ్మకాన్ని మోసం చేస్తున్నాం అని...!! అన్ని ఉన్నా ఇంకా దేనికోసమో వెంపర్లాట..దానికోసం సవాలక్ష అబద్దాలు...!! ప్రేమంటూ ఒకరు..ఇష్టమంటూ ఒకరు ఇలా చెప్పుకుంటూ పొతే బోలెడు భిన్న మనస్తత్వాలు...వ్యక్తిని, విజ్ఞతను అభిమానించండి తప్పులేదు అంతే కాని ఎదుటి వారి మనసుతో కాని, జీవితంతో కాని ఆడుకోకండి...మన పరిధి ఎక్కడో అక్కడే ఉంటే అందరికి ఆనందదాయకం..!! ఎవరి ఇష్టం వారిది అంతే కాని మన ఇష్టాలను బలవంతంగా వాళ్ళ మీద రుద్దడానికి ప్రయత్నం చేయవద్దు...
దానివల్ల దూరం పెరిగి ఈ దారపు బంధాలు పుటుక్కున తెగిపోయే ప్రమాదమే ఎక్కువగా ఉంది...!! ఏ పరిచయమైనా అందరికి సంతోషంగా ఆమోదయోగ్యంగా ఉండాలి కాని...హేళన చేయించుకునేదిగా ఉంటూ అపహాస్యం పాలు కాకూడదు...మన వయసుకు తగినట్టు హుందాగా...సంస్కృతీ సంప్రదాయాలకు ప్రతీకలుగా చక్కని నడవడితో...ప్రవర్తన అందరికి మంచిది...!! అది పది కాలాలు పదిలంగా అందరి హృదయాల్లో నిలిచి పోతుంది.. ఆత్మీయతకు మారు పేరుగా...!!

8, డిసెంబర్ 2013, ఆదివారం

మనకి మనమే మిగిలేది....!!

నేను ముసుగు వేసుకున్నా
నా అంతరంగానికి తెలియకుండా...
ఎవరికీ కనిపించలేదేమో అనుకుంటూ
పారిపోవాలని పరుగెడుతూనే ఉన్నా...
అలసి పోయి ఎప్పటికో ఆగిపొయాను
వేసుకున్న ముసుగు తొలగి వెలుగు గుచ్చుకుంది
చూడలేక అడ్డుగా చేతులు పెట్టుకున్నా
నేనెక్కడ ఉన్నానో తెలియక....
నాకు తెలియకుండానే
దిగంతాల అంచులకి చేరుకున్నా అప్పటికే... 
నా చుట్టూ శున్యమే తోడుగా ఉంది
ఒంటరి పయనంలో మనసుకు కప్పిన దుప్పటి
చిరిగి పోయింది...అ చిరుగులకు అర్ధం
వీడిన చీకట్లు విన్నవించాయి....
బంధాలు...భాద్యతలు...ప్రేమలు..అభిమానాలు
అన్ని జగన్నాటకంలో మొహాలు...
ఈ బతుకు పయనంలో...
మన రాక ఒంటరే..పోక ఒంటరే..
చివరికి మనకి మనమే మిగిలేది....!!

4, డిసెంబర్ 2013, బుధవారం

మరుజన్మకు చేరువగా...!!

చేజారిన వలపు చెలిమిని 
వదలలేని మనసు తపన
ఊపిరికందని శ్వాసలో చేరి
శిలగా మిగిలిన నా మదిలో
చెరగని చెదరని సజీవ జ్ఞాపకానివై
నిలిచిన నీ కోసం మిగిలున్నా...!!

నీతో పంచుకున్న స్నేహ పారిజాతాలు
ఇంకా గుభాళిస్తూనే ఉన్నాయి నా చుట్టూ
దూరమైన నీ సాంగత్యం మరువలేకున్నా
చేరువ కాని నీతోనే ఉండాలనుకుంటున్నా
నిరంతరం నీతోనే నా పయనం సాగనీ
ఇలా మరుజన్మకు చేరువగా...!!

2, డిసెంబర్ 2013, సోమవారం

ద్వితీయ బహుమతి....!!


మన తెలుగు మన సంస్కృతి's photo.మన తెలుగు మన సంస్కృతి చిత్ర కవిత -11 పోటీ విజేతలు
న్యాయ నిర్ణేత: అర్ వి ఎస్ ఎస్ శ్రీనివాస్ గారు

న్యాయ నిర్ణేత మాటలు:

హిమాలయాల అందాలు వర్ణించిన ఈ కవిత
ద్వితీయ బహుమతికి అర్హమైనదిగా నిలిచింది.
కవితలో అంత్యప్రాస వాడిన విధానం చదువరులను ఆకట్టుకుంటుంది.
హిమాలయాలను వర్ణించే సొగసైన పదాలు వాటితో బాటు ఆధ్యాత్మికతను
ఆఖర్లో చేర్చి మన సంస్కృతికి కూడా మూలమని చెప్పారు.
భాష మీద పట్టు కనబడుతోంది.
రచయిత /రచయిత్రి కి అభినందనలు.

ద్వితీయ బహుమతి పొందిన కవిత.

హిమ వర్ణాలు మంచు పూల పానుపులు
హిమపాతాల సొగసుల సౌందర్యాల గనులు
తాకే మలయ సమీరాలు మధుర సంతకాలు
వణికించినా వాడని వీడని విడదీయలేని బంధాలు
ఆకాశ హార్మ్యాలు అందమైన అందాలు ఈ ధవళ సానువులు
నీలి గగనాన శ్వేత పానుపుల పాలపుంతలు
వెండి మెరుపుల కాంతుల కమనీయ కావ్యాలు
ప్రాచీన సంస్కృతీ ఆధ్యాత్మికతల ఆలవాలం
పరమేశ్వరుని భూకైలాస గిరుల సిరులు
అంబరాన్నంటే ఆనంద తాండవ స్వరూపం
హిమగిరుల హొయల నుడికారం నయనానందకరం..!!

నీ రాకతో....!!

స్వరాల జతలు జత కలువలేదు
పద లయల సవ్వడులు వినిపించలేదు
ఎక్కడో జారిపోయిన మువ్వల మాటలు
హంసధ్వనిలా అనిపించాయేమో....!!

స్వర రాగాలు సప్త స్వర నాదాలుగా
వినిపించిన మనో వీచిక అల్లరి
చక్రవాకాల గమకాల శృతిలో
ఇంకా నను తాకుతూనే ఉన్నట్టుంది...!!

ఆరోహణావరోహణాల మధ్యమంలో
గాంధారంలా గంభీరంగా అనిపించినా
హిందోళంలో హిమపాతాల చల్లదనం
ఆనందభైరవి అంచులను అందుకున్న ఆనందమో...!!

సావేరి జతుల గతుల అరుణోదయం
వర్ణ రాగాల వక్ర రాగాల విషాదాంత్య రాగాల
విరచిత కవనం ఈ జీవిత రాగం మేళవించిన
మోహన రాగం నీ పరిచయ స్నేహ రాగం...!!

సప్త వర్ణాల సప్త స్వరాల ఆటల అలల
ఊహల కలల రేఖా చిత్రం నా మనో గవాక్షాన
అంబరాన్ని కాన్వాసుగా మేఘాల రంగుల్లో
మెరిసిన అలజడి మేఘన రాగమైనదేమో...నీ రాకతో....!!

30, నవంబర్ 2013, శనివారం

అక్షరాన్ని అమ్ముకుంటున్నానా...!!


ఆయుధంగా మలచుకున్నా
ఆశయాన్ని పంచుకున్నా
అనుబంధాన్ని పెంచుకున్నా....!!

మనసుతో మాటాడి చెప్పిన భావన
ఆకృతి సంతరించుకున్న స్పందన
చూసుకున్న ఆ క్షణం అనిపించిన నిజం....!!

ఓ అక్షర సత్యమా నాలో ఉన్న నిన్ను
దాచుకున్నా పదిలంగా... అందుకే నిన్ను
అమ్ముకోలేదు...నమ్ముకున్నాను అని...!!

బాధ్యతల ఒరవడిలో అమ్ముకున్నా నిన్ను
బంధమైన నిన్ను బాసటగా చేసుకున్నా
పెంచుకున్న చెలిమిని తెంచుకోలేకున్నా....!!

వృత్తిలో అమ్మకానికి ప్రవృత్తిలో ఇష్టానికి
మనసుకి మనిషికి మధ్య సంఘర్షణలో
తప్పని జీవిత పయనానికి వారధిగా చేసుకున్నా...!!

అమ్మలా క్షమించే హృదయ వైశాల్యం నీది
మన్నించమని మనస్పుర్తిగా వేడుకుంటూ
నమ్ముకున్న అక్షరాణికి వందనం...!!

ఓట్ల కోసం యాత్రలు...!!

జనాలు ప్రకృతి ప్రళయానికి, విలయానికి, విధ్వంసానికి గురైతే సానుభూతి పర్యటనలు, ఓదార్పు యాత్రలు కూడు
పెట్టవు...గుడ్డ నివ్వవు...పోయిన పంటను తెచ్చి ఇవ్వవు...ఎందుకీ పనికి రాని పాద యాత్రలు...ప్రచార సాధనంగా మార్చుకున్న ఈ పధకాలు ఎవరి కోసం..?? చేతనైతే సాయ చేయండి అంతే కాని ఓట్ల కోసం నోట్ల యాత్రలు వద్దు..!!సాయం చేసే మంచి మనసు మీకు ఉంటె మీకు ఉన్న సొమ్ములో కాస్తయినా ప్రజా ప్రయోజనాల కోసం వెచ్చించండి అంతే కాని నా హయాంలో  చేయలేదు...ఇది అసమర్ధ ప్రభుత్వం... చేతగాని నాయకులు అంటూ మాటలు  మాత్రాన ప్రజల కష్టాలు తీరతాయా...!! లేక మీ మాటలకు భయపడి ప్రభుత్వం కోట్లు గుమ్మరిస్తుందా సాయం కోసం...!! విపత్తులు వస్తు ఉంటాయి.. పోతూ ఉంటాయి...దానికి పాలనకు ముడి పెట్టి ఏం సాధించలేము...ఎన్ని మాటలు చెప్పారు ఒక్కరైనా విభజన ఆప గలుగుతున్నారా..!! మా చేతులు దాటి పోయిందని కేంద్ర మంత్రులు, పార్లమెంట్ సభ్యులు ఎప్పుడో చేతులెత్తేసి అమ్మగారి వి'భజన' మంత్రాన్ని బలపరుస్తున్నారు...పాకేజిలంటూ జనాన్ని మభ్య పెడుతూ...!! నష్ట పోయింది ఇరు ప్రాంత ప్రజలు..అంతే కాని నాయకులు కాదు...!! ఆట మొదలు పట్టిన అమ్మగారు ఎలా ముగిస్తారో ఎదురు చూడటమే మనం చేయగలిగిన పని...!! కనీసం ఇప్పటికయినా నాయకులను నమ్మడం మాని మన పని మనం చేసుకు పోవడమే మనకు ముందున్న దారి...!! ప్రకృతి వైపరీత్యాలకు కనీస సాయాన్ని కూడా చేయని చేయలేని నాయకులను అందలాలు ఎక్కించకుండా ఇకనయినా మన ఓటుకు న్యాయం చేద్దాం..!!

ఆనంద కావ్యాలు....!!

మాటలు అక్కర్లేని పరిచయాలు 
మనసులు మౌనాలైన తరుణాలు 
దారులు వేరైన కలవని గమ్యాలు 
గతులు గల్లంతైన రహదారులు
తడబడిన అడుగులనడకలు
గతం దాచిన గురుతులు
చెలిమి చెప్పిన సంగతులు
తలపుల తలుపులు తెరచుకున్న క్షణాలు
జ్ఞాపకాలు మిగిలిన జీవితాలు
మరు జన్మ కోసం ఎదురు చూపులు
ఊహల వాకిళ్ళు తెరచుకున్న తలుపులు
ఎదురుచుపుల జన్మ జన్మాల అనుబంధాలు
కలసి జతగా మెదిలే మధుర వసంతాలు
అందమైన అనుభూతుల ఆనంద కావ్యాలు
చిగురించిన ఆశల మెరపుల అక్షర లక్షలు
అందించిన చేతుల ఆత్మీయతల అనురాగాలు
అన్ని కలసిన వదలిపోలేని బంధుత్వాలు
అన్ని రుచుల సమ్మేళనం అద్భుతమైన ఈ జీవితాలు...!!

27, నవంబర్ 2013, బుధవారం

కారం వ్యాధి...!!

చక్కెర వ్యాధిలా కారం వ్యాధి బాధితులు ఎవరైనా ఉన్నారా....!! అసలు ఈ కారం వ్యాధి గురించి ఎప్పుడైనా విన్నారా...!! కొత్తగా ఉంది కదూ వినడానికి...కాని నిజమేనండి ఇలాంటివ్యాది కూడా ఒకటి ఉంది....దానికి సాక్ష్యం నేనే...!! తమలపాకులో అదేనండి కిళ్ళి(పాన్) లో సున్నం ఎక్కువైతే నోరు ఎలా పోక్కిపోతుందో కారం తగిలితే నోరు అలా అవుతుంది...కారణం తెలియలేదు కాని గత కొన్ని సంవత్సరాలుగా ఈ కారం వ్యాధికి భాదితురాలిని..అలా అని తినడం మానేయలేదు లెండి చక్కగా ఆరోగ్యకరమైన ఆహారాన్ని తింటున్నా...అదే అండి ఉప్పుతో మాత్రమే కూరలు అన్న మాట...చూసారా ఒక్కోసారి రోగం కూడా మన మంచికే అన్నట్టు...ఎప్పుడో చెప్పినట్టు ఏది జరిగినా మన మంచికే అని ఈ ఋజువు కూడా బావుంది కదూ...!!

అమృతమూర్తి...!!

మువ్వలా ముడుచుకున్న ముగ్ధత్వం
గువ్వలా గూడు చెదిరి బిక్కుమంటోంది...!!
గుబులైన గుండె గొంతు మూగబోయింది
గునపాలై గుచ్చుతున్న చూపుల శరాలను తట్టుకోలేక..!!
మెత్తనైన సున్నితత్వం దారి మరచిపోయి
కఠిన పాషానమైన హృదయాల్లో కరిగి పోయింది...!!
చివ్వున ఉబికిన కన్నీటి చెలమ నిండుతూనే ఉంది
ఆగని రుధిరాన్ని నిలువరించే జాడ లేక...!!
మనసు దాటని మౌనం పెదవి విప్పలేక పోతోంది
కనిపించని గాయాలను చూపించే ధైర్యం లేక....!!
పురుటి నెప్పుల ప్రసవ వేదన వినిపిస్తూనే ఉంది
చూడలేని ఆ వేదన మోదానికి సాక్ష్యం ఎక్కడిది...??
కారణం నువ్వని తెలిసినా ఒప్పుకోలేని అహం నీది
మరో ఊపిరికి రూపానిచ్చే  క్రమంలో....
కష్టాన్ని ఇష్టంగా భరిస్తూ ప్రాణాన్ని ఫణంగా పెట్టే
అసమాన అమృతమూర్తి మాతృ మూర్తి ...!!

26, నవంబర్ 2013, మంగళవారం

మనసులో మనం... మనలో మనసు....!!

మనసొక మధుకలశం పగిలే వరకే అది నిత్య సుందరం....ఈ పాటలోని మాటలు, భావం ఎంత నిజం...!! కొన్ని పాటలు
వింటుంటే అనిపిస్తుంది...ఇంత బాగా ఎలా రాస్తారా అని...!! మన మనసు మనం ఏది దానికి ఇస్తే అది తీసుకుంటుంది... మనలోని తనలో దాచుకుంటుంది...పాపం మనం ఏది ఇచ్చినా వద్దు అనకుండా పుచ్చేసుకునేది మన మనసు ఒక్కటేనేమో ఈ ప్రపంచంలో...!! ఒక్కోసారి ఎదురు తిరిగినా మనం దాని నోరు నొక్కేసి మన ఇష్టం వచ్చ్సినట్టే దానిని ఉండమని చెప్పేస్తాం...వినక చస్తుందా మరి..!! మనం మన మనసుకు మాత్రమే నియంతలం కదా...!! అందుకే దాన్ని మాత్రమే మన మాట వినేటట్లు చేసుకుంటాం..ఒకవేళ అది వినక పోయినా మనం పట్టించుకోము...అచ్చు మనని మన వాళ్ళు పట్టించుకోనట్లే...-:).
మనసు నిజంగా మధుకలశమే..!! కాకపొతే దానిలో మనం కాని మన చుట్టూ మనం అల్లుకున్న లేదా పెంచుకున్న బంధాలు అనుబంధాలు వెదజల్లే పరిమళాల అనుభూతుల మీద ఆధారపడి ఆ సున్నితత్వం ఉంటుంది...నిన్ను నీకు చూపించే నీ మనసు అద్దంలో అన్ని నిజాలు స్పష్టంగా కనిపిస్తాయి...ఒప్పుకునే మంచి మనసే నీది కావాలి మరి..!! ఎవరికీ తెలిసినా తెలియక పోయినా నీ మనసుకు నువ్వేంటో తెలుసు...అది ఏం చెప్తుందో నీకు తెలుసు...!! అందుకే నిన్ను నీకు చూపించే నీ నిజమైన నేస్తాన్ని నిర్లక్ష్యం చేయక నీ మాటే నీది కాకుండా ఓసారి అది చెప్పేది కూడా వింటే పోయేదేం ఉంది.. మహా అయితే అది చెప్పే మంచి నీకు నచ్చుతుంది అంతే కదా...!! లేదా ఎలానూ దాన్ని నోరు మూసుకుని ఓ పక్కన పడి ఉండమని చెప్పే అధికారం ఉండనే ఉందాయే...!!
చూసారా...మనలోని మన మనసుతోనే మనం ఎన్ని ఆటలు ఆడుకుంటున్నామో...!! పగలని అద్దం లో కనిపించేది ఒక రూపమే...అదే ముక్కలైన అద్దంలో లెక్కకు రాని రూపాల్లానే...ముక్కలైన మనసు అద్దంలో లెక్కకు దొరకని ఆలోచనా సంద్రాలెన్నో..!! మెలి తిప్పే మనసు సుడిగుండాలెన్నో...!!  ఈనాటి మన అతుకుల అవసరపు బతుకుల్లానే మనసు ముక్కలు దాచేసుకుని ఓ రకంగా చెప్పాలంటే మనసనేది ఉందని మరిచి పోయి అవసరం కోసమో...భాద్యతల బంధాల కోసమో...సమాజంలో మనకంటూ ఓ గుర్తింపు కోసమో...బతికేస్తూ...నలుగురితో పాటు మనతో మనం కూడా నటించేస్తూ జీవిత నాటకాన్ని దిగ్విజంగా వెళ్ళదీసేస్తున్నాం...కాదంటారా...!! 

25, నవంబర్ 2013, సోమవారం

ఇష్టమైన ఇష్టం...!!

ప్రేమ ఒక యోగమో...!! భోగమో..!! నాకు తెలియదు కాని ఇష్టం మాత్రమే తెలిసిన మనసుకు ఇష్టపడటం ఒక్కటే తెలుసు...!! ఇష్టం ఇష్టమైనన్ని రకాలు .... ఇష్టాన్ని ఇష్టంగా ఇష్టపడి చూస్తే ఆ ఇష్టంలో అన్ని ప్రేమలు, ఇష్టాలు ఉంటాయి...!! ముందు మనని మనం ఇష్టపడగలిగితే తరువాత ఆ ఇష్టాన్ని అందరికి పంచగలుగుతాము.. పెంచుకోగలుగుతాము...!! నిన్ను నువ్వే ఇష్టపడలేనప్పుడు మరొకరిని ఎలా ఇష్టపడగలవు..?? ముందు మనలోని మనని మనం ఇష్టపడాలి...అప్పుడే అ ఇష్టం లోని ఇష్టం తెలుస్తుంది...!! నాకు నేను ఇష్టం అయినప్పుడు నాలోని లోపాలతో సహా నేను నాకు ఇష్టం అనే కదా...!!  మరి అలాంటప్పుడు ఎదుటివారిని కూడా అలానే ఇష్టపడాలి...ఒకరిని ఇష్టపడినప్పుడు వారిలోని తప్పొప్పులను రెంటిని ఇష్టపడినట్లే....అంతే కాని మనకు నచ్చని వాటిని వదిలేసినట్లు కాదు...!! లోపాలు, కోపాలు, అలకలు, ఆనందాలు, సర్దుబాట్లు, దిద్దుబాట్లు....ఇలా అన్ని కలిస్తేనే జీవితం సంపూర్ణం...లేకపొతే సగం చదివిన పుస్తకంలా అసంపూర్ణంగా ఉంటుంది...!! ఎవరికీ అక్కరలేని పుస్తకంలా ఓ మూలన పడి ఉంటుంది...!! మనతో మనం నిజాయితీగా ఉంటే అదే మనని అందరికి దగ్గర చేస్తుంది....నటిస్తే నాలుగు రోజులు తప్పుకోగలం... జీవితమంతా నటిస్తూ తప్పుకు తిరగలేము కదా...!! వాస్తవాలను వాస్తవంగా స్వీకరిస్తూ వాస్తవంలో బతకగలగాలి...!! తప్పులు అందరు చేస్తారు..కాని ఆ తప్పుని ఒప్పుకోగలిగే ధైర్యం మనలో ఎందరికుంది..?? ఇది తెలుసుకుంటే చాలు జీవితం సప్త వర్ణాల సాగర గీతమే అవుతుంది ప్రతి ఒక్కరికి...!!  

23, నవంబర్ 2013, శనివారం

పల్లె మనసు వాకిళ్ళు..!!

వేవేల వర్ణాలు ఊరించే వైనాలు
ఊహల్లో రూపాలు కన్నుల్లో దీపాలు
మనస్సుల్లో మౌనాలు మాటల్లో మొహాలు
రేయంతా రాగాలు చుక్కల్తో అచ్చట్లు
చూపుల్తో ముచ్చట్లు చేతుల్తో చప్పట్లు
కోపాల తాపాలు మమతానుబంధాలు
విడలేని పాశాలు చుట్టేసిన చుట్టరికాలు
కలబోసిన కలల కవ్వింతల వాకిళ్ళు
వరుసలు కలిపిన సరసపు సైయ్యాటలు
పక్కున నవ్విన పంచదార చిలకలు
పసిడి కాంతుల పండు వెన్నెలలు
మెత్తని తీరపు అలల ఇసుక తిన్నెలు
పచ్చని పట్టుపరుపుల పైరుల పలకరింపులు
మత్తెక్కించే గుభాళింపుల గంధాల మైమరపులు
ఆరుబయట అందాల రంగవల్లుల అల్లికలు 
ఛిరునవ్వుల తోరణాల చినుకుల అలంకారాలు
అన్ని కలిపి కనిపించిన అచ్చ తెనుగు లోగిళ్ళు
అపరంజి కావ్యాలు మా పల్లెల మనసుల వాకిళ్ళు..!!

21, నవంబర్ 2013, గురువారం

నాకు నేను చెప్పుకున్న కధ.....!!

విధి రాతకు ఎదురు నిలిచి మార్చుకున్న తలరాత వెక్కిరిస్తోంది...అప్పటి వరకు ఏ చీకు చింతా లేని జీవితం ఒక్కసారిగా మారిపోయింది....నా వాళ్ళెవరు నన్ను పట్టించుకోవడం లేదు అన్న మాటతో ఓ మోసగత్తెను నమ్మి తన కోసం జాలిపడి ముక్కు మొహం తెలియని పెద్దగా పరిచయం లేని ఓ అబద్దపు జీవికి జీవితాన్ని ఫణంగా పెడితే....చివరికి మిగిలింది మోసపోయిన జీవితంలో ఊసరవెల్లుల కోలుకోలేని దెబ్బలు, మనసు రోదన మనిషి వేదన...!!  ఏళ్ళు గడిచినా మారని మనస్తత్వం...దాని మాటున దాగిన నయ వంచన...!! ఎవరు నమ్మలేని నిజం ఇది..!!
పెళ్ళితో జీవితం మారిపోతుంది అని పెద్దలు అటు ఏడూ తరాలు ఇటు ఏడూ తరాలు చూసి చేసే వారంట ఒకప్పుడు..కనీసం ఇప్పుడు ఆ కుటుంబం గురించి కాస్త తెలుసుకుని చేసుకుంటే కొంతయినా రాతలు బావుంటాయేమో...అనిపిస్తుంది...పెరిగిన వాతావరణం, పరిస్థితులు, చుట్టూ ఉన్న స్నేహాలు...ఇలా అన్ని అల్లోచించాలి కాస్తయినా...చేతులు కాలాక ఆకులు పట్టుకుని ప్రయోజనం ఏంటి అనుకుంటున్నారా...చాలా మందికి చేతుల కాలకుండా ఉండటానికే ఈ ప్రయత్నం...!!
పెళ్ళి  ముందు రోజు నుంచే ఎందుకో కాస్త భయం మొదలు అది అలా పెరుగుతూనే వచ్చింది ఇప్పటికి..అందరిలా అన్ని ఆలోచనలు ఉండి అందరిలానే ఉంటే నా జీవితం కూడా బావుండేదేమో...!! అసలు కోరికలు లేక పోవడం కూడా ఒక తప్పేనేమో...నా జీవితం ఇలా ఉండాలి అలా ఉండాలి అని అనుకోని జీవితం ఇలానే ఉంటుందేమో...!! ఏ రోజు ఇది కావాలి అని అడగని, వాళ్ళింట్లో అది ఉంది మనకి లేదు...ఇలా ఏం అడగకుండా ప్రతి నెత్తుటి బొట్టు నీకు, నీ వాళ్ళకు ధార పోస్తే ఇన్నేళ్ళ ఈ జీవితానికి నువ్వు మిగిల్చింది...కన్నీళ్ళు కస్టాలు...పదిమందికి చెప్పే నీతులు మన జీవితానికి సరిపోవు...ముసుగు తీస్తే నువ్వేంటో అందరికి తెలుస్తుంది...నీ గుండెల మీద చేయి వేసుకుని చెప్పు ఇన్నేళ్ళలో ఒక్కటి మాకోసం చేసానని..!! ఏ బంధమూ నీకు అక్కరలేదు...నీ వాళ్ళకు అవసరం లేదు...మీకల్లా కావాల్సింది ధన సంబంధమే...దానికోసం ఎంతకైనా తెగిస్తారు...మీ అవసరం కోసం పెళ్ళాం పిల్లల్ని తాకట్టు పెట్టడానికి కూడా వెనుకాడరు...డబ్బు కోసం అమ్మానాన్నలనే విడదీయడానికి వెనుకాడని రక్త సంబంధాలు మీవి...ఆ బంధాలకు శత కోటి వందనాలు...!! ఎవరైనా మనకి సంతోషం లేక పోయినా పిల్లల ముఖాల్లో ఆనందాన్ని చూసి తరిద్దాం అనుకుంటారు...జనం దగ్గర నటించే నీకు పిల్లల ఆనందం ఎలా తెలుస్తుంది....?? నాకే కాదు వాళ్ళకు ఏ సంతోషాన్ని మిగల్చని నువ్వు...ఈ విలువ లేని వలువలు లేని జీవితం మాకు వద్దు..ఇకనైనా ఈ బతికినా నాలుగు రోజులు ప్రశాంతంగా బతకనివ్వు....నువ్వు మారవద్దు...నేను చేసిన తప్పుకి నా జీవితాన్ని దానిలోని ప్రతి చిన్న ఆనందాన్ని కోల్పోయాను...నమ్మిన నమ్మకానికి మీ బంధాలు అనుబంధాలు ఇచ్చిన బహుమతి చితి మీద కాలుతున్న నా మనసు కూడా గుర్తుగానే మిగుల్చుకుంటుంది..!! మోసపోయిన బతుకుని తలచుకుంటూ...!!

20, నవంబర్ 2013, బుధవారం

అలసిన ఓ జీవితం..!!

గల గలా సాగే జలపాతపు సరిగమలలో
నీ మాటల మంత్రాల మౌన తరంగాలలో  
హోయలొలికే వంపు సొంపుల నయగారాలలో
నీ నడకల నాట్య విన్యాసాలే ప్రతి కదలికలో 
పరుగుల ఉరకల ఎత్తు పల్లాల హడావిడిలో
అలుపు సొలుపు లేని ఆత్మ విశ్వాసంలో
వేవేల వర్ణాల వడ్డింపుల కూర్పులలో
అలా అలా సాగే అందమైన పయనంలో 
హాలహలాల కాలకూట అంతర్మధనంలో 
అందిన అమృత భాండం సాగర మధనంలో
చేజారిన జీవితాన్ని చూసుకుంటూ
ఆంతర్యంలో అంతరాన్ని అర్ధం చేసుకునే క్రమంలో
అలసిన ఓ జీవితం..!!

19, నవంబర్ 2013, మంగళవారం

ఎలా చెప్పి నమ్మించను...!!

నీకు నాకు మధ్య సాక్ష్యాలను ఎలా పిలువను....!!

అప్పుడెప్పుడో ఓ రాక వదలి వెళ్ళింది
అది నీ గురుతుగా నాకు చేరువగా
దాచుకున్నా....దాన్నెలా చూపించను...!!

సుక్కల్లే తోచి ఎన్నెల్లే కాచి
ఏడ దాగున్నావే...ఇన్ని ఏల సుక్కల్లో
యాడ నిన్ను ఎతికేది....ఎదలోని నిన్ను...!!

నన్ను నేను ఎప్పుడో పోగొట్టుకున్నా
అది తెలియక వెదుకుతూనే ఉన్నా ఇప్పటికి
నీ దగ్గరే ఉండిపోయానని తెలిపే సాక్ష్యం నా దగ్గర లేక...!!

ఏతమేసి తోడినా ఎండని ఏరు
పొగిలి పొగిలి ఏడ్చినా నిండని పొంత
ఎండిన నా మనసు... చెమ్మ లేని జీవాన్ని మిగిల్చిన కళ్ళు....!!

ఇవి చాలవా నీకు....ఇప్పటికైనా నమ్మవా...
నా జ్ఞాపకాలన్నీ నీతోనే ఉండిపోయాయని..నను వీడి వెళిపోయాయని
నీకు తెలిసిన ఈ అక్షరాలు నమ్మించడం లేదా...!!

సాక్ష్యాలుగా చూడటానికి..సమాధానాలుగా సరి పోవా...!! 

పుట్టినరోజు శుభాకాంక్షలు....!!

నాకు అత్యంత ఆప్తురాలు అతి తక్కువ కాలంలో అనుబంధమై పెనవేసుకున్న నా ప్రియ నెచ్చెలి షర్మిలకు హృదయపూర్వక  పుట్టినరోజు శుభాకాంక్షలు....
మేము ఇంజనీరింగ్ చదివేటప్పుడు షర్మిల మాకు సీనియర్...ఫైనల్ ఇయర్ వాళ్ళకి లెక్చరర్ గా వచ్చేది...మేము ఇండ్రస్టియల్ టూర్ కి వెళ్ళినప్పుడు పరిచయం..తనేమో టాపర్ .. నేనేమో ఏదో మామూలు చదువే...!! దూరంగా ఉందామన్నా దగ్గరైన ఆత్మీయత...!! నాలుగు రోజుల పరిచయంలోనే చాలా దగ్గరి అనుబంధంగా మారింది మా పరిచయం...తనది ఎంత అమాయకత్వం అంటే ఈ రోజు మల్లెమొగ్గలు మరుసటి రోజు సాయంత్రానికి కూడా పువ్వులే అనుకునేంత...!! చూడండి నేను చెప్పింది అబద్దమైతే పక్కన ఫోటోలో...!! కనిపిస్తోంది కదూ మీకు ఆ అమాయకత్వం....!!

18, నవంబర్ 2013, సోమవారం

నీ సాక్ష్యం కోసం...!!


మనసు మాటున దాచేసింది
చూడనివ్వని రోదన చిత్రాన్నికనిపించకుండా ...!!
చేసిన గాయపు గురుతులు
మాసిపోని మచ్చలుగా అలాగే మిగిలాయి...!!
కాలం వేసే మందు సరిపోలేదు
గతం గుచ్చిన పచ్చబొట్లకు వాస్తవంగా..!!
మాసిన గాయం జ్ఞాపకంగా మారి
తగులుతూనే గుర్తు చేస్తోంది తన ఉనికిని ...!!
ఏ బంధం నాది కాక పోయినా నాదేనంటూ
అల్లుకున్న అనుబంధాలు తెంచుకోలేని ఆచేతనావస్థ...!!
చేతనలోనికి రాని తనువు పడే తపన
చైతన్యమైన మదిని చిద్రం చేసి చంపేసిన ఘనత నీదే...!!
వీడి పోలేని ప్రాణం కొట్టుమిట్టాడుతూ
వదలలేని పాశాలను పెనవేసుకున్న మమకారం....!!
ఆశ నిరాశల్లో మునుగుతూ తేలుతూ
ఊపిరినిచ్చే ప్రాణవాయువు కోసం ఎదురు చూపుల నిట్టూర్పులు...!!
కాల్చేసిన చితిపై మంటలారినా ఆ గాలిలో
వేడి తగ్గని మనసు సెగల ఆవిరి తగులుతూనే ఉంది వెచ్చగా...!!
జీవితంలో జీవాన్ని మొత్తం పీల్చేసినా
ఇంకా జీవశ్చవం మిగిలే ఉంది నీ సాక్ష్యం కోసం...!!

16, నవంబర్ 2013, శనివారం

విజయం వెనుక...!!

అందరు చెప్తూ ఉంటారు ప్రతివిజయం వెనుక ఎవరో ఒకరు ఉంటారు అని...!! ఇది ఎంత వరకు నిజమంటారు...??
నాకు అనిపిస్తూ ఉంటుంది ప్రతి విజయం వెనుక ఓ పట్టుదల, ఓ కసి, ఓ ఆవేశం, ఓ రోషం .... ఉంటుందని...!! మనం అనుకోగానే అందేది కాదు కదా విజయం అంటే...!! అలా దొరికితే అది విజయం అనిపించుకోదేమో... ప్రతి గెలుపు వెనుక ఎంతో మానసిక ఒత్తిడి, ఎన్నిటినో కోల్పోయిన జీవితం, మరెన్నిటికో మనసుకు సర్ది చెప్పుకున్న క్షణాలు, ఓటమి అంచున నేర్చుకున్న పాఠాలు...ఇలా అన్ని కలిపితే ఓ గెలుపు...నా దృష్టిలో...!!
అంతా సవ్యంగా సాగితే అందరు సాధు జీవులే...అంతా తమ మహిమే అని పొంగిపోతూ తలలు ఆకాశానికి                ( రొమ్ములు విరుచుకుని వస్తాదుల్లా ప్రవర్తిస్తారు ) అంటించుకుంటారు ... అన్ని సరిగా ఉంటే ఎవరైనా మరొకరికి నీతులు చెప్తూ తమ మంచితనాన్ని చాటుకుంటారు...అదే కాస్త చిన్న కష్టం వచ్చినా అమ్మో... ఈ కస్టాలు పగ వాళ్లకి కూడా రాకూడదు...నేను కాబట్టి ఇంత కష్టాన్ని భరించ గలుగుతున్నా అని కొందరు...ఇంత పెద్ద కష్టం ఎవరికీ రాదు నాకే ఎందుకిలా...అని మరికొందరు...ఇలా విభిన్న ఆలోచనలతో ఉంటారు...చీకటి వెలుగు మన దైనందిన జీవితంలో ఉన్నట్టే కష్టం సుఖం కూడా మన వెన్నంటే ఉంటాయి.....ఇక్కడ నాకు మా హింది టీచర్ రత్నకుమారి గారు చెప్పిన ఓ మాట కష్టం లో ఉన్నప్పుడు  గుర్తు చేసుకుంటూ ఉంటాను...." చెడు జరిగింది అని బాధ పడతాము..కానీ ఆ చెడు వెనుక కూడా మనకు ఓ మంచి ఉంటుంది,,," అని..నిజంగా ఇది నిజమండి..!! అలానే మా పిన్ని చెప్పిన ఇంకోమాట కూడా...."  మనకు కష్టం తప్పనప్పుడు దేవుడు దాన్ని మనం తట్టుకోగలిగినప్పుడే పెడతాడు " ..  అని..ఇది నిజమే అనిపిస్తుంది నాకు...!! ఇంకో చక్కని మాట యండమూరి గారు చెప్పింది సమస్య జీవిత కాలం మన జీవిత కాలంతో పోల్చుకుంటే చాలా చిన్నది....అవును కదండీ ఒకే సమస్య మన జీవితమంతా వేధించదు కదా...బోలెడు సమస్యలు వస్తు పోతూ ఉంటాయి....అందుకే ప్రతి సమస్యకు క్రుంగి పోకుండా కాస్త ధైర్యాన్ని కూడగట్టుకుంటే ఏదో ఒక పరిష్కారం దొరకక పోదు...అందుకని విలువైన జీవితాన్ని సాధ్యమైనంత వరకు ఝటిలం చేసుకోకుండా ప్రశాంతంగా జీవించడానికి ప్రయత్నిస్తే చాలు...మన పుట్టుకకు ఓ అర్ధాన్ని చేకూర్చ గలిగితే అదే జీవిత పరమార్ధం అవుతుంది...అంతే కాని ప్రతి చిన్న కష్టానికి నిరాశతో జీవితాన్ని ముగించే ఆలోచన మన దరి చేరనివ్వకూడదు...!! మనం అనుకున్నది జరిగితేనే మనం గెలిచినట్లు కాదు...మన వ్యక్తిత్వంతో, మన ప్రవర్తనతో నలుగురి మనసులు గెలుచుకుంటే చాలు....అది ఓ గొప్ప గెలుపే...!!

15, నవంబర్ 2013, శుక్రవారం

మీలో నింపుకోండి...!!

నిన్న టి వి లో పుత్తడిబొమ్మ సీరియల్ చూస్తుంటే "కష్టంలో ఉన్నప్పుడు ఆ కష్టాన్ని ఎవరికీ చెప్పలేనప్పుడు మనతో మనమే చెప్పుకుంటే బాధ కాస్త తీరుతుంది అని" .. నవ్వు  వచ్చింది నాకు  మొన్న నేను చెప్పుకుంది నీకంటూ ఎవరు మిగలని రోజు..!! లో అదేకదా అనిపించింది. నాలా ఆలోచించేవాళ్ళు కూడా కొందరు ఉంటారేమో అనిపించింది..నా చిన్నప్పటి నుంచి కోపం వచ్చినా, బాధ అనిపించినా అది అక్షరాల్లో పెట్టడం అలవాటై పోయి అదే వ్యాపకంగా కూడా అయ్యింది..ఏదైనా నాకు నేను చెప్పుకోవడమే అలవాటై పోయింది. కాకపొతే ఇప్పటికి మోసపోతూనే ఉన్నామే అని అనిపిస్తూ ఉంటుంది...అవును మరి ఎవరైనా మనం వాళ్ళని నమ్మితేనే కదా సులభంగా మోసం చేయగలరు...మోసం అనేది ఒక్క డబ్బులు అనే కాదు...మనసులను, మనుష్యులను, బంధాలను, అనుబంధాలను, ప్రేమలను, అభిమానాలను,స్నేహాలను....ఇలా మానవ బంధాలను అన్నింటిని మోసం అనే ముసుగులో మాయ చేయవచ్చు..మనలో జాలి అనేది ఉంటే ఇంటా బయటా మోసపోతూనే ఉంటాము...!! ప్రతి ఒక్కరు మంచివాళ్ళే అనుకుంటూ మనం మోసపోతూనే ఉంటాము ఎప్పటికి...కాస్తయినా కఠినంగా ఉండక పొతే...!! నేను అనుకుంటూ ఉంటాను ఈ మోసపోయే జాబితాలో అన్ని రకాలుగా ముందు ఉన్నది నా పేరేనేమో అని...!! కాకపొతే ఒక్కటే అనుకుంటాను నన్ను మోసం చేసిన వాళ్ళు కనీసం ఒక్కసారయినా నా బాధను అనుభవించక పోతారా...!! అని...అలా అనుకోవడం కన్నా ఏం చేయలేను కదా వాళ్ళను...!! కాకపొతే ఒక్కటి చెప్పగలను అందరిని సులువుగా మోసం చేయలేరు అని....మోసపూరిత మనసుతో నటిస్తే ఆ నటన పైవాడి ఖాతాలో జమ అవుతుంది..లెక్కలు వాడే తేలుస్తాడు ఎవరివయినా...!! మనస్సాక్షి అనేది ప్రతి ఒక్కరికి ఉంటుంది...మన తప్పు ఒప్పులు మనకన్నా బాగా దానికి తెలుసు...దానిని నిద్ర పుచ్చకండి జోల పాడి..మనసు మాటలు వింటూ ఉండండి అప్పుడప్పుడు....!! మీకు తెలియని మీలొ మిమ్మల్ని మీకు చూపిస్తుంది...అద్దంలో ప్రతిబింబంలా....అప్పుడు నిజాన్ని ఒప్పుకోగలిగే గుండె ధైర్యాన్ని మీలో నింపుకోండి...!! అప్పుడు మన తప్పులను ఒప్పుకోగలిగే ఆత్మస్థైర్యం మెండుగా ఉండాలి....మనకు బావుందని అబద్దంలో బతకకుండా కష్టమైనా నిజంలో నిజాయితీగా గర్వంగా బతకగలిగితే ఎంత బావుంటుందో ఒక్కసారి ఊహించి చూడండి....నిజమే కదా ఆ ఊహే ఇంత బావుంటే అదే వాస్తవం అయితే ఇంకెంత బావుంటుంది చెప్పండి...!! 

13, నవంబర్ 2013, బుధవారం

నీ కంటూ ఎవరు మిగలని రోజు....!!

అర్ధం లేని సంఘర్షణలో లేక వ్యర్ధం అయిన ఆలోచనలో తెలియని అయోమయం....ఇలా ఎన్నాళ్ళు ఈ అంతం లేని అవసరాల నడుమ యంత్రంలా యాంత్రిక జీవితం...!! నువ్వు గెలిచిన నాడు అందరూ నీ చుట్టాలే...అదే ఓటమి చేరువలో నువ్వున్నప్పుడు పడిపోతున్నావని కూడా పట్టించుకోక పారిపోయిన అన్ని బంధాలు...నీకంటూ మిగలని ఏ చుట్టరికమూ...!! నీకంటూ నిన్ను కూడా మిగుల్చుకోలేని నువ్వు...!!
విజయానికి ఎల్లలు లేని ఆనందం హద్దుగా ఉంటే పతనం చుట్టూ పోగైన పరి పరి కారణాలు...నీ చేతగాని తనాన్ని ఎద్దేవా చేస్తూ నవ్వే లోకం...గెలుపు సింహాసనం మీద ఉన్నప్పుడు గుర్తుకు రాని నీ లోపాలు ఓటమి నీ చెంతనున్నప్పుడు ఆ లోపాలే నిను గుచ్చే శులాలు...శరాఘాతాలై కుళ్ళ బొడుస్తాయి జీవశ్చవమైయ్యే వరకు...!!
ప్రతి ఒక్కరు జీవితపు ఆటలో గెలవాలనే ఆడతారు...కాకపొతే నిజాయితీగా కొందరు...అడ్డ దారిలో మరికొందరు...!!
చేజారిన గెలుపు కోసం తపన, ఎప్పటికైనా అందుకోగలమన్న ధీమా చాలదు గెలుపు శిఖరాన్ని చేరుకోవడానికి... ఎన్నో అడ్డంకులు, అవమానాలు దాటుకుని నిరంతర ప్రయత్నమే సాధించబోయే విజయానికి సాక్ష్యంగా ఉండాలి... ఇంటా బయటా ప్రతికూలత ఉన్నా నిన్ను నువ్వు వదులుకోకు..నీ గమ్యం మార్చుకోకు..నీ అసలైన ఆస్థి ఆత్మ స్థైర్యాన్ని కోల్పోకు...నీకు నువ్వే తోడు నీకెవరులేకున్నా...!! నీకు నువ్వే నేస్తానివి...!! బంధాలు భాధ్యతల నడుమ నలిగినా సడలని సంకల్పం నీది కావాలి...నవ చైతన్యానికి నాంది కావాలి...మొదటి అడుగు నీదే కావాలి...నవ్విన నాప చేను పండును అని నిను చూసి పగలబడిన ఆ నలుగురికి సమాధానం చెప్పగలగాలి...!! మాటలు పడుతూనే ఉంటే అంటూనే ఉంటారు..ఒక్కసారి ఎదురు తిరిగి చూడు...తలలు వంచుతారు...!! ప్రతికూలత ప్రతి ఇంటా ప్రతి జీవితంలోను ఉంటుంది...అయినా అదే సమిధగా చేసుకుని వెలుగుల కాంతులు విరజిమ్మాలి...ఆ వెలుగు తాకిడికి అందరి కళ్ళు తట్టుకోలేక మూసుకు పోవాలి...శులాలు విసిరిన నోళ్ళు మూతబడాలి...రావాలి ఆ రోజు దిగంతాలను దాటుకుంటూ....!!

కాలుతున్న గాయాలకు...!!

ఉరుకుల పరుగుల ఉదయపు ఆరాటం
ఆగని కాలంతోసాగే అంతం లేని పయనం
భానుని తొలి పొద్దు మలి పొద్దు మద్యలో
జరిగే జీవిత చిత్రాలు విచిత్ర విధి రాతలు

నిరంతరం సాగే అంతర్మధన చెలగాటం
అర్ధంలేని ఆవేశాల విపరీత పరిణామం

రెప్పపాటు ఈ జీవితంలో లెక్కకు రాని
రెప్ప మూయలేని క్షణాలు అనునిత్యం

చాటు మాటు సంగతుల సమాహారాలు
బంధాల అనుబంధాల అవసరపు లెక్కలు
మరచిన బాధ్యతల నడుమ కూరుకుపోయిన
హక్కుల కోసం ఆరాటం చేసే ఆర్భాటం

మనిషి గమనాన్ని నిర్దేశించే మనసు
చంచల చపలత్వంలో కొట్టుకు పోతూ
ఎండమావుల తీరాల వెంబడి పరుగిడుతూ
కాలుతున్న గాయాలకు ఒయాసిస్సుల అండ కోసం...!!

11, నవంబర్ 2013, సోమవారం

ఆలోచించుకోండి....!!

మనం మంచివాళ్ళమై పోవడానికి మనతో ఉన్న, మన చుట్టూ ఉన్న వాళ్ళని చెడ్డ వాళ్ళుగా చిత్రీకరించనక్కర లేదు. మనం మనలా ఉంటే చాలు...మంచి అనిపించుకోవడానికి ఈ రోజు నటిస్తే సరిపోతుందా...!! రేపు, ఎల్లుండి...ఇలా ఎన్ని రోజులు నటన జీవితంగా బతికేద్దాం...!! కనీసం మనతో మనమయినా మనసు విప్పి మాటాడుకునేదెప్పుడు ...?? మనకు సంతోషాన్నిచ్చే అబద్దాన్ని స్వీకరించే సహృదయం...బాధను కలిగించే నిజాన్ని ఒప్పుకోవడానికి కూడా అలానే ఉండాలి. మనకు నచ్చిన మాటలు బావున్నాయని, మన తప్పులు ఎత్తి చూపే విమర్శలు బాలేదని అనుకోవడం మనని మనం మోసం చేసుకోవడమే...!! అందరు మనకు నచ్చినట్లే ఉండరు.. అలా అని మనం కూడా అందరికి నచ్చేటట్లు ఉండలేము...మనం మనలానే ఉంటూ ఎదుటి వారిని నొప్పించకుండా ఉంటే చాలు...మనసు లేని మనుష్యుల్లా కాకుండా పెద్ద మనసు లేకపోతె పోయే కనీసం ఉన్న చిన్న మనసునయినా దాయకుండా దానికి  నచ్చినట్లు మనలా ఉందాం...!!
ఇప్పుడు చూడండి అందరి మాటలను నమ్మిన ఆంధ్రులు విడి పోకుండా ఉంచగలరా ఆంధ్ర రాష్ట్రాన్ని..!! ఎవరిని  మోసం చేయడానికి ఈ బందులు, ఉద్యమాలు చేసారు...?? ఇప్పుడు విరమించుకుని చేతులెత్తేసి ప్యాకేజీల కోసం మొరలు ఎత్తి అర్రులు చాస్తున్నారు... బందుల కారణంగానే ఆర్ టి సి చార్జీలు పెంచామని వాళ్ళు చెప్తున్నారు...పంటలకు నష్టాలు వచ్చాయని కూరగాయల ధరలు ఆకాశంలో ఉన్నాయి..ఇక కనపడని కరంటుకు కట్టే బిల్లుల బరువు చెప్పనక్కరలేదు..చేతులెత్తేసిన  ఉద్యమ నాయకులు వీటిలో కనీసం ఒక్కదానికైనా సమాధానం చెప్పగలరా...!! ఎందుకు చేశారు ఉద్యమాలు...?? ఏం సాధించారు..?? జనాన్ని ఇబ్బంది పెట్టి మమ్మల్ని మోసం చేస్తూ మిమ్మల్ని మీరు మోసం చేసుకున్నారు..!!
పోరాట పఠిమ లేని ఏ ఉద్యమాలు ఏం ఒరగబెట్టవు అన్నది జనంలోని మనకు ఇప్పటికయినా అర్ధం అయితే చాలు...మార్పు అనేది మనలో రావాలి...మనతోనే మొదలు కావాలి...అవినీతి పేరుకు పోయింది, డబ్బు చుట్టూనే అందరు అని అనుకోకుండా మనం మారితే అదే ఓ గొప్ప మార్పుకి పునాది అవుతుంది..నాయకులు చెప్పే ఊక దంపుడు ఉపన్యాసాలు విని అవే నిజాలు అనుకోకండి...నిజాలు తెలిసినా మనకెందుకులే అని నిమ్మకు నీరెత్తినట్టు ఉండకుండా కాస్త చైతన్యం చూపండి...రేపు ఓట్ల కోసం మీ గడపకు వఛ్చిన నాయకులకు ఏం సమాధానం చెప్పాలో ఆలోచించుకోండి....!!

9, నవంబర్ 2013, శనివారం

ఆహ్వానించే మనసు కోసం...!!

అదేమిటి నిజం గతంగా మారి
జ్ఞాపకంగా మిగిలి పొయిందేమిటి....??
నిప్పుల కొలిమిలో వేసినా బూడిదగా మారకుండా
నిలువెత్తు సాక్ష్యంగా నిలబడే ఉందేమిటి...??
సింధూరపు రంగు పులుముకుని దరి చేరలేరెవ్వరని
నన్ను చూసి పగలబడి నవ్వుతోందా అన్నట్టుగా అనిపిస్తోందేమిటి...??
మండుతున్న మనసుకు అద్దం పడుతూ
వెలుగుతున్న కుంపటిలో కనిపిస్తున్న నుసి ఎక్కడిది...??
అబద్దాల జాడలు కనిపించకుండా పోయాయనడానికి
నిన్ను దహిస్తున్న ఈ జ్వాలల వేడిమి సరిపోవడంలేదా...??
హిమాగ్ని కాలుతోంది ఆరిపోకుండా కన్నీటికి కరగకుండా
ఆ మంటలు మనసులోని మాలిన్యాన్ని కాల్చే సమిధలుగా మారిపోయాయి...!!
అగ్ని ప్రక్షాళనతో పునీతమైన మది వాకిలి ఎదుట
నిజం నిర్భయంగా నిలబడి ఎదురు చూస్తోంది ఆహ్వానించే మనసు కోసం...!!

7, నవంబర్ 2013, గురువారం

నీ జ్ఞాపకం నాతో...!!

వెంటపడే జ్ఞాపకం
వేధించే జ్ఞాపకం
వెన్నాడే జ్ఞాపకం
మైమరపించే జ్ఞాపకం
మధువొలికించే జ్ఞాపకం
మాసిపోనిది జ్ఞాపకం
మధురమైనది జ్ఞాపకం
మనసు తడిమే జ్ఞాపకం
ఏకాంతానికి సహవాసం జ్ఞాపకం
దూరమైన దగ్గరతనానికి జ్ఞాపకం
చేరువ కాని చెలిమికి జ్ఞాపకం
చెంతన లేని సాన్నిహిత్యానికి జ్ఞాపకం
గతమైన జ్ఞాపకం
ఘనమైన జ్ఞాపకం
నీ జ్ఞాపకం నాతోనే...నీ జ్ఞాపకం...!!

6, నవంబర్ 2013, బుధవారం

వాసంత సమీరాలు...శిశిర వసంతాలు...!!

స్వేచ్చగా పయనించే నా ఆలోచనలకు
అడ్డుగా నువ్వే ఎందుకున్నావు..!!
నా ఆశల విహంగాలు అలుపు లేకుండా
నీ చుట్టూనే తిరుగుతున్నాయి తెలుస్తోందా...!!
నా ఏకాంతాన్ని కూడా నాకు లేకుండా
దూరం చేసి నీతోనే ఉంచేసుకున్నావు ఎందుకు....!!
అర్ధం కాని చిక్కుముడిలా చుట్టేస్తూ
గజిబిజిగా వెన్నాడే నీ సాన్నిహిత్యం మైమరపేంటో...!!
చీకటి రాతిరికి వెన్నెల చీరను చుక్కల అద్దకంతో
చుట్టిన ఆ నింగి పసిడి కాంతులు నీ కన్నుల్లో మెరుపులే....!!
మనసు తలపులు వాకిలి తెరచిన మధుర జ్ఞాపకాలు
వసి వాడని వాసంత సమీరాలు...శిశిర వసంతాలు...!!
మరు జన్మకు పదిలమైన మది నిక్షేపాలు
అనుబంధాల ఆనందపు పరమార్ధాలు ఈ జన్మకు...!!

4, నవంబర్ 2013, సోమవారం

సోదర సోదరీ బంధానికి ప్రత్యేకమైన రోజు ఈ రోజు...!!


సోదర సోదరీ బంధానికి  ప్రత్యేకమైన రోజు ఈ రోజు... దీపావళి మరుసటి రోజున భగినీ హస్తం అని పిలుస్తారు... ఈ రోజున ప్రతి సోదరుడు తన సోదరి ఇంటికి పిలవకుండానే వెళ్ళి పీట వాల్చుకుని కూర్చుని భోజనం చేస్తే చాలా మంచిదని చెప్తారు....ఆడపడుచుకి  తగిన విధంగా  పసుపు కుంకుమ ఇస్తే చాలా మంచిదట. కనుమరుగై పోతున్న బంధాలు అనుబంధాలు కలకాలం నిలిచి ఉండటానికి ఇలాంటి పద్దతులు చక్కగా దోహదపడుతున్నాయి మన సంస్కృతి సంప్రదాయాల్లో....నిజంగా ఇలాంటి మన ఆచారాలు, సంప్రదాయాలు మన పూర్వీకులు మనకు ఇచ్చిన వరం వెలకట్టలేని సంపద....ఇలాంటి ఆచారాలు సంప్రదాయాలు కనుమరుగై పోకుండా కలకాలం మన బంధాలను నిలబెట్టుకుంటూ మానవతా విలువలను కాపాడుకుందాం...మన పూర్వీకులు మనకుచ్చిన వెలకట్టలేని ఈ సంపదకు చేతులెత్తి మొక్కుతూ మన తరువాతి తరాలకు ఈ విలువల బంధాల ఆనందాన్ని పంచుదాం....!!

ఈ రోజు విశేషం హరిసేవ నుంచి సేకరించిన సమాచారం మీ అందరి కోసం ....
కార్తీక శుక్ల విదియ తిథి రోజున ’భగినీ హస్త భోజనం’ అన్న పండుగను
జరుపుకుంటారు.

ఈనాడు యమధర్మరాజుని, చిత్రగుప్తుని పరివారంతో సహా పూజించి తల్లి యమునా
దేవి (నది)ని స్మరించి పూజించాలి.

సూర్యుని బిడ్డలైన యమునానది మరియు యమధర్మరాజు అన్నాచెల్లెళ్ళు. యమునమ్మకి
ఎప్పట్నించో అన్నని ఇంటికి పిలచి సత్కారం చేయాలని కోరిక, యమధర్మరాజుగారు
వేళతప్పక ధర్మం తప్పక పని చేసే వ్యక్తి కాబట్టి తీరిక దొరకక ఆమె కోరిక
చాలానాళ్ళు తీరకుండా ఉంటుంది. అలా యమునమ్మ ఎదురుచూసి ఎదురుచూసి ఉండగా
యమధర్మరాజుగారు యమున ఇంటికి ఒకరోజు సకల పరివార సమేతంగా వచ్చారు ఆరోజు
కార్తీక శుక్ల విదియ. సపరివారంగా వచ్చిన సోదరుని ఆతల్లి చక్కగా ఆదరించి
పూజించి, చిత్రగుప్తాదులతో సహా అందరినీ ఆదరించి ఆమే తన చేత్తో చక్కని వంట
చేసి వడ్డన చేసింది. అందుకు సంతృప్తిని పొందిన యమధర్మరాజు ఆనందంతో ఏదైనా
వరం కోరుకోమనగా. యమునమ్మ ఆనాటి నుండి కార్తీక శుక్ల విదియ నాడు చెల్లెలి
ఇంటికి వెళ్ళి చెల్లెలి చేతి వంట తినే సోదరునికి నరకలోక ప్రాప్తి,
అపమృత్యుదోషం అనేవి లేకుండా ఉండేటట్టు వరమియ్యమని కోరగా, యమధర్మరాజుగారు
ఆమె కోర్కెని విని ఆనందించి సోదరులు సోదరియొక్క సౌమాంగళ్యానికి ఎప్పుడూ
క్షేమం కోరుకోవాలి కాబట్టి ఈనాడు ఏ సోదరి తన ఇంట సోదరునికి తన
చేతివంటకాల్ని వడ్డించి తినిపిస్తుందో ఆమె వైధవ్యాన్ని పొందకుండా
పుణ్యవతిగా, అఖండ దీర్ఘ సౌమాంగళ్యంతో వృద్ధినొందుతుందని వరమిచ్చారు.
అందువలనే ఈ తిథికి యమ ద్వితీయ అని పేరు వచ్చింది.  తరవాత యమునమ్మను
పరివార సమేతంగా తన పురానికి మరునాడు ఆహ్వానించి కానుకాదులిచ్చి, చక్కని
షడ్రసోపేతమైన విందు చేసి సారె పెట్టి పంపాడు.

దీన్నే భాయ్ దూజ్ అనీ, భాత్రు ద్వితీయ అనీ, భాయ్ టీక అనీ ఈశాన్య, ఉత్తర,
పశ్చిమ భారతంలో చేసుకునే పండుగ.

అందువలన అవకాశం లేనివారికెలాగూలేదు, ఉన్నవారందరూ ఈ పండుగను జరుపుకొని,
రక్త సంబంధాలనీ, ఆత్మ సంబంధాలనీ, కుటుంబ బాంధవ్యాలనీ పెంపొందించెదరు గాక.
తరవాత సోదరుడు తన సోదరిని పరివారంతో సహా తన ఇంటికి మరునాడు ఆహ్వానించి
అంతే ఆప్యాయంగా సోదరీమణులను ఆదరించి ఇతోధికంగా కానుకలిచ్చి గౌరవించి
పంపడం ఆచారం ఈ రోజును సోదరీ తృతీయ అని పిలుస్తారు.

(యమ ద్వితీయ కున్న ప్రచారం సోదరీ తృతీయకు లేదెందుకనో)
  హరిసేవ నుంచి సేకరించిన సమాచారం ... వారికి ధన్యవాదాలు  
Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner