ముందు మాట... శస్త్రాలు

 

   అక్షర హారతుల నుండి జ్వలించిన అగ్నికణాలు ఈ  " శస్త్రాలు "

        దైవానికి నివేదనగా అందమైన గంగా హారతులే కాకుండా మనసులను, మనుష్యులను చైతన్యపరిచే కవితాత్మక గీతాలను, దేశభక్తి, విప్లవ గేయాలను రచించి, వాటిని అక్షరాస్త్రాలుగా సాహితీ లోకానికి అందించిన రంగిశెట్టి రమేష్ (గంగాశ్రీ) గారి గేయ కవితా సంపుటి " శస్త్రాలు " కి హృదయపూర్వక అభినందనలు.

        సమాజంలోని పలు అంశాలపై గంగాశ్రీ గారు తమ స్పందనను పాటల రూపంలో అందించారు ఈ పుస్తకంలో. గూడు చెదిరిన గవ్వ గురించి రాసినా, గుండె మంటను అగ్నికణంగా మార్చి అక్షరంగా ప్రయెాగించినా అది చదువరుల మదిని తాకే విధంగా రాయగల నేర్పు వీరి సొంతం. జాతీయతను, దేశభక్తిని అద్భుతంగా చాటిన గీతాలెన్నో ఈ సంపుటిలో చోటు చేసుకున్నాయి. వందేమాతరం గీతం నేటి సామాజిక పరిస్థితులకు అనుగుణంగా రాయబడింది. విప్లవ గీతాలు చదువుతుంటే మనసు ఉరకలెత్తే ఆవేశంతో పరుగులు పెడుతుందనడంలో  సందేహమే లేదు. ప్రస్తుతం ప్రపంచాన్ని అతలాకుతలం చేస్తున్న కరోనా మహమ్మారిపై పలు గీతాలు రచించారు. కరోనాను వదలిపొమ్మని వేడుకోలు గీతాలు రాశారు. పల్లె పదాలతో పల్లె జీవితాలను, రైతుల గోడును కనుల ముందుంచారు. 

        నేను అంటూ తన గురించి చెప్పుకోవడమూ, అంతరంగపు ఆవిష్కరణ,  సేవామూర్తుల గురించి, సాహితీ సౌరభాల గురించి, నవ్యాంధ్ర రచయిత సంఘం గురించి రాసిన కవితా గీతాలు అక్షర పారిజాతాలు. వ్యవస్థలోని లోపాలను, రాజకీయ అసమానతలను ఎత్తిచూపిన గీతాలెన్నో ఈ సంపుటిలో ఉన్నాయి. అలతి పదాలతో అగ్నిజ్వాలలను వెదజల్లిన అక్షరాలివి. ప్రతి గీతమూ ఓ అక్షరశరమై మనసున్న ప్రతి మనిషిని తాకుతుందని ఘంటాపథంగా చెప్పగలను. 

    ఈ శస్త్రాలు గేయ కవితా సంపుటికి నాలుగు మాటలు రాసే అవకాశమిచ్చిన రంగిశెట్టి రమేష్ గారికి మనఃపూర్వక ధన్యవాదాలు..

వీరి నుండి మరిన్ని రచనలు సాహితీ లోకానికి చేరాలని ఆకాంక్షిస్తూ...అభినందనలతో.. 

మంజు యనమదల 

విజయవాడ

గుర్తుకొస్తున్నాయి...

" గురుతులు కావివి..గుండెను తట్టి లేపే జ్ఞాపకాలివి.... "

     " మన ఊరు, మన మట్టి, మన గాలి అలాగే ఉంటాయి. మనమే వస్తుంటాం, పోతుంటాం ".

ఈ మాట చదివిన ఎవరికైనా ఓసారి మనసు భారంగా కాకుండా ఉంటుందా చెప్పండి? మనం ఎంత దూరంగా వెళ్లినా ఏదోక సమయంలో జ్ఞాపకాలు మనసు తలుపు తట్టకుండా ఉండవు. అవి మనకు నచ్చినవైనా సరే. బాధించేవైనా సరే. ఈ భూ ప్రపంచంలో జ్ఞాపకాలు లేని మనుష్యులు అరుదుగా ఉంటారేమెా. అలాంటి వారిని వదిలేస్తే ప్రముఖ పశు వైద్యులు డాక్టర్ డి. ప్రసాద్ గారు రాసిన " గుర్తుకొస్తున్నాయి.." పుస్తకం చదువుతుంటే ఆనాటి తరం నుండి ఈనాటి తరం వరకు ప్రతి ఒక్కరికి ఏదోక పేజిలో తమ జ్ఞాపకాలు గుర్తుకు రాక మానవు అనడంలో ఏమాత్రం అతిశయెాక్తి లేదు. 

    సామాన్య రైతు కుటుంబం నుండి వచ్చి అప్పటి రోజులలోనే మూగజీవాలపై ఉన్న ఆపేక్షతో ప్రజా  వైద్యునిగా కాకుండా పశు వైద్యునిగా అకుంఠిత దీక్షతో తన చదువును కొనసాగించి, ఎన్నో మూగజీవాలకు తన సేవలందించి, వైద్యరంగంలో సరికొత్త మార్పులకు శ్రీకారం చుట్టి, నిజాయితీ విలువను ఆకాశంలో నిలిపి, మానవత్వాన్ని చాటిన డాక్టర్ డి ప్రసాద్ గారు ఎందరికో మార్గదర్శకులు నేడు. 

      " గుర్తుకొస్తున్నాయి...నా జ్ఞాపకాలు " అంటూ తన చిన్ననాటి నుండి ఇప్పటి వరకు జరిగిన ఎన్నో సంఘటనలను మన కనుల ముందు కనిపించేటట్లుగా రాయడమే కాకుండా, దానికి పుస్తక రూపమివ్వడం సంతోషించదగ్గ విషయం. ఎందుకంటే మనకు స్వతంత్రం రాక ముందు నుండి జరిగిన ఎన్నో విషయాలను, తర్వాత తర్వాత వచ్చిన మార్పులను, చేర్పులను, చరిత్రలోని ఎన్నో మనకు తెలియని విషయాలను, ఎందరో మహానుభావులను, వారితో తన అనుభవాలను ఈ పుస్తకంలో పొందుపరిచారు. 

    చిన్నతనంలోనే నాన్న మరణంతో మెుదలైన మెాసాన్ని ఓ పాఠంగా తీసుకున్నారు. ఎన్నో ఇబ్బందులను అధిగమించి తాను నమ్మిన న్యాయాన్ని గెలిపించారు. చిన్నతనంలోని చదువును, నాటకాలను, ఆటలను, పాటలను, ఆనాటి అనుబంధాలను, స్నేహ పరిమళాలను, ఉపాధ్యాయులను, గురువులను, స్పూర్తినందించిన నాయకులను, వారి ఉపన్యాసాలను వివరించడమే కాకుండా తాను సందర్శించిన యూరోపియన్, అమెరికా, కెనడా దేశాలను, అక్కడి విశేషాలను, వింతలను, భిన్న మనస్తత్వాలను చక్కగా అక్షరీకరించారు. 

        తన వృత్తిలో తనకెదురైన సవాళ్ళను ఎదుర్కుంటూ, నలుగురిని కలుపుకుని సమాజానికి, మూగజీవాలకు ఎలా మంచి చేయవచ్చో చేసి చూపించి, నలుగురికి ఆదర్శంగా నిలిచారు. చేసే వృత్తి పట్ల అంకితభావముంటే ఎన్ని అద్భుతాలు చేయవచ్చో మాటల్లో కాకుండా చేతల్లో చూపించారు. వీరి విజయ ప్రస్థానం ఎందరికో మార్గదర్శకం. ఎన్నో వ్యాసాలు రాసిన అనుభవంతో వెలువడుతున్న ఈ " గుర్తుకొస్తున్నాయి...(నా జ్ఞాపకాలు )" అందరి మనసు తలుపులను తప్పక తడుతుందని చెప్తూ....నాకూ నాలుగు మాటలు రాసే అవకాశమిచ్చినందుకు మనఃపూర్వక ధన్యవాదాలు.

అతి కొద్ది పరిచయంతోనే ఆత్మీయబంధమైన బాబాయికి హృదయపూర్వక శుభాకాంక్షలతో.. 

మీ

మంజు