13, డిసెంబర్ 2023, బుధవారం

కాటికి పోయే వయసులో కూడా..!!



నేస్తం, 

         మనుషుల మనస్తత్వాలు రకరకాలు. నేను రోజు మా కుక్కపిల్లని పొద్దున, సాయంత్రం పటమట లంకలో రెండు, మూడు రోడ్లు తిప్పుతుంటాను. సాయంత్రం పూట కింద పెట్టిన ఫోటోలోని రోడ్డు వైపు తీసుకెళ్తాను. ఆ ఇంటికి ఇవతల కరంట్ పోల్ వరకు తీసుకెళుతుంటాను. ఇంతకు ముందు కూడా చాలాసార్లు అక్కడ ఓ అవ్వ ఆమె ఇష్టం వచ్చినట్టు నోరు పారేసుకునేది. కుక్కల్ని రోడ్ల మీద తిప్పకూడదట. ఇంట్లోనే ఉంచుకోవాలట. రేపో మాపో పోయే ఈవిడకేమో పుల్లలు,  పుడకలు ఇలా అన్నీ రోడ్ల మీద పేర్చుకుని ఆక్రమించుకోవడం మంచి పనే. ఆమె బాబు వేసాడు కదా రోడ్డు.

          ఈరోజు సాయంకాలం మా రాజాలుని అటు తీసుకువెళ్ళా. కనీసం ఆ ఇంటి దరిదాపులకు కూడా తీసుకుపోలేదు. గబగబా వచ్చి తిట్ల దండకం మెుదలెట్టింది. ఏదో కుక్క ఆ పుల్లల మీద కరాబు చేసిందట. తెల్లవారు ఝామునే తీసుకువస్తారు లంజాకొడుకులు, వాళ్ళ ఇళ్ళలో కూర్చోబెట్టుకోవచ్చు కదా, అదీ ఇదీ అని ఆమె ఇష్టం వచ్చినట్టు వాగింది. నేను వింటూ మా రాజాలుని తీసుకుని వచ్చేసాను. అప్పుడు ఫోన్ తీసుకు వెళ్ళలేదు. మళ్లీ ఫోన్ తీసుకువెళ్ళాను ఆ మహాతల్లిని అందరికి చూపిద్దామని. ఆవిడ లేదు. పాపం ఆ ముసలాయన రోజూ కూర్చునే ఉంటారు కాని ఏమీ అనరు. ఎవరి కుక్కో అలా చేసిందని అన్ని తిట్లు తిట్టింది, కాని వీధి కుక్కలు బోలెడు ఉంటాయి రోడ్ల మీద. మరి ఆవిడ తిట్టిన తిట్లన్నీ ఆవిడకే తగులుతాయి కదా. వయసులో చాలా పెద్దావిడ. ఆవిడ రోడ్డు వేయలేదు కదా. ఆవిడ ఆక్రమించుకుంటే తప్పులేదు కాని కుక్కలు వాడుకోకూడదట రోడ్డు. కాటికి కాళ్లు చాపుకున్న మనకే ఇంత కాపీనం వుంటే, నిజంగా పుట్టగతులుండవు ఇలాంటి వాళ్ళకి.



11, డిసెంబర్ 2023, సోమవారం

అంతర్వాహిని పుస్తక సమీక్ష..!!


 ఈ రోజుల్లో ఎవరికి వారు తాము బావుంటే చాలు అనుకుంటారు. అలాంటి మానసిక స్థితిని దాటి మన అనుకున్న అందరు బావుండాలన్న సత్ సంకల్పంతో ముఖపుస్తక సమూహాల్లో అత్యంత ప్రాచుర్యాన్ని పొందిన “ తెలుగు సాహితీవనం “ తెలుగు సమూహం ప్రతిష్ఠాత్మకంగా ముద్రించిన కథా సంకలనం “ అంతర్వాహిని “. ఈ సమూహపు నిర్వాహకురాలు శాంతికృష్ణ గారి నిర్విరామ కృషికి నిదర్శనం ఈ సంకలనంలోని కథలు.


ఈ “ అంతర్వాహిని “ కథా సంకలనంలో కథల సంక్షిప్త వివరణ. 

మన సమాజంలో ఆడపిల్ల అనే వివక్షను అందమైన అనుభూతిగా మార్చుకోవడం ఎలానో “ అదే కథ” లో  నవీన్ చంద్ర హోతా చాలా చక్కగా చెప్పారు. 

“ అమ్మ వీలునామా “ కథలో అసలైన వీలునామా మనం చదవవచ్చు. కొడుకులైనా కూతుర్లైనా తల్లితండ్రుల బాధ్యతను సరిగా నిర్వర్తించనప్పుడు, వారి ఆస్తులపై ఎటువంటి హక్కు ఉండదని తెలియజెప్పిన కథ. చాలా గొప్పగా రాసారు వారణాసి భానుమూర్తి. 

“ ఆపద్బాంధవులు” కథ చదివిన తర్వాత నాకు ముందుగా గుర్తు వచ్చింది మాదిరెడ్డి సులోచన గారి “ ఈ దేశం మాకేమిచ్చింది” నవల. ఈ సమాజంలో ప్రతి ఒక్కరు స్వలాభం చూసుకోకుండా, మనమేం చేయగలం మన వంతుగా ఈ సమాజానికి అని ఆలోచిస్తే ఎంత బావుంటుందో డాక్టర్ డి ఎన్ వి రామశర్మ చక్కని సందేశాత్మక కథను అందించారు.

“ ఇకమాతు‌ “ తెలంగాణ మాండలికంలో రాసిన కథ. పెంపుడు జంతువుల మీద ప్రేమను, వదలలేని ఆప్యాయతను అద్భుతంగా రాసారు. ఎవరిని నొప్పించకుండా తన బర్రెను కాపాడుకున్న కథానాయకుని చతురత చాలా బావుంది.

మనం వదిలించుకుందామని ఎంత ప్రయత్నిస్తున్నా మన చుట్టూ ఉన్న సమాజం వదలని సమస్య కులం, మతం, మూఢాచార సంప్రదాయాలు, సినిమా రాజకీయాల గురించి “ ఇచ్చింగ్ “ కథలో చాలా బాగా ప్రస్తావించారు.

కులమతాలు, వరకట్నాల పట్ల మన మూర్ఖత్వం, మన ఆచార, వ్యవహారాలే గొప్పవన్న అహం వలన కలిగిన పరిణామాల గురించి “ ఎవరికి తెలుసు “ కథలో చక్కగా వివరించారు.

కంటేనే కాదు, పెంచినా అమ్మ అమ్మే అంటూ అమ్మతనం గొప్పదనాన్ని అద్ఫుతంగా చెప్పిన కథ “ కల గనలేదు”.

ఎదిగే వయస్సున్న పిల్లలకు తల్లిదండ్రులు చెప్పే జాగ్రత్తలు, వాటి విలువను తెలిపే కథ “ కొత్తగా రెక్కలొచ్చెనా? “

“ కుండెడు నీరు “ కథ చాలామందికి అనుభవమే. మంచి కథ.

జాలి,దయ ఉండే కొందరి మానవత్వం గురించి ఈ “ గూడు విడిచిన గుండె “ కథ. పక్షుల గూడు పడగొట్టలేని మనసున్న మనిషి కథ.

పుట్టింటి ప్రేమానురాగాలకు ఏదీ కొలమానం కాదని చెప్పిన కథ “ గుండె చప్పుళ్ళ “.

తర్కానికి, (మూఢ)నమ్మకానికి మధ్యన ఓ చిన్న మనసు సంఘర్షణను చాలా బాగా చెప్పారు “ పత్రం..పుష్పం..” కథలో.

“ పెళ్లి కూతురు “ కథ కొన్ని వాస్తవ సంఘటనలకు అద్దం పడుతుంది.అందరు తప్పక చదవాల్సిన కథ.

అతుకుల బ్రతుకుల జీవితాల్లో పుట్టినరోజు ప్రేమ కానుక ఎంత ప్రేమను, సంతోషాన్ని పంచుతుందో “ ప్రేమ కానుక “ కథలో మనం చదవవచ్చు.

మధ్య తరగతి జీవితాల్లో సాధారణ బహుమతి అనుకున్నది, ప్రపంచంలోనే అత్యంత విలువైనదిగా ఎలా మారిందో “ బామ్మ బహుమతి “ గురించి మనుమరాలు చెప్పిన కథ.

“ మట్టిబంధం “ ఎంత గట్టిదో తెలియజెప్పిన మనసు బంధం. ఈ కాలంలో మన బాధ్యతలను గుర్తు చేసిన కత.

“ మనుషులు -మెషిన్లు “ కథ యంత్రాల యాంత్రికతను, మనిషి మనుగడను గురించి వివరిస్తూ సహజత్వానికి, కృత్రిమత్వానికి తేడాను తెలుపుతూ, లాభనష్టాల తూకాన్ని తేల్చి చెప్పింది.

కొందరు ఇంటిలో పెద్దవారిని చులకన చేయడం, పిల్లలను గారాబంతో చెడగొడుతున్నారు అన్న అపోహలకు సమాధానమే ఈ “ మబ్బులు వీడిన ఆకాశం “ కథ.

కడుపున కనక పోయినా పెంచిన అమ్మ బుుణం తీర్చుకున్న ఓ కూతురి కథ “ మమతల పాల కడలి “.

చక్కని అనుబంధాల, ఆప్యాయతల సరదా కథ “ లేడిపిల్లలా..”.

అనాగరికులను నాగరికులుగా మార్చితే, మనిషిలోని మృగతత్వాన్ని కూడా ఒంటబట్టించుకున్న రాజకీయానికి ఏ జాతైనా ఒకటేనని తెలియజెప్పిన కథ “ వేట “.

సరదాగా చెప్పినా సర్ ప్రైజులతో, తలమునకలయ్యే పనులతో  సతమతమైన ఓ మనసు కథ “ వేళ కాని వేళ..త్వరపడి..” 

తమ తమ విధి నిర్వహణల నుండి విశ్రాంతి తీసుకున్న వారికి, వారి కుటుంబ సభ్యులకు ఎదురైన సమస్యల నుండి బయటపడే మార్గం చూపిన కథ “ వ్యాపకం “.

దిగువ మధ్యతరగతి బతుకుల్లో అప్పుడప్పుడు వచ్చే అల్ప సంతోషాలు కొబ్బరి పచ్చడి, సైన్సు రికార్డు బొమ్మలు చేతులు మారడాలు, ఇచ్చిపుచ్చుకోవడాలు పిల్లల మధ్యన. ఇలాంటి సంఘటనలను “ సైన్సు రికార్డు అనే చక్కని కథగా మలచడం చాలా బావుంది.

తొందరపాటు నిర్ణయాలు జీవితాన్ని ఎలా మార్చేస్తాయో అని చెప్పడానికి, చిన్న చిన్న కారణాలకు సర్దుకుపోవడంలో ఆనందాన్ని, భార్యాభర్తల మధ్యన అవగాహనను తెలిపే కథ స్టేట్మెంట్.


       “ అంతర్వాహిని “ కథా సంకలనంలోకి ప్రతి కథా మనలో ఎవరో ఒకరికి అనుభవమే. పేరున్న రచయితలు అని కాకుండా ప్రతి ఒక్కరు ఈ కథా సంకలనంలో తమ భాగస్వామ్యాన్ని పంచడం ముదావహం. ప్రతి ఒక్కరికి పేరుపేరునా హృదయపూర్వక అభినందనలు. ఇందరిని ఒక చోట చేర్చి, వారి భావాలను అందంగా పేర్చిన శాంతికృష్ణ గారికి హృదయపూర్వక అభినందనలు.

5, డిసెంబర్ 2023, మంగళవారం

జీవన మంజూష డిసెంబర్ 23


 నేస్తం,

         పంచుకోవడానికో, పెంచుకోవడానికో కాదు బంధాలు. నమ్మకమనే పునాది మీద బంధాలు ఏర్పడతాయి. అంతే కాని బంధాల మధ్యన కాలాన్ని లెక్కలేసుకోవు. మన మధ్యన వున్న బంధంలో అనుబంధం వుందా లేదా అని తరచి చూసుకోవాల్సిన పరిస్థితులు ఇప్పుడు ప్రతి చోటా కనిపిస్తున్నాయి. బంధమేదయినా డబ్బే ప్రధాన పాత్ర పోషిస్తోంది. బ్రతికుండగానే బంధాలను గాలికొదిలేసి, బాధ్యతలను విస్మరించి, మెుక్కుబడిగా ముద్ద పడేస్తున్న నేటి అనుబంధాలు మనవి

         తల్లిదండ్రులయినా పిల్లలను ప్రేమగా, బాధ్యతగానే పెంచుతారు కాని భారమని అనుకోరు. మరి అలాంటప్పుడు అపర వయసులో పెద్దలను ఎంతమంది పిల్లలు ప్రేమగా, బాధ్యతగా చూస్తున్నారిప్పుడు? ఈరోజు మనం ఖర్చు పెట్టేస్తే రేపటి రోజున మన పిల్లలు నలుగురిలో తక్కువగా కనబడతారేమోనని తిని తినకా పిల్లలకు ఆస్తులు కూడబెడితే, ఆస్తుల కోసమే బాధ్యతలు మోస్తున్న బిడ్డలున్న సమాజం మనది. మధ్యతరగతి బతుకులు మధ్యస్థంగా మిగులుతాయని చరిత్ర చెబుతోందిప్పుడు.

           తప్పొప్పులు మానవ జీవితాల్లో సహజం. కాని మన తప్పులకు ఎదుటివారిని బాధ్యులుగా చేయడం సమంజసం కాదు కదా. మన జీవితానికి సంబంధించిన నిర్ణయాలు మనం తీసుకున్నప్పుడు వాటి పర్యవసానాలు కూడా మనమే భరించాలి. అది బాధయినా, సంతోషమయినా మననిర్ణయానికి ఫలితం మాత్రమే. పెంపకాలు, పరిస్థితులు అందరివి ఒకేలా వుండవు. వారి వారి స్థితిగతులను బట్టి, చుట్టూ వున్న మనుష్యులను బట్టి, ఆలోచనలను బట్టి మనిషి ప్రవర్తన వుంటుంది. అదే మనిషి జీవితాన్ని శాసిస్తుంది

             సమస్యలను వద్దనుకుంటే సరిపోదు. వాటిని అధిగమించడం నేర్చుకోవాలి. సమస్య లేని జీవితాలు బహు అరుదు. సమస్యలను తట్టుకుని, సానుకూల దృక్పధంతో ఆలోచించే వారికి జీవితంలో గెలుపు సాధ్యమౌతుంది. ప్రతిక్షణం నిరాశ, నిస్పృహలతో వుండేవారికి జీవితంలో ప్రతిక్షణం భయానకంగానే వుంటుంది. సమస్యకు ఎదురు నిలవడం మెుదలు పెడితే ఎంతటి సమస్యయినా పరిష్కారమౌతుంది. ఆస్తులను మాత్రమే పంచుకుంటున్న మనం అనుబంధాలను కూడా కాసింత అక్కునజేర్చుకునే రోజు ఎప్పుడు వస్తుందో..!!


24, నవంబర్ 2023, శుక్రవారం

శ్రద్ధాంజలి..!!

మరణాన్ని 

జయించిన పుట్టుక

మనదైనప్పుడు


చుట్టుకున్న

గతజన్మ బుుణపాశాన్ని

తెంపినప్పుడు


మనిషిగా

మనుగడ సాగించడానికి

బయల్దేరినప్పుడు


అడ్డుపడుతున్న

అనుబంధాలను నెట్టేస్తూ

అందలాలెక్కుతున్నప్పుడు


స్పురణకు రాకుండా

గతపు ఆనవాళ్ళకు

సమాధి కట్టేసినప్పుడు


మనముగా మనలేని

మన బతుకులకు దాసోహామంటూ 

శ్రద్ధాంజలి ఘటించేద్దాం ఘనంగా..!!



22, నవంబర్ 2023, బుధవారం

అరుదైన క్షణాలు..!!


 నేస్తాలు,

         టైమ్ మెషీన్ మనకు అందుబాటులోనికి వచ్చి దాదాపు ముప్పైఐదేళ్లు వెనక్కి వెళితే ఎలా ఉంటుందన్న ఊహే అద్భుతం కదా. మరి అద్భుతాన్ని ఆస్వాదించడానికి మనకు అవకాశం వస్తే..అందిపుచ్చుకోకుండా ఉండగలమా..! కాకపోతే ఇక్కడ చిన్న మార్పు. అదేంటంటే ప్రస్తుతం మనమున్నట్టుగానే వుంటూ గతానికి వెళ్ళడమన్న మాట. ఎవరెవరికి ఏమేం గుర్తుకొస్తాయన్నది మీ మీ ఆలోచనల్ని బట్టి ఉంటుంది. గతము, జ్ఞాపకాలు లేని మనుష్యులు బహు అరుదు. అరుదైన వారిలో నేను లేను. మరి మీరు ఎవరో మీకే తెలియాలి.

         లేబ్రాయాన్ని వదల్లేమంటూనే కౌమారాన్ని కలుపుకుని, యుక్త వయసులోనికి అడుగులు పడే సమయం అది. అంతా కొత్త కొత్తగా భవిష్యత్తులో ఏదో ఘనంగా సాధించేయాలన్న కోరికలతో ఇంజనీరింగ్ కాలేజ్ లో అడుగు పెట్టిన తొలి క్షణాలు నిజంగా అపురూపమే. స్వేచ్ఛా విహంగాల హంగామా, సీనియర్ల రాగింగ్, పంచుకున్న పచ్చళ్లు, చిరుతిండ్లు, కొత్తగా మెుదలైన స్నేహాలు, అలకలు, కోపాలు, కొట్లాటలు, క్లాసులు ఎగ్గొట్టి చూసిన సినిమాలు, క్లాసుల్లో చేసిన అల్లరి, ఆకతాయితనాలు, ప్రేమలు, పెళ్లిళ్లు అబ్బో ఇలా ఎన్నని జ్ఞాపకాలను తిరిగి తోడగలం చెప్పండి.

           మనం చదువుకున్న బళ్ళారి విజయనగర్ ఇంజనీరింగ్ కాలేజ్ లోనే జ్ఞాపకాలను అందిపుచ్చుకునే అవకాశం 89 బాచ్ కి డిసెంబర్16 వచ్చింది. మరి ఎందరు అరుదైన క్షణాలను అందుకుంటారో..!!

          పెరిగిన పొట్టలు, భారీ కాయాలు, బయట పడిన అరెకరాలు, అమ్మమ్మలు, నాయనమ్మలు, తాతయ్యలు ఇలా గుర్తు పట్టలేని ఆకారాల్లో ఎవరెవరు ఎవరిని గుర్తుపట్టగలరో చూద్దాంఅందరి మేథలకు పరీక్షా కాలం ఆసన్నమౌతోంది…2023 డిసెంబర్ 16.

    “ప్రతి కలయికా  వీడ్కోలుకు అయితే 

    ప్రతి వీడ్కోలు మరో కలయికకు నాంది అవుతుంది.”

అప్పటి మన వీడ్కోలు రాబోయే అరుదైన క్షణాలకు సరికొత్తగా నాంది పలకాలని ఆశిస్తూ




            


15, నవంబర్ 2023, బుధవారం

ఏక్ తారలు

 1.  అక్షరాలు నిశ్శబ్దాన్ని ఆస్వాదిస్తున్నాయట_మాటల యుద్ధానికి విరామమంటూ..!!

2.  వర్తమానంతో పనేముంది_వాస్తవంలో మనమున్నప్పుడు..!!

3.  ఇద్దరి ఆలోచనా ఒకటే_ఏ వైపున ఎవరున్నా..!!

4.  కథలుగా అల్లినప్పుడు కలగనలేదు_కఠోర సత్యమై నిలుస్తావని..!!

5.  అంతరాల అడ్డుదేముంది_ఆంతర్యాలు ఒకటైనప్పుడు..!!

6.  కనులొలికించే భావమెుక్కటే_కలవని తీరాలు తమవైనా..!!

7.  బంధాలకు అడ్డం పడుతోంది_చూడొద్దనుకున్నప్పుడల్లా చూపు మరలక..!!

8.  నిదుర నిండుకుండయ్యింది_రాతిరి కలలకు చోటీయకుండా..!!

9.  కాగితపు పూలకూ సువాసనే_నీ ప(పు)లకరింపులు చేరి..!!

10.  చీకటి చుట్టం_చుక్కల వెలుతురుకు చోటిస్తూ..!!

11.  నీ ముందర అందరు భావుకులే_ఆస్థానం ఎవరిదైనా..!!

12.  అపురూప క్షణాలను అందిపుచ్చుకుంటున్నా_చేజార్చుకోవడానికి మనసు రాక..!!

13.  చదువుతూనే వుంటా_చివరి క్షణాలకు సైతం చిరునవ్వును అద్దుతూ..!!

12.  పునః పరిచయం చేసుకుంటూనే ఉన్నా_మరుజన్మకు మరల వరమిస్తావని..!!

13.   కల్పనలెప్పుడూ కనుల పండుగే_వాస్తవమై ఊరిస్తున్నట్టుగా..!!

14.  కాలం కనికట్టిది_దగ్గరతనాన్ని దూరం చేస్తూ..!!

15.  గురుతే లేదు ఏ కాలమూ_నీతోనున్న ఈ క్షణాలు నావని తలచి..!!

16.  కలత పడ్డ మనసు_కలల విహారంలో విహరిస్తూ..!!

17.  రహస్యమెప్పుడూ బహిరంగమే_విశ్వానికి తెలియకున్నా..!!

18.  అనుబంధం అందని ఆకాశమే_బంధాన్నే కాదనుకున్నప్పుడు..!!

13, నవంబర్ 2023, సోమవారం

ముసుగేసిన ఆకాశం సమీక్ష

                 ముసుగేసిన ఆకాశం

          “ముసుగేసిన ఆకాశంఅంటూ జీవితపు ముసుగుని తొలగించి నిర్మలమైన జీవితాకాశాన్ని తనదైన శైలిలో మన ముందు పరిచిన ముండూరు సాయిలక్ష్మి గారికి హృదయపూర్వక అభినందనలు.

            సగటు మనిషి జీవితం అదీ మహిళైతే జీవితంలో ఎన్ని పార్శ్వాలు ఉంటాయో అన్నింటిని స్వచ్ఛంగా తనకు తెలిసిన, అలవాటున్న భాషలోముసుగేసిన ఆకాశంఅంటూ తన జీవితంలో ఇప్పటి వరకు జరిగిన సంఘటనలను పుస్తకంగా తీసుకువచ్చారు. పూర్వుల వివరాల నుండి తరాల సంగతులు, ఆచార, వ్యవహారాలు, చదువులు, సంప్రదాయాలు, ఉమ్మడి కుటుంబాల ఆనందాలు, అనుబంధాలు ఇలా ప్రతి విషయాన్ని చక్కగా వివరించారు. తన చిన్ననాటి నేస్తాలను, అల్లరి,ఆకతాయితనాన్ని, తన మెుండి ధైర్యాన్ని, తను పాటించిన జీవితపు విలువలను, తప్పుని సహించలేనితనాన్ని ఇలా ఒకటేమిటి..అన్నింటిని అరమరికలు, హంగులు, రంగులు లేకుండా స్వచ్ఛమైన మనసుని అక్షరాల్లో ఒదిగారు. అందుకేనేమో చదవడం ఆలశ్యమౌతుందని చెప్పి కూడా మెుత్తం చదివేటట్లు చేసారు. తన సాహితీ ప్రయాణాన్ని వివరిస్తూ కొన్ని కవితలను కూడా పుస్తకంలో అందించారు. చక్కని ప్రయత్నానికి హృదయపూర్వక అభినందనలు..


Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner