30, మార్చి 2013, శనివారం

జీవితాన్ని కోల్పోకండి....!!

వివాహ బంధాన్ని పంచుకునే ముందు అటు ఏడు తరాలు ఇటు ఏడు తరాలు చూడాలని మన పెద్దల ఉవాచ. సరిజోడి కాకపోయినా పర్వాలేదు కాని సరిపెట్టుకునే మనసు ఉంటె చాలు. అర్ధం చేసుకోలేక పోయినా పర్లేదు అగాధాన్ని పెంచకుండా ఉంటే అదే పదివేలు( ఇప్పుడు పది లక్షలు అనాలి కాబోలు). అప్పటిలా ఏడు తరాలు చూడలేక పోయినా కనీసం వాళ్ళు పెరిగిన పరిస్థితులు, వాళ్ళకు ఇంట్లో వాళ్ళతో ఉన్న అనుబంధం, బాధ్యతలు అయినా చూసుకుంటే కాస్తయినా బావుంటుంది. అమ్మానాన్నలతో ఉన్నప్పుడు అంతా బానే ఉంటుంది అబ్బాయికయినా అమ్మాయికయినా. మనసుకు తగిన మనిషి దొరకనప్పుడే జీవితం విలువ ఏంటో తెలుస్తుంది....!! మనం ఏం కోల్పోయామో అర్ధం అవుతుంది....కాకపొతే అప్పటికే అంటే.....మనకు తెలిసే సరికే ఓ జీవితకాలం ఆలస్యమై పోతుంది....!! అందుకే తొందరపడి ఓ నిర్ణయానికి రాకండి...!! నిర్ణయం తీసుకున్న వాళ్ళకు కొత్తగా చెప్పేదేం లేదు ఆల్రెడీ అలవాటై పోయి ఉంటుంది. 
జీవితం చాలా విలువైంది తొందరపడి తప్పుడు నిర్ణయం తీసుకోకండి మంచి జీవితాన్ని కోల్పోకండి....!!

నిజానికి అబద్దానికి మధ్యలో.....!!

ఓ అబద్దంలో బతికేయడంలో ఎంత ఆనందం ఉందో అంతే విషాదం ఓ నిజంలో జీవించి ఉంది. అబద్దంలో హాయిగా
బతికేస్తాం కాని....అదే నిజమని భ్రమలో అసలు నిజాన్ని మర్చిపోయామని మర్చిపోతాం...ఎందుకంటే నిజంగా నిజాన్ని తట్టుకోలెం కనుక. ఉన్న కాస్త జీవితాన్ని కష్టపెట్టే నిజంలో బతకడం అవసరమా...!! అయినా ఎందుకో కొందరేమో కష్టాన్ని కూడా ఇష్టంగా భరిస్తారు....మరికొందరేమో అబద్దపు అంచులలోనే ఆనందాన్ని వెదుక్కుంటారు...!! అదే నిజమైన సంతోషమని వాళ్ళు నమ్ముతూ ఎదుటివారిని కూడా నమ్మించాలని ప్రయత్నిస్తారు....!! కష్టమైనా నిజంలో బతకడంలో ఉన్న సంతృప్తి, ఆత్మతృప్తి....కలలాంటి కల్లలో బతకడంలో ఎప్పటికి వస్తుంది?
పెద్దలన్నట్టు కాకిలా కలకాలం బతికే కన్నా హంసలా అరక్షణం బతికినా చాలు....అదే నిజానికి అబద్దానికి మధ్యలో తేడా...!!

29, మార్చి 2013, శుక్రవారం

జీవిత కొలను....!!

అంతరంగపు కొలనులో
అలజడి రేపే ఆలోచనా తరంగాలు
అలల సుడిగుండాలు ఎన్నో....!!

కలువల అందాలు కొన్ని...
ఆరాధనతో స్పృశిద్దామంటే...
చుట్టుకునే అడ్డుతీగలు ఎన్నో....!!

సూర్య చంద్రుల కిరణాల తాకిడితో...
అచ్చెరువందే ఆనందంతో
పులకరించే కలువ తామరలు
జీవిత గమనాన్ని చూపే దిక్చుచీలు....!!

మది అంతరంగం ఆలోచనాతరంగం
కొలనుకు ప్రతి రూపం...!!
ఆనందం ఆహ్లాదం కలువ తామరలు...!!
కష్టం నష్టం కాళ్ళకు చుట్టుకునే తీగలు...!!
పచ్చని ఆకులు బంధు జన సమూహం...!!
అన్నిటిని తనలోనే దాచుకుని
అందాన్ని ఆనందాన్ని ఆహ్లాదాన్ని
కనులకింపుగా పంచే కొలను జీవిత సత్యం....!!

28, మార్చి 2013, గురువారం

ఏ జన్మ బంధమో....!!

చెప్పని కధలో గురుతుగా ఉన్నా
చెరగని ముద్రగా మారింది....!!
చెదిరి పోయిన నుదుటి రాతలో
చెక్కు చెదరని  జ్ఞాపకమైంది....!!
ఎప్పటికి చెప్పని మాట
ఎవరికీ వినిపించని గొంతు 
గాలిలో తేలుతూ నన్నే చేరుతోంది....!!
అది నిన్నే నిన్నే గురుతు తెస్తోంది...!!
పదే పదే పలకరించక పోయినా
ప్రాణం నీవే అంటోంది....!!
మరపు లేని మనసులో
మూగ తలపు మౌనమైంది...!!
ఏ జన్మ బంధమో ఈ అనుబంధం...!!

26, మార్చి 2013, మంగళవారం

వేదన...ఆవేదన....!!

గుండెకు గాయమైంది
మనసుకు మరణయాతన దగ్గరైంది
చేతన లేని శరీరం సహకరించనంటోంది
కలలు కనే కళ్ళకు భావాల.... 
స్పందన ఉన్నా భాష లేదు చెప్పడానికి
అన్ని తెలిసినా చెప్పలేని నిస్సహాయత   
అర్ధం చేసుకునే మనసులు ఎక్కడో మరి...!!
తెలుసుకునే సరికి చేజారిపోతోంది జీవితం
అన్నిటిని మోసుకుంటూ
ఎవరితో నిమిత్తం లేకుండా
కాలం పరుగెత్తి పోతూనే ఉంది...!!
ఏమిటో ఈ రెప్పపాటు జీవితం...!!

24, మార్చి 2013, ఆదివారం

నీ జ్ఞాపకం....!!

ఎదుట పడలేని స్వప్నం
ఎదను తడిమింది చూడు...!!

చినుకులాంటి జ్ఞాపకాన్ని
చిరుజల్లుగా మార్చింది నేడు
మైమరపించింది హాయిగా ఆ మత్తులో...!!

అలసి సొలసి సోలిన తనువుకు
ఆహ్లాదాన్ని పంచి ఆరాటాన్ని తీర్చి
సేద దీర్చిన మనసుకు
శతకోటి వందనం....!!

23, మార్చి 2013, శనివారం

మనిద్దరి మధ్యలో.....!!

శిధిలమైన గుండెను ఇంకా ఇంకా
చిద్రం చేస్తూనే ఉన్నావు....
నీ మాటల శర పరంపరలతో....!!

ముక్కల చెక్కలైన మనసుని
ఎక్కడ అతుకు వేస్తానో అని....
ముక్కలన్ని చిక్కకుండా
చెల్లాచెదురు చేస్తున్నావు...!!

నేనేమో ఆ ముక్కల్లో
నీ  జ్ఞాపకాల పాల పుంతలు
కరిగి కనిపించకుండా పోతున్నాయని
పట్టుకుని పేర్చుకుందామని
పిచ్చిదానిలా వెదుక్కుంటు....న్నాను....!!

చెదిరి పోయిన గతంలో
చెరగని వాస్తవం నువ్వు
గడిచిపోయిన కాలంలో
గతించి పోయిన జ్ఞాకపకం నేను
అందుకేనేమో మన మధ్య
ఇంత అంతరం.....!!
Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner