18, నవంబర్ 2021, గురువారం

రెక్కలు

1.  సాహిత్యం
అందరిది
రాహిత్యం
కొందరిదే

అనుభవసారమే
జీవితం..!!

2.   బాధ 
భరించాలి
దిగమింగడం
అలవాటు చేసుకుంటూ

బంధం
భారమని అనుకోలేం కదా..!!

3.   వంకర నవ్వులు
సంకర బుద్ధులు
వెకిలి చేష్టలు
అనాగరిక భాష

ఇదే ఈనాటి
రాజకీయ అసెంబ్లీ..!!

4.  ఆత్మీయత
అనుబంధానిది
అవసరం
అధములది

ఊరటనిచ్చేది
అక్షరాలేగా..!!

5.   అనుభూతులన్నీ
మనసువే
భావాల పరంపర
అక్షరాలకు కరతలామలకమే

అతిశయాల అనుభవాల 
సమ్మిళితమే జీవితం..!!

6.   కాలం ఎప్పుడూ తన పని 
తాను చేసుకుపోతుంటుంది
ఓడలు బళ్లు బళ్లు ఓడలు 
అవుతుంటాయి

నిరంతర ప్రక్రియను
ఆపడం మన తరమా..!!

7.   అలసిన మనసులకు
ఆశల హరివిల్లు
వెంబడించే బంధాలకు
మమతల పొదరిల్లు

పదిలంగా పొదుపుని
మోసే కుటుంబకావడి..!!

8.   గమ్యం
తెలుసు
గమనం
సాగదు

సగటు మనిషి
సందిగ్ధజీవనం వాదనలోనే..!!

9.  ఆలోచనలు
అనంతాలు
ఆచరణలు
అరకొరలు

వేదనను మిగిల్చిన 
వాదనదే పై చేయి..!!

10.   ఎడతెగని
గిల్లిగజ్జాలు
ఏమరుపాటున
ఏకాంతాలు

జీవిత రాదారిలో
రచ్చబండ పంచాయితీలు..!!

11.  మనసెరుగని
మమత లేదు
మనిషికి తెలియని
మాయ లేదు

కలియుగ ధర్మమిది
కలికాలంలో..!!

12.   మనసుల మధ్యన
అంతరం 
మనుష్యుల నడుమ
బంధం

ఏ రెండిళ్ళకయినా
దూరమెుకటే..!!

13.   అర్థమయిన
చేతలు
అడ్డు తొలగించనలవి కాని
అపార్థాలు

అహం ముడిబడిన
అడ్డదిడ్డమైన గీతలు..!!

14.   బంధమంటే
బాధ్యత పంచుకునేది
ఇష్టమంటే
నిన్ను నిన్నుగా చూసేది

తొలి మలి అడుగులకు మధ్యన
మంజీరపు మంజూషాలు..!!

15.   ఆభరణాలు
అందమే
నోటి మాట
మనసుదైనప్పుడు

సహజత్వం
అరుదైన వ్యక్తిత్వం..!!

16.   బాధలు
బారెడు
ఆశలు
ఆకాశమంత

తూకం తేలని లెక్కలే
జీవితమంటే..!!

17.   శూన్యానికి
చుట్టం
అంబరానికి
అందం

మబ్బుల్లో మసక వెలుతురు
జీవితపు సుఖసంతోషాలు..!!

18.  వెతల కుంపటి
వాడుకోవాలి
చలిని
కాచుకోవడానికి

అవకాశాలను
అందిపుచ్చుకోవాలి గెలవాలంటే..!!

19.  రెక్కల వంతెన
పరిచుంది
రెప్పల తేరుపై
కలల పయనానికి

నిద్రావస్థ
మనోవిహంగం..!!

20.   మరలిన కాలం
మళ్లీ రాదు
చెదిరిన మనసు
కుదురుకోదు

జీవిత పుస్తకంలో
ఖాళీ పేజీలుండవు..!!

21.  శూన్యంలో
అన్వేషణ మెుదలు
యుద్ధానికి 
సిద్దమైన మనసుతో

మనిషి ఆరాటం ఎందుకన్న 
ప్రశ్నకి అంకురం వెదుకుతూ..!!

22.   వెలుతురుకై
వెతుకులాట
చీకటి చుట్టానికి
అక్షరాల తోవ చూపిస్తూ

మనసు
నిరంతరాన్వేషి..!!

23.   కల(ల)వరాలన్నీ
కలబోసుకున్నాయి
మరలిన కాలాన్ని
మార్చలేమంటూ

మౌనం గమ్యానికి
మార్గాన్ని చూపెడుతుందొక్కోసారి..!!

24.   ఇరుకున పడినవి
బంధాలు
ఇబ్బంది పెడుతున్నది
మనుష్యులు

సమాజ జీవనం
సహజ పంక్తి భోజనం..!!

25.   బరువైనా భారమైనా
భరించాల్సిందే
బడబానలం
మదిని చుట్టుమట్టినప్పుడు

జీవితపు నిఘంటువుకి
సాటిరావేవి..!!

26.  వెతుకులాట
తప్పనిసరి
ప్రయోజనం లేదని
తెలిసినా

ప్రాయోజితం 
కొందరికని తెలుసు..!!

27.   ఏకాకి జీవితానికి
నిర్వచనం
జగమంత కుటుంబానికి
అక్షర దర్పణం

గగనాన మెరిసిన
సినీవాలి..!!

28.   రాయికి చూడచక్కని
రూపాన్నైతే ఇవ్వగలం
లేని మనసుని 
ఆపాదించలేం 

వింతైన పోకడలు
మనిషికే సొంతం..!!

29.   గర్భగుడికి
గర్భస్థానానికి పొంతన
రాతికి
మనిషికి వున్న అనుబంధం

మనసుదే ప్రధమస్థానం
నమ్మకంలో…!!

30.   ముంచాలనుకుంటే
ముంచగలమా
లేపాలనుకుంటే
లేపగలమా

ఎత్తుపల్లాలు వైపరీత్యాలు
ప్రకృతి సహజాలు..!!


16, నవంబర్ 2021, మంగళవారం

అగాధపు అంచుల్లో..!!


చేజారిన క్షణాలన్నీ
గుప్పెట బంధించి
పదిలంగా దాచుకోవాలనుకున్నా

గాయాల గతమైన
జ్ఞాపకాలన్నీ వెంటబడి
తరుముతూనే వున్నా

పలకరించే బంధుత్వాలు
పాతబడి పక్కకు చేరినా
పాశం జారవిడవలేకున్నా

లోగుట్టు నెరుగని మనసు
అద్దంలో ప్రతిబింబం నిజమనే భ్రమలో
మగ్గుతూనే ఉంది కాలం కలిసిరాక

అగాధాన్ని అధిగమించాలన్న ఆకాంక్ష
ఊపిరినొదలనీయక 
అక్షరాలను అడ్డుగా పరిస్తే

పరాయితనంపై ప్రేమలొలకబోస్తూ
అనుబంధాలను అధిక్షేపించే
అసురజాతికి చరమాంకమెప్పుడో..!!

14, నవంబర్ 2021, ఆదివారం

చీకటి సంతకం..!!

ఈ సువిశాల ప్రపంచంలో

ఏ దారెటు పోతుందో తెలియని

అమాయకపు అస్తిత్వానికి

ఆత్మాభిమానం కూడదంటూ

అన్నింటా ఆంక్షల పర్వాలను

అనాది నుండి లిఖించేసి

మనుగడకు మరో దారి లేదన్నప్పుడు

నొసటిరాతను తిరగ రాయడానికి

ఒంటరి పయనం తప్పదని

ఓటమి పాఠం రుచినెరిగి

గెలుపు తలుపు తట్టాలన్న

ప్రయత్నానికి నాందిగా

అలుపెరగని అక్షర పోరాటంలో

అడ్డుగోడలెన్ని ఎదురైనా

కదలికలను ఆపలేని కలం

కాలాన్ని వడిసి పట్టేసి

నిన్నలను దాటేయాలనుకుంటూ

ఈరోజును ఆసరా చేసుకోవాలని

ఆత్ర పడుతున్న మనసును

వేగిరపాటు వద్దని గదమాయిస్తూనే

గగనానికి ఎగరాలనుకున్న

బతుకు బావుటాను చిదిమేస్తూ

రాలిపడుతున్న వెలుతురుపూలపై

రాసిన చీకటి సంతకాలెన్నో..!!

11, నవంబర్ 2021, గురువారం

నే చెప్పేదేటంటే..!!

                        
నేస్తం, 
         సామాన్యులకు జరగని న్యాయం కాస్తలో కాస్త న్యాయాధికారులకు, న్యాయవాదులకయినా జరిగితే సంతోషం. అధికారంలోనూ, హోదాలోనూ వుంటేనే మనుష్యులు కాదు. సామాన్యులకు కూడా న్యాయం జరిగితే బావుంటుంది. మన వ్యవస్థలో వున్న అతి పెద్ద లోపం ఇదే. అధికారానికి, డబ్బుకు చట్టం సలాము చేసినంత కాలం సామాన్యులకు న్యాయం అందని ఆకాశమే. 
        Ease అని చదవడం రాని, అర్థం తెలియని CI లు వున్నంత కాలం మన వ్యవస్థ ఇంతే. సరే పోని తెలుగయినా సక్రమంగా వచ్చా అంటే అదీ అంతంత మాత్రమేనాయే. 
“ యథా రాజా తథా ప్రజా “ అన్న ఆర్యోక్తి అక్షరాలా నిజం నేటి మన సమాజంలో. అమ్మామెుగుడు అని అందంగా పలికే రాజభాష ఇప్పుడు మనదే. ప్రజలు ఇచ్చిన అధి’కారం ఎవరు ఎలా ఉపయోగించుకుంటున్నారన్నది జగ’మెరిగిన సత్యం. 
         సగటు మనిషికి అందుబాటులో లేనప్పుడు ఎన్ని చట్టాలు చేసినా ఉపయోగం లేదు. నీతులు, సూక్తి ముక్తావళులు చెప్పడం మానేసి, ముందు మనం ఆ చెప్పే వాటిలో కొన్నయినా పాటించి, అప్పుడు చెప్తే మన మనస్సాక్షికి మనం సమాధానం చెప్పుకోగలం. మనం మాట్లాడే భాషేదయినా కాస్త అర్థం పరమార్థం వుండి, సామాన్యులకు అర్థమయితే చాలు. పులిని చూసి నక్క వాత పెట్టుకోకూడదు మనమెంత ఫస్ట్ క్లాస్ స్టూడెంట్ అయినా. ప్రపంచం గమనిస్తూనే వుంటుంది మనల్ని, మన చర్యలను.
         చివరిగా నే చెప్పొచ్చేదేటంటే అదెచ్చా..ఓ పాటలో ఇన్న లెక్కలు, ఎక్కాలు దెల్వనోళ్ళు….అయినట్టన్న మాట..😊

9, నవంబర్ 2021, మంగళవారం

జీవన మంజూష డిసెంబర్

నేస్తం, 

      ప్రపంచమంతా కరోనా విలయతాండవం చేసింది నిజమే కాని దీని మూలంగా మనమేంటన్నది కూడా తెలిసిందన్నది సత్యం. ఓ చెడు మరో మంచికన్నట్టుగా కొందరి నిజ స్వరూపాలను బయటేసింది కరోనా. డబ్బులు ప్రతి ఒక్కరికి అవసరమన్నది కాదనలేని వాస్తవం. ఇప్పుడు రక్తసంబంధాలను, అనుబంధాలను కూడా  కాలరాసే కిరాతకమైనది కూడ ఈ ధనమే అయినందుకు సంతోషపడాలో, బాధపడాలో తెలియని పరిస్థితి.

       ఏ తల్లి తన బిడ్డను ఎట్టి పరిస్థితుల్లోనూ వదులుకోవడానికి ఇష్టపడదు. కొన్ని అనివార్య కారణాలతో బిడ్డకు తల్లి, తల్లికి బిడ్డ దూరమవడం విధి నిర్ణయం. మన పెద్దలు చెప్పిన మాట అసలుకన్నా వడ్డీ ముద్దు ఒకప్పుడు. ఇప్పుడు అన్నింటికన్నా డబ్బే ముద్దు. ఈ భూమ్మీద జ్ఞాపకాలను, గురుతులను మనిషికి మాత్రమే దేవుడు వరంగానో, శాపంగానో ఇచ్చాడు. వదులుకోలేని బంధాలకు, బంధుత్వాలకు తిలోదకాలిచ్చేస్తున్నాం డబ్బు బంధానికి చిక్కుబడిపోయి. మనిషి సృష్టించిన ధనమాయలోనే జీవితాలు వెళ్ళదీసేస్తున్నాం.

     బిడ్డ దూరమైనా ఆ బిడ్డనే కాదు, బిడ్డ జ్ఞాపకాలను కూడా ఏ తల్లీ మర్చిపోదు. అలాంటిది ఈనాడు మనం చూస్తున్న సమాజంలో డబ్బు కోసం పసిగుడ్డును కూడా రోడ్డు మీద వదిలేస్తున్న వికృత మనస్తత్వాలు ఎన్నో కనబడుతున్నాయి. బిడ్డ చనిపోతే ఆ బిడ్డ బిడ్డను కూడా గాలికి వదిలేయడం నేటి సంస్కారమైపోయింది. కనీసం జంతువులు, పక్షులకున్నంత బాధ్యత కూడా మనలో కరువైపోయింది. మన విజ్ఞానం మనకేం నేర్పిందన్నది ప్రశ్నార్థకమై మిగిలిపోయింది. 

    ఈ ప్రకృతిలో మరే ఇతర ప్రాణులకు ఇవ్వని ఎన్నో అవకాశాలను దేవుడు మనిషికి ఇచ్చాడు. కాని మనిషి రానురానూ మానవత్వాన్నే మరిచిపోతున్నాడు. చుట్టాలకు, బయటివారికి సహాయం చేయడం మాట పక్కనుంచితే, రక్తసంబంధాలనే కాసుల కోసం కాదనుకునే అనాగరికతను ఆవాహన చేసుకుంటున్నాం. పద్మశ్రీ పురస్కారాలు, డాక్టరేట్ పట్టాలు మనకు డబ్బును, గౌరవాన్ని సంపాదించి పెట్టవచ్చు. కాని ఆత్మీయతలను, అనుబంధాలను దగ్గరకి చేర్చలేవు. వస్తూ ఏమీ తీసుకురాము. పోతూ ఏమీ తీసుకుపోము. బతికిన ఈ నాలుగు రోజులు అవసరాలకు డబ్బులు కాని అవసరమే డబ్బుగా మారిపోయిన సమాజం మనదైనందుకు గర్వపడటం మినహా మరేం చేయలేం. ప్రకృతి విలయాలు మనకు ఎన్ని పాఠాలు నేర్పినా మారని మన నైజాలకు నివాళులర్పించేయాలని వుంది. ఓ మనిషితనమా నీ చిరునామా కాస్త చెప్పవూ..అంటూ ఎలుగెత్తి పిలవాలని వుంది. 

5, నవంబర్ 2021, శుక్రవారం

రెక్కలు

1.  వెతలు
అందరివి
వెలుతురు
కొందరిదే

జీవితపు
తీరుతెన్నులంతే..!!

2.   వెలుతురు కాగితాలపై
పువ్వుల తారలు
కలల చిత్రాలకు
కన్నీటి మరకలు

నిజాల ఛాయలకు
చీకటి సంతకాలు..!!

3.   చేవ్రాలు
చెరిగిపోతుంది
గతాన్ని
కాలం దాచేస్తుంది

మారని రాత
మరకగానో మెరుపుగానో మిగిలిపోతుంది..!!

4.   వెలుగు రవ్వల
కాగితపు పువ్వులు
కన్నీటి గువ్వలు
కనుల నిండుగా

మెుండి ధైర్యం
మనసుది..!!

5.  గాయం
పాతదే
గమనమే
కొత్తది

మనసుకి లేపనం
మనసాక్షరాలే..!!

6.   తప్పని
పయనం
ఆగని
కాలం

నిన్నానేడులకు
అనుసంధానంగా రేపంటూ..!!

7.   చీకటి 
సంతకానికి
వెన్నెల
రాయితీలు

అప్పుడప్పుడు ఆకాశంలో
మెరిసే నక్షత్రాలు..!!

8.  ఊహ 
వాస్తవమైతే సంతోషం
అబద్ధం
నిజమైతే దుఃఖం

గెలవడంలో
నిజాయితీ ముఖ్యం..!!

9.   ఊహలు
అపరిమితం
అనుభవాలు
యదార్థం

నిర్థిష్ట పరిమితినెరిగినదే
జీవితం..!!

10.   అంగీకరించడం
ఆక్షేపించడం
మనిషి
నడవడిని బట్టి

మంచి చెడు విశ్లేషణ
మనసు కెరుక..!!

11.  కథలన్నీ
గతానివే
కథనాలన్నీ
నిదర్శనాలే

వెంబడించేది
వాస్తవమే..!!

12.  ప్రతికూలత
నువ్వేంటో నీకు చెప్తుంది
అనుకూలత
అందరు నీవాళ్ళేనంటుంది

అవసరం
అయినవారెవరో తెలుపుతుంది..!!

13.  తలపుకు రాని
క్షణాలెక్కడా
తలంపులన్నీ
జ్ఞాపకాలైతే

అక్షరాలకూ అక్కరే
చరితగా కాకున్నా చెంతనేనని..!!

14.  పలకరింపు లేకున్నా
పరిచయమే 
అక్షరం కలిపిన
అనుబంధం

ఏ బంధం ఎందుకన్నది
విధి నిర్ణయం..!!

15.   మెలకువలో
కల
నిదురలో
కల’వరం

సేద దీర్చే
సుషుప్తావస్థ..!!

16.  మాటలు 
నేర్చాయి
మనసులను
ముక్కలు చేస్తూ

కపటమెరుగని ప్రేమలను
గాలికొదిలేస్తూ..!!

17.  ఆత్మీయతకై
పరితపించింది
అనుభవరాహిత్యం
శాపమైంది

ఓ తార
మధ్యలోనే రాలిపోయింది..!!

18.   ప్రేమ మైకం
గెలిచింది
బంధానికి
కట్టుబడింది

తారాపథం
తాత్కాలికమైపోయింది..!!

19.   ముసుగులు
తప్పని జీవితాలు
వెలుతురులో
కనబడలేక

ఎదుటివారి బలహీనతే
వజ్రాయుధం..!!

20.   కనుమాయ
కనబడదు
మనసు మాట
వినబడదు

నిజానిజాలు
నిలకడ మీద తెలుస్తాయి..!!

21.   కొరుకుడు పడని
మనస్తత్వాలు కొన్ని
కలుపుకుపోయే 
బంధాలు ఇంకొన్ని

కాలం నడకలో
శాశ్వతం కాదేవి..!!

22.   కొలమానంతో
కొలవగలమా
అభిమానాన్ని
లెక్కల తక్కెడలో

బంధం భారం
మనసు మాలిమిదే..!!

23.  ఎదురుదెబ్బలు
పరిపాటే
ఆత్మాభిమానం
పెట్టనికోట

చివరికి మిగిలేదేంటో
తెలిపేది కాలమే..!!

24.   అవధి లేనిది
అనంతమైనది
మనసెరిగిన
మమకారం

లోతుపాతులెరగని
అనుబంధమది..!!

25.   పంపకాల
తేడాలు
అంపశయ్యల
అంపకాలు

ఓ గొడ్డలి
గుండెపోటు..!!

26.   ఇచ్చట
లెక్కలు సరిచేయబడును
అచ్చట
అవసరాలు తీర్చబడును

ఏ బంధమైనా ఒకటే
పీఠాన్ని ఎక్కడానికి..!!

27.   నటించే
అనుబంధాలే అన్నీ
నాటకాలను
కనిపెట్టనంత వరకు

చరమాంకానికి
తెర తీయనంత కాలం..!!

28.   ఆలి
అడ్డు
అక్రమం
ముద్దు

ప్రశ్నిస్తే
మగ అహంకారం నిద్ర లేవడం..!!

29.   గూడు చెదిరినా
గుండె దిటవు చేసుకోవాలి
అలసట తీరే
మార్గం తెలుసుకోవాలి

నిర్ణయం నీదైనప్పుడు
గమనం సుళువే..!!

30.   బాధ్యతలు
అందరివి
బంధాలు 
పంచుకునేది కొన్నే

విలువ తెలియని
బతుకులు..!!









1, నవంబర్ 2021, సోమవారం

నేనెవరో..!!

అవును..
నేనో సంతోషాన్నే
ఎప్పుడూ

వేదనలెన్ని చుట్టుముట్టినా
చెదరని చిరునవ్వుతో
కనబడుతూ

బాధలెన్ని దరిజేరినా
బాంధవ్యాలను అంటిపెట్టుకుని
బతికేస్తూ

గాయాలెన్నయినా
జ్ఞాపకాలుగా మలిచేసుకున్న గతంగా 
ఉండిపోతూ

ఆరంభమేదైనా
అరకొరగా మిగిలిన ఆత్మీయతలలో
కొట్టుమిట్టాడుతూ

అక్కరకు రాని చుట్టరికాలకు
తిలోదకాలివ్వలేని నిస్సహాయతకు
బందీగా

మనసుకు మాలిమైన
లక్షణాలనెరిగిన అక్షరాలతో
ఆటలాడుకుంటూ

విషాదాన్ని
వినోదంతో నింపేయాలనుకునే
ఆశావాదినో..అవకాశవాదినో.!!
Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner