శత్రుదాడికి
ధీటుగా జవాబిచ్చిన
క్షాత్ర పౌరుషమా
మెుక్కవోని
గుండె నిబ్బరంతో
జూలు విదిల్చిన
ఆత్మ విశ్వాసమా
అఖండ భరతావని
అందిస్తోంది
ఆత్మీయతాశీస్సులు
ధీరుడవై
విజయకేతనంతో
విజయుడవై
పద్మవ్యూహపు
ఛేదనలో
సవ్యసాచివై
తిరిగిరా విక్రమాభినందనుడా..!!
నీ మౌనంలో
నేనుండాలన్నంత
అత్యాశెందుకో
నీ మాటల్లో
నాపై ఇష్టముండాలన్నంత
కోరికెందుకో
నీ మనసులో
నాకే చోటుండాలన్నంత
తపనెందుకో
నీ జ్ఞాపకాల్లో
నే పదిలమవ్వాలన్నంత
ఆశెందుకో
నీ తలపుల్లో
నే మిగిలిపోవాలన్నంత
తమకమెందుకో
నీ వాస్తవంలో
నే కలగా నిలిచిపోవాలన్నంత
ఆరాధనైనందుకేమెా...!!
నేస్తం,
వ్యక్తుల గురించి తెలియదు, వారి వ్యక్తిత్వాల గురించి తెలియదు కాని ప్రతి ఒక్కరూ సలహాలిచ్చేటోరే. ఫలానా సంఘటన జరిగింది ప్రపంచం యావత్తూ దిగ్భ్రాంతికి లోనైవుంటే మీరేంటి వెన్నెలపాటలు రాసుకుంటున్నారంటూ కామెంట్లు. కనీసం నేనేం రాశానో కూడ అర్ధం చేసుకోకుండా కామెంట్ రాయడమే వాళ్ళ పని. నా గోడ మీద నాకు నచ్చింది నేను రాసుకుంటాను. సైనికులపై దాడి హేయమైన చర్యే, వారి కుటుంబాలకు జరిగిన నష్టం ఎవరు పూడ్చలేనిది. ఇది జగమెరిగిన సత్యం. పుంఖానుపుంఖాలుగా శాంతి సందేశాలు, బాధాకరమైన పోస్ట్ లు పెట్టేసి వారి కుటుంబాలకు సంతాప సందేశాలు, ప్రొఫైల్ పిక్చర్ మార్చేసి అదీ కాణీ ఖర్చు లేకుండా చెప్పేసి మన బాధ్యత అయిపోయిందనుకుంటే సరిపోతుందా. ఇది తెలియక జరిగిన తప్పిదం కాదు. నన్ను అడిగిన సదరు పెద్దమనిషి దీనికి కారణాలను ప్రభుత్వాన్ని అడిగితే చాలా బావుంటుంది. గోడలలో మీ ముఖచిత్రాలు పెట్టుకున్నారు, కనీసం ఓ సైనికుడి ఫోటో పెట్టలేదు, ఓ సందేశము పెట్టలేదు, నా రాతల గురించి మాట్లాడే హక్కు మీకు లేదని మనవి. నేను ఎప్పుడూ ఎవరి రాతలను క్రిటిసైజ్ చేయలేదు, చేయను కూడా. అయినా నా మీద పడి ఏడుస్తున్నారు కొందరు. కనీసం ఇంట్లోవాళ్ళ గురించి ఆలోచించని వాళ్ళు దేశం గురించి, ఎదుటివాళ్ళ బాధల గురించి ఓ తెగ ఫీలయిపోతున్నారు. ముందు మీ గురించి చూసుకుని తర్వాత పక్కవాళ్ళ లోపాలు వెదకండి...మరోసారి చెప్తున్నా
"నాకు నచ్చింది నేను రాసుకుంటాను."
ఉచిత సలహాలివ్వకండి....
యుద్దానికి సన్నద్ధమై
అయ్యా చంద్రబాబు గారు,
మీరందించిన వరాల జల్లులు కొందరి అతి తెలివి వలన, ఎదుటివారు కూడా ఎందుకు లాభం పొందాలి అన్న కుటిలబుద్దితో ఈ స్కీములకు సంబంధించిన అధికారులతో కుమ్ముక్కై, మీరు డ్వాక్రా మహిళలకు అందించిన సొమ్మును అందరికి చేరనీయకుండా అడ్డుపడుతున్నారు. సదరు అధికారులు వివరాలు అడుగుతున్న మహిళలను చాలా అసభ్యపదజాలంతో అవమానిస్తూ మహిళలకు చేరాల్సిన సొమ్మును తాము పంచుకోవాలని చూస్తున్నారు. దీని వలన మీకు చాలా నష్టం జరుగుతుంది. అతి తెలివి అవకాశవాదుల వలన మీ ఓటమిని మీరే కొనితెచ్చుకుంటున్నారు. ఈ విషయంపై తక్షణ చర్య తీసుకోవాలని మనవి. లేదంటే మీ ఓటమికి మీరే బాధ్యులౌతారు.
రామానుజం మాస్టారి స్పందన నా అంతర్లోచనాలు పుస్తకంపై....
మనఃపూర్వక ధన్యవాదాలు మాస్టారు మీ అమూల్యమైన స్పందనకు, ఆశీస్సులకు...
తొలుత గా చిరంజీవులు మౌర్య , సౌర్య లకు శుభాశీస్సులు 🍇👐 అంతర్లోచనాలు 💎👀
మీ రచనల్లో ఓ మాధుర్యం ప్రత్యేకత ఏమిటంటే మన నిత్య జీవితంలో అనుభవాత్మక అంశాలే అయినప్పటికీ , విషయం ప్రాధాన్యం తో పాటు ముగింపు/ ముక్తాయింపు అనిర్వచనీయం.
పాఠకులను ఆకట్టుకుని , మనసుకు పదును పెట్టే విధంగా వుంటుంది.
మున్నుడి లలో శ్రీ కొంపల్లె శర్మగారు అందించిన భావప్రకటన, సూచనాత్మక విశ్లేషణ హృద్యంగా వుంది.
లేఖా గమనాల్లో
నేనింతే, మనసు గోల, ఇది నిజం, అమ్మ భాష, ఆలోచించండి, ఓ చేదు నిజం, ప్రయాణం లో పాడుగోల. ఇలా దేనికదే ప్రత్యేకత సంతరించుకుంది అంటే అతిశయోక్తి కాదు.
ఆ చదువులతల్లి కృప తోడై మీ మానసిక, శారీరక శక్తి ని పెంపొందిస్తుందని నా అభిప్రాయం.
మీరు ఎంచుకున్న రచనా వ్యాసంగం మీకు వరప్రసాదం గా భావిస్తూ అన్నిరంగాల్లో మీ కృషి ఫలించాలని ఆకాంక్షిస్తూ న్న మీ శ్రేయోభిలాషి...
రామానుజం
హృదయ పూర్వక శుభాభినందనలు.
మీరు కొన్ని సందర్భాల్లో విమర్శలతో ఎండగట్టి నా తగు పాళ్లలో వ్యక్తీకరించారు.
సాగరసంగమం పై మీకు గల మక్కువ నవరసభరితంగా మీ రచనల్లో ఆవి‌ష్కరణ జరిగింది.
జీవితకాలం లో చేసే పుణ్యకార్యక్రమాల్లో గ్రంధరచన ఒకటి.
అందులో మీరు సఫలీకృతులయ్యారు.
ధన్యజీవీ ! శుభమస్తు 🍀
ఏ కలానికి గాయమైందో
నెత్తురోడుతున్న క్షణాలన్నీ
గేయాలుగా మారుతూ
రుధిరాక్షరాలై వెల్లువెత్తుతున్నాయి
గాలి వాటుకి చెల్లాచెదురై
బంధాలు రెపరెపలాడుతూ
అడపాదడపా తాకే ఆప్యాయపు చినుకుల్లో
తడిసి మురిసి పోతున్నాయి
అరకొరగా మిగిలిన రక్తసంబంధాలు
ఆదరణ కోసం అర్రులు చాస్తూ
అరచేయి అడ్డు పెట్టిన దీపాల్లా
మిణుకు మిణుకుమంటున్నాయి
దాహార్తి తీరని ధనదాహంలో మునిగి
కాలపు వలకు చిక్కుతూ
అహపు తెరలను చుట్టుకుని
పేగుబంధాలను పేలవం చేస్తున్నాయి
ముడిపడలేమంటూ ముగిసిపోతున్న బుుణానుబంధాలను
అక్షరాలు అటుఇటు మార్చినా
అందంగా ఇమడలేమంటూ
భావాలు రొద పెడుతున్నాయందుకే...!!
Template by:
