​చీ’కటి బతుకులు..!!

అదో దాహార్తి

నిలకడగా నిలువనీయదు

కుదురుగా కునుకేయనీయదు

రెప్ప పడితే

రేపన్నది వుండదని భయమేమో

కన్ను తెరిస్తే

నిజాన్ని చూడాలన్న సంకోచం

వాస్తవాన్ని తట్టుకోలేని నైజం

విరుద్ధ భావాల వింత పోకడలు

అధికారమిచ్చిన అహంతో

సరికొత్త రాజ్యాంగానికి

తెర తీయాలన్న ఆరాటంలో

చరిత్ర హీనులుగా మిగిలిపోతున్నామని

మరిచిపోవడమే..

మన నిశాచర పాలనకు పరాకాష్ఠ

మనమనుభవించిన 

చీ’కటి బతుకునే

వ్యవస్థకు నిసిగ్గుగా ఆపాదించేస్తున్నాం

అదేమని అడిగితే..

సమాధానం తెలియనప్పుడే 

ప్రశ్నించడం భరించలేని 

అసహనం మనకాభరణం

రేపటి కాలాన్ని శాసించలేమని

గుర్తెరగని గాలి బుడగ జీవితాలివని

భవిష్యత్ నిరూపిస్తుంది..!!