![](https://blogger.googleusercontent.com/img/b/R29vZ2xl/AVvXsEjQ9XQKdSls-1-xMojPqOlEXLvvqUr97_2863Ysgc55wagc6wAxZH370pUhM1QozYLk9cl349_2oWsuyE2IxxwngP6xtlqA3wCs778vBm-DblmP_47_Ek123vKydC7ip08S1nTtfCyojas/s1600/hklhlkjlk.jpg)
ఏమిటమ్మా నీ ఆంతర్యం ...??
అంతర్లోచనల అంతర్లోకాల ఆలోచనల
ఆంతర్యాన్ని ఎక్కడ దాచేసావు..??
జీవిత మైదానంలో ఆటబొమ్మగా మారి
అలుపు సొలుపు మరచిపోయి అందరి కోసం
ప్రాణమున్న యంత్రానిగా జీవధారలు
అందిస్తూ నీ ఆయువు మాకు పోస్తూ
శిధిల శల్యాలుగా శరీరాన్ని రుధిరాశ్రువుల
ధారలలో తడిపేస్తూ చూడనివ్వని
నీ మనసు మూగవేదన వినిపిస్తున్నా
వినపడని దూరాలకు తరలించాలనే
నీ విశ్వ ప్రయత్నంలో సఫలీకృతం
అవుతూనే నిరంతరాయంగా
నిర్విరామంగా సాగిపోయే నీ పయనం
నిన్ను సృష్టించిన విరించికే
ఓ ప్రశ్నార్ధకంగా మిగిలిపోయి
తన సృష్టికే తలను వంచి
విశ్వాన్నంతా నీ పాదాల చెంత
దాసోహం చేసిన ఆ విధాత
చిత్రం ఎంత వి'చిత్రం' కదూ....!!
0 మీరేమనుకుంటున్నారో.....చెప్పేయండి:
కామెంట్ను పోస్ట్ చేయండి
తెలుగులో రాయడానికి www.lekhini.org కి వెళ్ళండి