బాల్యం..!!

అమ్మ ఒడిలోని పసిపాపాయి
చీర చెంగు చాటుకి చేరుతూ నాన్న చేయినందుకుని
మెుగ్గ తొడిగినదే బాల్యమంటే

అరమరికలెరుగనిది
ఆంతర్యాలను, అంతరాలను లెక్కజేయనిది
సహజమైన ప్రకృతి అందాలలో ఇదొకటి 

అక్షరాలతో ఆటలాడుతూ
అల్లరి కేరింతల ఆనందాలకు నెలవై
చిరు అలకల బుజ్జగింపులదీ చిన్నతనం

ముద్దు ముద్దు పలుకులు నేరుస్తూ
మమకారపు మాధుర్యాలను చవిచూపే
పాలుగారే పసిడితనమిది

అనుబంధాలను దగ్గర చేర్చే
ఆత్మీయ పిలుపులు పలకరించే
అనురాగ సమ్మిళితమైన లాలిపాటల కమ్మదనమిది

అందరిని మనం కావాలనుకుంటే
ఎప్పుడో ఒకప్పుడు మనకు
చేరువౌతారని చెప్పే కల్మషమెరుగని మనసులివి

మరలని కాలంలో
మరపురాని అనుభూతులనందించే
మలి వయసుకు మధుర జ్ఞాపకమీ పసితనం...!!