కరిగేదెన్నడో...!!

వేల కధల వెతల కన్నీటి చినుకుల్లో
ఓ చినుకుగా ఉండిపోయిన సశేషాన్ని
వెలిసిపోయిన రంగుల్లో వెదుకుతున్నా 
సంతోషాన్ని చిరునామాగా చూడాలని..!!

అందరాని చందురుని అందుకోవాలని
ఆశపడుతున్నా అందుకోవాలని ఆరాటమే
అంబరాన్ని తాకాలన్న తపన వీడని
అక్షరాల పయనం ఇలా సాగుతోంది...!!

లెక్కలేయని అనుబంధాల్లో మిగిలిపోయిన
బాంధవ్యాలు నాతోపాటుగా రాలేమంటూ
దూరంగా పారిపోతుంటే పట్టుకోవాలన్నా
జారిపోతున్న జీవితానికి అంటని చెలిమిలా....!!

ప్రళయంలో వెదికినా ప్రణయంలో చూసినా
మనసులో దాగిన మాటలు పెదవిపై చేరి
గుండె గొంతుకను విప్పి చెప్పినా వినని
కరకురాయి కాఠిన్యం కరిగేదెన్నడో...!!