రంగుల జ్ఞాపికలు...!!

మదిని వదలలేని మమతలు
మాటల మాటున దాచలేని బంధాలు
చెప్పకనే చెప్పే చిరునవ్వు చాటు సరాగాలు
దోబూచులాడే మనసుల మధ్యన వారధులు

ఆంతర్యాల ఆపేక్షలను దాచేసే అహాల అడ్డు గోడలు
తరిగి పోతున్న అనుబంధాలకు ప్రతీకలు
పెరిగి పోతున్న నాగరికతకు పరాకాష్టలు
రాలి పోతున్న సంస్కారానికి సాక్ష్యాలు

ఓనమాలు దిద్దించిన పలకా బలపాలు
ఎ బి సి డి లు నేర్పించిన ఆధునికత పాఠాలు
సంగీత సాహిత్యాల సౌరభాల సుగంధాలు
పబ్బుల పార్టీల పై పై మెరుగుల పూతలు


అటు ఇటు ఎటు పోలేని మధ్య తరగతి సంసారాలు
నోట్లలో బతుకులు కాలిపోతున్నా సరదాలు స్వర్గ తుల్యాలు
సగంలో మిగిలి పోయిన జీవితాలకు ఆనవాలు 
ఈ తీపి చేదుల కలయికల కమ్మని జ్ఞాపికలు