చిమ్మ చీకటిలో నిన్ను చూస్తున్నానీ నీలి నీడల జ్ఞాపకాలు వదలక
నను వెంటాడుతూనే ఉన్నాయి పదే పదే...
వేధించిన వాదనల వేదన వేడిగా అనిపించినా
ఆ మరుక్షణమే మరపించే మమతకు
దాసోహమై వదలలేక...వీడి పోలేక...
ఎటు పోలేని బంధానికి గురుతుగా
వెన్నెల్లో ఆడుకునే అందమైన అక్షరాలుగా
కనిపించకుండా చీకటిలో చేరువగా అనిపించే
నీ సాన్నిహిత్యం సన్నితంగా లేకపోయినా
నా మనసు నాకే కనిపించే ఈ మాయాజాలం
రాతిరి తెరల రెప్పల మాటుగా అగుపిస్తూ
రేయిని కప్పిన వెన్నెల దుప్పటిలో
అందమైన ఆకృతులుగా అనిపిస్తున్న
మదిలో మమేకమైన మధుర సంతకాలుగా
నీ గురుతుల గమ్మత్తులు కనిపిస్తూనే ఉన్నాయి...!!
0 మీరేమనుకుంటున్నారో.....చెప్పేయండి:
కామెంట్‌ను పోస్ట్ చేయండి
తెలుగులో రాయడానికి www.lekhini.org కి వెళ్ళండి