ఇదేనా ప్రజాస్వామ్యం అంటే..?

 నేస్తం,

    మనకు ఏది కావాలన్నా మన సమాజంలో ప్రతి దానికి ఓ అర్హత ఉంటుంది. దేశాన్ని శాసించే రాజకీయాల్లో ఎందుకు లేదు..? డబ్బు, రౌడీయిజం ముఖ్యమైన అర్హతలుగా మన దేశ సామాజిక రాజకీయాలు నడుస్తున్నాయి. ఒక చిన్న ఊరి నుండి మొదలై ఇంతింతై వటుడింతై అన్నట్టుగా ఉన్నాయి. కాస్త పేరున్న స్కూల్ లో జాయిన్ అవడానికి తల్లిదండ్రి అర్హత అడుగుతున్నారు ఇప్పుడు. ఒకప్పటి సంగతి పక్కన పెడితే ఇప్పటి రాజకీయాల్లో ఎంతమంది నాయకులు న్యాయబద్దంగా, చట్టబద్ధంగా గెలుస్తున్నారు..? డబ్బు, అధికారం కోసం ఒక పార్టీలో గెలిచి మరో పార్టీ లోనికి మారడం ఎంత వరకు సమంజసం..? వ్యక్తుల మీద అభిమానాన్ని చంపుకుని కొందరు పార్టీ కోసం ఓట్లు వేసి గెలిపిస్తే, గెలిచాక పార్టీ ఫిరాయిస్తున్న ఎందఱోనాయకులు. అప్పుడు ప్రజల తీర్పుకు తల ఒగ్గింది ఎక్కడ. ఇదేనా ప్రజాస్వామ్యం అంటే..? నాయకులు వారి వారి స్వప్రయోజనాల కోసం ఎన్నో మార్పులు, చేర్పులు చట్టాల్లో చేస్తున్నారు, కానీ ప్రజల కోసం ఎన్నుకోబడే ప్రతినిధుల అర్హత కోసం ఎందుకు నియమాలు పెట్టడం లేదు. ఎదో ఓటేశాము, ఎవరో ఒకరు గెలిచారు మన పని అయిపోయింది అనుకుంటున్నంత కాలం మనము, మన సమాజమూ ఇలానే ఉండిపోతాం. మార్పు మనలోనే మొదలు కావాలి.... !!