ద్విపదలు...!!

1.   ఎదురుచూపులు అలవాటేనట
మాటల మౌనానికి...!!

2.  మధుర స్వరాలు మనవే
నీ నా తేడాలెందుకు...!!

3.  మమతలన్ని నీతోనే
గాయాలన్నింటిని మాన్పేస్తూ..!!

4.  మూన్నాళ్ళ ముచ్చటే
ఏడడుగుల బంధం ఎగతాళి చేసాక....!!

5.   అద్దిన వర్ణాలన్నీ
దరహాసాల్లో మెండుగా కనువిందు చేస్తూ...!!

6.  అమాస తడబడుతోంది
నెల పొడుపు వెలుగుతో తేలిపోతానని...!!

7.    బుద్దులు పెడత్రోవనే
నట్టింట ఇల్లాలిని నవ్వులపాలు చేస్తూ...!!

8.  కాంతినద్దింది అక్షరం
మలినం కాని పరమాత్మ తేజంతో....!!

9.  మరణ శాసనం రాయాలి
ఋణపాశాలు వెంట పడకుండా....!!

10.   పరవశిస్తూ ప్రకృతి
ప్రణమిల్లుతూ ప్రణయం..!!  

11.   మరపురానివి జ్ఞాపకాలు
మనతో మమేకమైపోతూ...!!

12.  నిశ్శబ్దమెప్పుడూ నేస్తమే
నా ఏకాంతాన్ని నీతో జతచేస్తూ...!!

13.  జ్ఞాపకాలను వదలలేకున్నా
నువ్వు లేని రేపటికి రాలేకున్నా...!!

14.  ఊపిరే నీవుగా
ఉండి పోయావు ఎద నిండుగా...!!

15.  అనుభవాల వర్షమే జీవితం
హర్షాలన్నీ మనవి రాకున్నా...!!

16.   మనసంతా నేనైతే
మౌనానికి చోటెక్కడ....!!

17.   శబ్దం చుట్టమైంది
మన కలయికలో మాధుర్యాన్ని గ్రోలి.. !!

18.   అక్షయపాత్రే మన బాంధవ్యం
చెలిమి సంతసాలతో విలసిల్లుతూ...!!

19.  ఆశలు రేపింది ఎదకు
తోడై కడవరకు కలిసుంటానని..!!

20.  కన్నీటిని పన్నీరుగా మార్చేస్తూ
జీవిత నౌకను నడిపించడమే..!!

21.   విచలితమౌతుానే ఉన్నా
శూన్యాన్ని సైతం నువ్వే ఆక్రమిస్తుంటే...!!