ఈనాటి వైద్యం

వైద్యో నారాయణో హరి అన్నారు మన పెద్దలు, కాని నాటి నుంచి ఈనాటికి డబ్బుల నైవేద్యం ఉంటేనే వైద్యం అన్నట్లు వుంది. వైద్యుని దేవునికి ప్రతిరూపంగా భావిస్తాము. శారీరకమైనా, మానసికమైనా, ఇంకా ఏ రూపంగానైనా ఇబ్బంది వస్తే వైద్యుడు చెప్పిందే వేదవాక్కు మనకు. ఒక అమ్మాయికి రెండు సార్లు అబార్షన్ అయితే మూడోసారి మొదటి నుంచి భాగ్యనగరంలో అద్దెకు ఇల్లు తీసుకుని నెలలు నిండే వరకు డాక్టర్ పర్యవేక్షణ లో వుంటే వాళ్లకు చివరకు మిగిలిన బహుమతి చనిపోయిన పాప. వేరొకరికి బెంగుళూరులో పేరున్న పెద్ద హాస్పటల్లో ఎనిమిదో నెలలో తేడా అనిపించి వెళితే ఐదు, ఆరు రోజులు ఏమి జరిగిందో కుడా చెప్పకుండా కదలికలు లేవు చూద్దాము అని చెప్పారు. తరువాత విశాఖ లోని మరో పేరున్న హాస్పటల్లో నెలలు నిండే వరకు చూపిస్తుంటే రేపు రండి, ఎల్లుండి రండి అని చెప్పి తరువాత బాలేదని వెళితే ఆఖరుకి ఆపరేషన్ చేసి చనిపోయిన పాపని ఇచ్చారు.
పూర్వకాలంలో అవకాశాలు లేక ఇలాంటి సంఘటనలు చాలా జరిగేవి. అన్నిరకాలుగా ఎంతో అభివృద్ధి చెందిన, చెందుతున్న, విజ్ఞానమున్న, విజ్ఞులున్న ఈ రోజులలో ఇలాంటి ఘటనలు జరుగుతున్నాయంటే ఇది ఎవరి నిర్లక్ష్యం?
అనుకోవాలి. అందరూ బాధ్యతలేని వారు కాదు, పనిలోనే దైవత్వాన్ని చూసే వారు కొందరుంటే డబ్బుని చూసే వారు మరికొందరు, ప్రాణాలతో చెలగాటమాడే వారు ఇంకొందరు. ప్రాణం పోసేందుకే వైద్యం కాని తీసేందుకు కాదని వైద్యాన్ని అందరికి అందుబాటులో ఉండేలా చేయాలని కొంత మంది తపన పడే మహా యజ్ఞంలో నిస్వార్ధంగా మీ చేయి అందించాలని ప్రతి ఒక్క వైద్యనారాయణుని అర్ధిస్తున్నాను.