చెప్పాలని వుంది...గొంతు విప్పాలని వుంది....

అపుడు పెదవి దాటి రాని మాట ఇపుడు పదే పదే
చెప్పాలని వుంది...గొంతు విప్పాలని వుంది....
నువ్వు వింటే నీ కళ్ళలో ఆ ఆనందం నేను చూడాలని వుంది...
సరదాగా నీతో చెప్పాలనుకున్నా...మనసులోని ఓ మాట
పెదాల పరదాలు దాటి తరలి రానంటోంది ఈవలికి...
అందరూ చెప్పే మాటే...అందరికి తెలిసిన పలుకే...
అమ్మతో చెప్పినా...నాన్నతో చెప్పినా...
రక్త బంధంతో చెప్పినా...ఆత్మ బంధువుతో చెప్పినా...
చిన్న మాటే....అయినా మనసుకిస్టమైన మాట
నేనంటే నాకిష్టం...నాకన్నా....నువ్విష్టం!!
తరచూ పలకరించే నీ ప్రేమ నిండిన పిలుపు ఇష్టం
నాతొ నువ్వు చెప్పే ఊసులు, నులివెచ్చని నీ స్పర్శ..
కధలు, కబుర్లు చెప్పి...లాలిపాటల లాల పోసినా..
నేయిగారే గోరుముద్దల మురిపాల బువ్వ పెట్టినా...
జోల పాటల ఊయలలో జోకొట్టినా....
కలత నిదురలో ఉలికి పడితే....నేనున్నానంటూ....
నీ ఆలంబన నాకింకా గుర్తే... అందుకే ... అమ్మా!! అమ్మమ్మా!!
నాకన్నా....నువ్విష్టం మరీ...మరీ...ఇష్టం!!