రెక్కలు

1.  వదులుకోలేనిది

బలహీనత

తర్కానికి అందనిది

నమ్మకం

ఇహము పరము

తెలుసుకునేది మానవజన్మ..!!

2.  ఉలి దెబ్బలు

భరించాలి

రాతికి

రమణీయత రావాలంటే

నేర్పరితనమంతా

మలిచే తీరుదే..!!

3.   అన్నీ 

ఆశల సౌధాలే

కాసులతో

నిర్మితమిప్పుడు

జీవిత తులాభారమంతా

ధనతూకమే..!!

4.  చెంపదెబ్బ

మాసిపోతుంది

మనసుదెబ్బ

చితి మీద కూడా కాలదు

హింస

పలురకాలు..!!

5.  పరిమితంగా

కొన్ని

అపరిమితమైనవి

మరికొన్ని

అమ్మ దెబ్బల్లో ప్రేమ

తెలియనిదా..!!

6. ముసుగు పేరు

ఆధునికత

మనిషి తీరు

అనాగరికం

పరిజ్ఞానం బట్వాడా అయినది

పరాయితత్వం నుండి..!! 

7.   ప్రశ్నలతోనే

సమస్యలు

బాధ్యతనెరగని

హక్కులు

వితండవాదంతోనే

వింతపోకడలు..!!

8.   అణువే

ఆది అన్నింటికి

ఆకాశానికైనా 

అవనికైనా

దూరానికి 

కొలమానమెప్పుడూ దగ్గరతనమే..!!

9.  మారుతున్నవి

మానవ సంబంధాలే

అనుబంధాలకు

అడ్డుగోడలు కడుతూ

చుట్టరికాలెలా వున్నా

కాలంలో మార్పులేదు..!!

10.   ఓడిపోయేవి

కొన్ని

ఊరటనిచ్చేవి

మరికొన్ని

ఆటేదైనా

నైజమదే..!!

11.   రూపం లేనిది

మనసు

ఉనికి కోసమే

ఆరాటం

మనసు మనిషి మధ్యన

పోరాటమే జీవితం..!!

12.  యుద్ధమేదైనా సరే

సిద్దమే

చాటుమాటుతనం

అలవాటు లేదు

గెలుపోటములు

అక్షరాలకు అంకితం..!!

13.   ఏకపక్షం

కాదేదీ

ఏ జట్టుదైనా

గెలుపే లక్ష్యం

జీవితంలో

ఏ అటైనా..!!

14.   తల వంచని

స్థైర్యం

మెుక్కవోని

ఆత్మవిశ్వాసం

అక్షరాలకు మాత్రమే తెలిసిన

మనసు..!!

15.   ఎదురీతల

జీవితం

ఎడతెగని

అనుబంధాల నిలయం

అమ్మకు అక్షరానికి

ఎరుకైన పాశం..!!

16.   చిరునవ్వై 

సేద దీరుతున్నా

మౌనం

మనసు విప్పిందని

ఆత్మను

అక్షరం పరిపూర్ణం గావించిందని..!!

17.   కలతలు

కారణాలుగా మారుతున్నాయి

బాంధవ్యాలు

భారంగా మారుతున్నాయి

ధనానికి దాసోహం అంటోంది 

సమాజం..!!

18.    ఉచితానుచితాలు

ఆలోచించాలి

అయాచితంగా

మాట జారకూడదు

లాభం సంగతెలా వున్నా

అపాత్రదానం కూడదు..!!

19.   విభజన

ఊసెందుకు

నా నీ ఉనికి

ఒకటే అయినప్పుడు

మనమన్న మాట

మనసులో మెదిలితే చాలు..!!

20.   కలలన్నీ

కల(ల)‘వరాలే

వాస్తవాలన్నీ

వేకువ పొద్దులవే

అడుగులెటు పడినా

అంతిమ ఫలితం కాలానిదే..!!

21.   తల్లీబిడ్డల బంధం

తెచ్చిపెట్టుకుంటే వచ్చే పదవి కాదు

డబ్బుతో కొలవలేనిది

మమతనెరిగిన బాధ్యత

సంస్కారం

జన్మతః ప్రాప్తిస్తుంది..!!

22.   జ్ఞాపకాలన్ని

గత కాలానివే

చెరపలేని రాతలకు

సాక్ష్యాలుగా

భవితతో ముడిబడిన

వాస్తవం మనం..!!

23.   విసుగు

భరించవచ్చు

విరక్తి

రానివ్వకూడదు

మనిషికి 

జీవితానికి తెలియాల్సినవి..!!

24.   వీగిపోతున్న 

చుట్టరికాలు

కొలమానంగా మారిన

ధనము

మనిషితనానికి మిగిలిన

ప్రశ్నార్థకమీనాడు..!!

25.   నిరాశ

చుట్టమౌతోంది

ఆశ

ఆకాశం వైపు చూపెడుతోంది

అనుబంధాలు

ధనాత్మకమైపోతున్నాయి..!!

26.   వెలితి

తెలుస్తోంది

వెతలు

వెంబడిస్తుంటే

కాలం

నిర్వికారంగా సాగిపోతూనే వుంది..!!

27.    వెతలు

వెంటాడుతునే ఉంటాయి

బాధ్యతలు

బంధాలకు చిక్కుబడిపోయాయి

అవినాభావ సంబంధం

కాలానిది జీవితానిది..!!

28.   అనుభవాల

ఆటుపోటులే అన్ని

చిక్కుముళ్లను

విప్పుకుంటూ

భూమ్యాకాశాల కొసలను

కలిపే కాలయంత్రంలో..!!

29.   చుట్టరికానికి కొలమానం

ధన సంబంధం

మనిషితనానికి తూగేది

ఆత్మానుబంధం

కాలపు తక్కెడలో

తూకపురాళ్ళెప్పుడూ ఒకటే..!!

30.  కనబడే అబద్ధం

పొగడ్త

వినబడని నిజం

విమర్శ

కొలవలేని దూరం

రక్త సంబంధాల మధ్యన..!!