మరల మరల పలకరించే.....!!

తొలి వలపు తీయదనము
తొలి ముద్దు తీయందనము
మలి పొద్దులో మరల మరల
పలకరించే మధుర జ్ఞాపకమే!!

స్వప్నమో కాదో...!!

కలో కలవరమో తెలియని
అయోమయంలో నిదుర కాని
మెలుకువ లోని ఒక స్వప్నం
వేకువలో నిజమయ్యేనా!!
కమ్మని అమ్మ లాలి పాట
నను పరవశింప చేసేనా!!
అమ్మ చల్లని చేతి స్పర్శలోని
వెచ్చదనం నా కందేనా!!
కలైన ఈ కలవరింత లోని
కమ్మదనం, అమ్మదనం అచ్చంగా నాదైతే!!
మెలుకువలోని మరిన్ని నా స్వప్నాలు
వేకువ పొద్దులో నిజమౌతాయి....!!

తెలుగు బ్లాగుల ద్వితీయ వార్షికోత్సవ కొన్ని కబుర్లు.....

నిన్నటి తెలుగు బ్లాగుల ద్వితీయ వార్షికోత్సవ సందర్భంగా కలిసిన తెలుగు బ్లాగర్లు కొంతమంది...కిందనుంచి కుడినుంచి భార్గవగారు, శ్రీనివాస్ గారు, తాడేపల్లిగారు, నరసింహంగారు, జ్వాలాముఖిగారు, రావుగారు, జ్వాలాముఖి గారి స్నేహితులు, పైన ఎడమ నుంచి శ్రీనివాసరాజు, రహ్మానుద్దిన్ షేక్ గారు, రవిచంద్రగారు, రవిచంద్ర అర్ధాంగి నీలిమ, మంజు, మాలాకుమార్ గారు, ఉమగారు....ఫోటోలో సుజాత గారు లేరు ఎందుకంటే ఆవిడే ఫోటో తీసారు...-:).
కొద్దిగా అంటే బానే ఆలస్యంగా అందరూ వచ్చారు.ముందుగా నేను లోపలి వెళ్ళేటప్పటికే నరసింహం గారు తెలుగు బ్లాగర్ల కోసమా అని అడిగారు.ముందుగా నాకు ముఖ పరిచయం అయినది నరసింహం గారితోనే. చాలా సేపు ఎదురు చూసిన తరువాత రావు గారు పలకరించారు.ఈ లోపల మాలానే అందరికోసం వెతుక్కుంటున్న మాలాకుమార్ గారు కనిపించారు. మా పరిచయాలయిన తరువాత మిగిలిన వాళ్ళు అందరూ కలిసారు. బ్లాగుల గురించి, ఈ తెలుగు స్టాల్ గురించి చర్చించారు. ఆఖరులో జ్యోతిగారు కుడా వచ్చారు....ఇవండీ కృష్ణకాంత్ పార్కులోని నిన్నటి సాయకాలపు కొన్ని కబుర్లు.....

మనసారా...

మొన్ననే మనసారా సినిమా చూసాను. ఓ మామూలు ప్రేమ కధని రవిబాబు తనదైన స్టైల్ లో చాలా బాగా తీసారు. ప్రేమకు అందం,డబ్బు, ధైర్యం...లాంటివి అక్కరలేదు, అందం లేని పిరికి వాడు కుడా ప్రేమను గెలిపించుకోవచ్చు అని ఒక కొత్త తరహాలో తనదైన బాణిలో తెరకెక్కించిన సినిమానే మనసారా...పాటలు కుడా వినసొంపుగా ఎంతో బావున్నాయి. కేరళ లోని అతి ప్రాచీన కళ అయిన కళరి పోటితో మొదలైన సినిమా దానితోనే ముగుస్తుంది. కళరి పోటిలో బంగారు పతకం సాధించిన వాడితో ఓ పిరికి వాడు ప్రేమను గెలిపించుకోవడానికి చేసిన ప్రయత్నమే ఈ మనసారా...సినిమా. చివరి వరకు మాటలు కాని, పాటల సంగీతం కాని, ఫోటోగ్రఫి కాని ఎంత బాగుందంటే....ఎక్కడా అసభ్యత అనేది లేకుండా తీసిన ఓ మంచి సినిమా!!
ఇక్కడ నాకు అర్ధం కాని విష్యం ఒక్కటే....చాలా రివ్యూస్ చూసాను కాని ఒక్కటి కుడా నిజాయితీగా అనిపించలేదు. మరి మంచి సినిమాలకు కుడా సరిగ్గా రాయలేనప్పుడు ఇక ఎందుకో ఈ వెబ్సైట్లు.....!!

రాదా మాధవీయం....!!

చిరుగాలి సరాగాల సడిలో
చిటపట చినుకుల సవ్వడిలో
జలతారు పండువెన్నెల పరదాలలో
మరుమల్లెల గుభాళింపులో
మనసును చుట్టుముట్టిన తలపులతో
నడిరేయి గడచినా రాని మాధవుని రాకకై
యమున ఒడ్డున ఆశగ ఎదురు చూసేను రాధ!!