రాజ నీతి...!!

నిప్పు రాజేసి నిమ్మకు నీరెత్తినట్టు ఉంటే సరిపోతుందా..!! పుట్టినరోజు కానుకగా కె సి ఆర్ గారి దీక్షకు సంతోషించి అమ్మగారు బహుమతిగా ఆంద్ర రాష్టాన్ని ముక్కలు చేసాను తీసుకోండి అన్నారు... మళ్ళి తూచ్ అని వెనక్కు తీసుకుని ఇన్ని రోజులు చోద్యం చూసి ఆత్మ బలిదానాలు, బందులు, రాస్తా రోకోలు అన్ని సినిమా చూసినట్టు చూసి చిటుక్కున తెలంగాణా ఇచ్చేసాము మీ ఇష్టం అంటే సరిపోతుందా..!! విభజన తప్పదు అని తెలిసినప్పుడు ఇరు పక్షాల వాళ్లకి సమంగా ఉండాలి...రాజధాని ఏదో..!! నిధులు ఎన్నో ఏంటో చెప్పకుండానే తీర్మానం చేస్తే సరి పొతుందా..!!
దిగ్విజయ్ సింగ్ గారు మీకు తెలుగు రాష్ట్రం గురించి ఏం తెలుసు అని మాట్లాడుతున్నారు..?? సీమాంధ్ర నేతలకు హామీ ఇస్తున్నాము అంటే నేతలకు కోరికలు తీరుస్తారా...!! ప్రజలు గుర్తు లేరా మీకు...!! తెలంగాణా ఇచ్చేసాము సీమాంధ్ర నేతలకు, ప్రజలకు భయం లేదు అంటే సరిపోతుందా..!! ఇక తెలంగాణా చావులు చూసాము కదా మిగిలిన తెలుగు వాళ్ళ చావులు చూడాలని కోరికగా ఉన్నట్టు ఉంది...!! మాలో మాకు పెట్టి మీ పబ్బం గడుపుకుంటున్నారు. విభజించి పాలించే నీతిని ఒంటబట్టించుకుని పదవుల కోసం, డబ్బు కోసం పార్టీలు మారే నేతలు అమ్మకు సలాములు చేయండి.... గంగిరెద్దుల్లా తలలూపండి....అంతే కాని తెలుగు ప్రజల ఆత్మ గౌరవాన్ని తాకట్టు పెట్టకండి...మిమ్మల్ని నమ్మి గెలిపించిన పాపానికి...!!
గెలిచేదొక పార్టి గుర్తుతో...పదవి కోసం మారేది మరొక పార్టీలోకి... కనీసం మీ స్వార్ధం చూసుకునేటప్పుడు ఒక్కసారైనా మిమ్మల్ని గెలిపించిన జనాలు గుర్తుకు రాక పోవడం మా దురదృష్టం. ఇలాంటి నేతలను నమ్మి ఎన్నుకుని మేమే తప్పు చేసాము. రాజీనామాలంటారు...మళ్ళి  ఎన్నికలంటారు...ఈ డబ్బులన్నీ మా నెత్తిన రుద్దుతారు నిత్యావసర ధరలను పెంచి...ఎక్కడా లేని ఎవరో కాల్చుకున్న ఏళ్ళ  తరబడి బిల్లులు కట్టమంటారు...దొరికినంతా దోచుకుని ఖజానా ఖాళీ అని చేతుతెత్తేస్తారు...పదవుల కోసం ఉచ్ఛ నీచాలు మరచిపోతారు...!! మరి ఇలాంటి నాయకులను గెలిపించిన మనది తప్పే కదా...అందుకే అనుభవిస్తున్నాము.
కనీసం ఇప్పుడైనా మీకు మనస్సాక్షి ఉంటే నాటకాలు మాని పార్టీలకతీతంగా జనం కోసం, తెలుగు జాతి కోసం సమైక్యంగా పోరాడి గెలుపు పిలుపు వినిపించి మీరూ మనసున్న మనుషులే అని నిరూపించండి.