నీలోని.....!!

నేను వెన్నెల్లో ఆడుకున్న అక్షరాన్ని
నీతో పంచుకున్న భావాలన్నీ దాచుకున్న మనసుని
జ్ఞాపకాలన్నీ తడిమిన బంధాన్ని

నేను నిన్ను తెలుసుకున్న చుట్టాన్ని
కలసిన జతలో మరచిపోలేని ఆత్మీయరాగాన్ని పంచిన నేస్తాన్ని
ఎద లోతుల్లోని మమకారాన్ని

నేను నీతో కలసి నడచిన గతాన్ని
అనుక్షణం కదలాడుతున్న మది అంతరంగాన్ని
అద్దంలో కనిపించే ప్రతిబింబాన్ని

నేను నీతో పయనించే కాలాన్ని
వాస్తవాల వెలుగులో జీవితాన్ని శాసించే అధికారాన్ని
స్వప్నాలను అందించే స్వాప్నికురాలిని

నేను నీతో విభేదించే అలౌకికాన్ని
అంతర్లోకంలో అనిమేషంగా పయనించే ఆత్మానందాన్ని
అంతర్లోచనాన్ని అందించే మార్గాన్ని

నేను నీలో ఇమిడిన మౌనాన్ని
మాటల ప్రవాహాన్ని అడ్డుకున్న మలయమారుతాన్ని
నీ చుట్టూ అందంగా చుట్టుకున్న చేవ్రాలుని

నేను నీలో ఉండే చిద్విలాసాన్ని
చింతలను వంతలను పారద్రోలే సంతోషాన్ని
నేనే నీవైన  ఆనందభాష్పాన్ని...!!