నాకు నచ్చినట్టుగా....!!

నేను నీవుగా మారినా
నువ్వు నాలా మారక
నీవులా ఉండిపోయావు...!!

ఏకాంతంలో నీ జ్ఞాపకం
ఎద నిండుగా చేరగా
సహవాసం నీతోనే నిరంతరం....!!

అర్ధమైన అనుబంధం వ్యర్ధంగా
వగచి దూరంగా పోయినా
చుట్టుకున్న బంధం ఇదేనేమో...!!

పరుగు పెడుతున్న కాలాన్ని
ఆపలేక దానితో పోటి పడలేక
నిలిచి పోయిన జీవితం నాదేనేమో...!!

పట్టు పరుపులను వదలి
ముళ్ళ బాటలో నడిచిన కాళ్ళకు
అంటిన రక్తపు చారికలు పోనేలేదు ఇంకా...!!

చరమ గీతాల సాగనంపు సంగీతం
మృత్యు గీతాల మరణ మృదంగం
మధురంగానే అనిపిస్తోంది మరి....!!

జీవిత చివరి అంకంలో మిగిలిన
తెర పడని నాటకానికి ముగింపు
నేనే రాసుకోవాలి నాకు నచ్చినట్టుగా....!!