నేనై పోయానేమిటి...!!

తారలద్దిన చీకటి దుప్పటి కాన్వాసుపై
నీ మనసు గీసిన తైలవర్ణ చిత్తరువు
చిత్రంగా నాదయ్యిందేమిటి...??

హద్దులన్ని పొద్దులుగా చేరి మాపటేలకు 
రాతిరిని పోనియ్యని వెన్నెలగా మారి
నీ కలల రాదారిలో చిక్కుబడ్డాయెందుకు...??

రాలిపడిన అక్షరాలు చెప్పిన మౌనాలు 
కారిన కన్నీటి చుక్కలు చెప్పిన జ్ఞాపకాలు
కలసిన నీ గతంలో నేనెందుకు ఉండిపోయాను...??

వాస్తవానికి చేరువకాలేని గాయమై నిను చేరి
నిశీధిలో వదలలేని వేకువ గీతమై నీలో ఉండిపోయి
నీలోనే దాగిపోయిన వెన్నెల జలపాతాన్ని నేనై పోయానేమిటి...!!